(৭৭) ৫. ৰূপধাতুকথা

৫১৫. ৰূপিনো ধম্মা ৰূপধাতূতি? আমন্তা. ৰূপং ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? ন হেৱং ৱত্তব্বে…পে… অত্থি ৰূপূপগং কম্মন্তি? ন হেৱং ৱত্তব্বে…পে… অত্থি ৰূপূপগা সত্তাতি? ন হেৱং ৱত্তব্বে…পে… ৰূপে সত্তা জাযন্তি জীযন্তি মীযন্তি চৱন্তি উপপজ্জন্তীতি? ন হেৱং ৱত্তব্বে…পে… ৰূপে অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? ন হেৱং ৱত্তব্বে…পে… ৰূপং পঞ্চৱোকাৰভৱোতি? ন হেৱং ৱত্তব্বে…পে….

ৰূপধাতু ভৱো গতি…পে… অত্তভাৱপটিলাভোতি? আমন্তা. ৰূপং ভৱো গতি…পে… অত্তভাৱপটিলাভোতি? ন হেৱং ৱত্তব্বে…পে… অত্থি ৰূপধাতূপগং কম্মন্তি? আমন্তা. অত্থি ৰূপূপগং কম্মন্তি? ন হেৱং ৱত্তব্বে…পে… অত্থি ৰূপধাতূপগা সত্তাতি? আমন্তা. অত্থি ৰূপূপগা সত্তাতি? ন হেৱং ৱত্তব্বে…পে….

ৰূপধাতুযা সত্তা জাযন্তি জীযন্তি মীযন্তি চৱন্তি উপপজ্জন্তীতি? আমন্তা. ৰূপে সত্তা জাযন্তি জীযন্তি মীযন্তি চৱন্তি উপপজ্জন্তীতি? ন হেৱং ৱত্তব্বে…পে… ৰূপধাতুযা অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? আমন্তা. ৰূপে অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? ন হেৱং ৱত্তব্বে…পে… ৰূপধাতু পঞ্চৱোকাৰভৱোতি? আমন্তা. ৰূপং পঞ্চৱোকাৰভৱোতি? ন হেৱং ৱত্তব্বে…পে….

৫১৬. ৰূপিনো ধম্মা ৰূপধাতু, কামধাতুযা অত্থি ৰূপন্তি? আমন্তা. সাৱ কামধাতু, সা ৰূপধাতূতি? ন হেৱং ৱত্তব্বে…পে… সাৱ কামধাতু, সা ৰূপধাতূতি? আমন্তা. কামভৱেন সমন্নাগতো পুগ্গলো দ্ৱীহি ভৱেহি সমন্নাগতো হোতি – কামভৱেন চ ৰূপভৱেন চাতি? ন হেৱং ৱত্তব্বে.

ৰূপধাতুকথা নিট্ঠিতা.