৮. অট্ঠমৱগ্গো

(৭৮) ৬. অৰূপধাতুকথা

৫১৭. অৰূপিনো ধম্মা অৰূপধাতূতি? আমন্তা. ৱেদনা ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? ন হেৱং ৱত্তব্বে…পে… অত্থি ৱেদনূপগং কম্মন্তি? ন হেৱং ৱত্তব্বে…পে… অত্থি ৱেদনূপগা সত্তাতি? ন হেৱং ৱত্তব্বে…পে… ৱেদনায সত্তা জাযন্তি জীযন্তি মীযন্তি চৱন্তি উপপজ্জন্তীতি? ন হেৱং ৱত্তব্বে…পে… ৱেদনায অত্থি ৱেদনা সঞ্ঞা সঙ্খাৰা ৱিঞ্ঞাণন্তি? ন হেৱং ৱত্তব্বে…পে… ৱেদনা চতুৱোকাৰভৱোতি? ন হেৱং ৱত্তব্বে…পে….

অৰূপধাতু ভৱো গতি…পে… অত্তভাৱপটিলাভোতি? আমন্তা. ৱেদনা ভৱো গতি…পে… অত্তভাৱপটিলাভোতি? ন হেৱং ৱত্তব্বে…পে… অত্থি অৰূপধাতূপগং কম্মন্তি? আমন্তা. অত্থি ৱেদনূপগং কম্মন্তি? ন হেৱং ৱত্তব্বে…পে… অত্থি অৰূপধাতূপগা সত্তাতি? আমন্তা. অত্থি ৱেদনূপগা সত্তাতি? ন হেৱং ৱত্তব্বে…পে….

অৰূপধাতুযা সত্তা জাযন্তি জীযন্তি মীযন্তি চৱন্তি উপপজ্জন্তীতি? আমন্তা. ৱেদনায সত্তা জাযন্তি জীযন্তি মীযন্তি চৱন্তি উপপজ্জন্তীতি? ন হেৱং ৱত্তব্বে…পে… অৰূপধাতুযা অত্থি ৱেদনা সঞ্ঞা সঙ্খাৰা ৱিঞ্ঞাণন্তি? আমন্তা. ৱেদনায অত্থি ৱেদনা সঞ্ঞা সঙ্খাৰা ৱিঞ্ঞাণন্তি? ন হেৱং ৱত্তব্বে…পে… অৰূপধাতু চতুৱোকাৰভৱোতি? আমন্তা. ৱেদনা চতুৱোকাৰভৱোতি? ন হেৱং ৱত্তব্বে…পে….

৫১৮. অৰূপিনো ধম্মা অৰূপধাতু, কামধাতুযা অত্থি ৱেদনা সঞ্ঞা সঙ্খাৰা ৱিঞ্ঞাণন্তি? আমন্তা. সাৱ কামধাতু, সা অৰূপধাতূতি? ন হেৱং ৱত্তব্বে…পে… সাৱ কামধাতু, সা অৰূপধাতূতি? আমন্তা. কামভৱেন সমন্নাগতো পুগ্গলো দ্ৱীহি ভৱেহি সমন্নাগতো হোতি – কামভৱেন চ অৰূপভৱেন চাতি? ন হেৱং ৱত্তব্বে…পে….

ৰূপিনো ধম্মা ৰূপধাতু, অৰূপিনো ধম্মা অৰূপধাতু, কামধাতুযা অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? আমন্তা. সাৱ কামধাতু, সা ৰূপধাতু, সা অৰূপধাতূতি? ন হেৱং ৱত্তব্বে…পে… সাৱ কামধাতু, সা ৰূপধাতু, সা অৰূপধাতূতি? আমন্তা. কামভৱেন সমন্নাগতো পুগ্গলো তীহি ভৱেহি সমন্নাগতো হোতি – কামভৱেন চ ৰূপভৱেন চ অৰূপভৱেন চাতি? ন হেৱং ৱত্তব্বে…পে….

অৰূপধাতুকথা নিট্ঠিতা.