৮. অট্ঠমৱগ্গো

(৭৫) ৩. কামগুণকথা

৫১০. পঞ্চেৱ কামগুণা কামধাতূতি? আমন্তা. ননু অত্থি তপ্পটিসঞ্ঞুত্তো ছন্দোতি? আমন্তা. হঞ্চি অত্থি তপ্পটিসঞ্ঞুত্তো ছন্দো, নো চ ৱত ৰে ৱত্তব্বে – ‘‘পঞ্চেৱ কামগুণা কামধাতূ’’তি. ননু অত্থি তপ্পটিসঞ্ঞুত্তো ৰাগো তপ্পটিসঞ্ঞুত্তো ছন্দো তপ্পটিসঞ্ঞুত্তো ছন্দৰাগো তপ্পটিসঞ্ঞুত্তো সঙ্কপ্পো তপ্পটিসঞ্ঞুত্তো ৰাগো তপ্পটিসঞ্ঞুত্তো সঙ্কপ্পৰাগো তপ্পটিসঞ্ঞুত্তা পীতি তপ্পটিসঞ্ঞুত্তং সোমনস্সং তপ্পটিসঞ্ঞুত্তং পীতিসোমনস্সন্তি? আমন্তা. হঞ্চি অত্থি তপ্পটিসঞ্ঞুত্তং পীতিসোমনস্সং, নো চ ৱত ৰে ৱত্তব্বে – ‘‘পঞ্চেৱ কামগুণা কামধাতূ’’তি.

পঞ্চেৱ কামগুণা কামধাতূতি? আমন্তা. মনুস্সানং চক্খু ন কামধাতূতি? ন হেৱং ৱত্তব্বে…পে… মনুস্সানং সোতং…পে… মনুস্সানং ঘানং…পে… মনুস্সানং জিৱ্হা…পে… মনুস্সানং কাযো…পে… মনুস্সানং মনো ন কামধাতূতি? ন হেৱং ৱত্তব্বে…পে….

মনুস্সানং মনো ন কামধাতূতি? আমন্তা. ননু ৱুত্তং ভগৱতা –

‘‘পঞ্চ কামগুণা লোকে, মনোচ্ছট্ঠা পৱেদিতা;

এত্থ ছন্দং ৱিৰাজেত্ৱা, এৱং দুক্খা পমুচ্চতী’’তি [সু. নি. ১৭৩; সং. নি. ১.৩০].

অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘মনুস্সানং মনো ন কামধাতূ’’তি.

৫১১. পঞ্চেৱ কামগুণা কামধাতূতি? আমন্তা. কামগুণা ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? ন হেৱং ৱত্তব্বে…পে… অত্থি কামগুণূপগং কম্মন্তি? ন হেৱং ৱত্তব্বে…পে… অত্থি কামগুণূপগা সত্তাতি? ন হেৱং ৱত্তব্বে…পে… কামগুণে সত্তা জাযন্তি জীযন্তি মীযন্তি চৱন্তি উপপজ্জন্তীতি? ন হেৱং ৱত্তব্বে…পে… কামগুণে অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? ন হেৱং ৱত্তব্বে…পে… কামগুণা পঞ্চৱোকাৰভৱোতি? ন হেৱং ৱত্তব্বে…পে… কামগুণে সম্মাসম্বুদ্ধা উপ্পজ্জন্তি, পচ্চেকসম্বুদ্ধা উপ্পজ্জন্তি, সাৱকযুগং উপ্পজ্জতীতি? ন হেৱং ৱত্তব্বে…পে….

কামধাতু ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? আমন্তা. কামগুণা ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? ন হেৱং ৱত্তব্বে…পে… অত্থি কামধাতূপগং কম্মন্তি? আমন্তা. অত্থি কামগুণূপগং কম্মন্তি? ন হেৱং ৱত্তব্বে…পে… অত্থি কামধাতূপগা সত্তাতি? আমন্তা. অত্থি কামগুণূপগা সত্তাতি? ন হেৱং ৱত্তব্বে…পে….

কামধাতুযা সত্তা জাযন্তি জীযন্তি মীযন্তি চৱন্তি উপপজ্জন্তীতি? আমন্তা. কামগুণে সত্তা জাযন্তি জীযন্তি মীযন্তি চৱন্তি উপপজ্জন্তীতি? ন হেৱং ৱত্তব্বে …পে… কামধাতুযা অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? আমন্তা. কামগুণে অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? ন হেৱং ৱত্তব্বে…পে… কামধাতু পঞ্চৱোকাৰভৱোতি? আমন্তা. কামগুণা পঞ্চৱোকাৰভৱোতি? ন হেৱং ৱত্তব্বে…পে… কামধাতুযা সম্মাসম্বুদ্ধা উপ্পজ্জন্তি, পচ্চেকসবুদ্ধা উপ্পজ্জন্তি, সাৱকযুগং উপ্পজ্জতীতি? আমন্তা. কামগুণে সম্মাসম্বুদ্ধা উপ্পজ্জন্তি, পচ্চেকসম্বুদ্ধা উপ্পজ্জন্তি, সাৱকযুগং উপ্পজ্জতীতি? ন হেৱং ৱত্তব্বে…পে….

৫১২. ন ৱত্তব্বং – ‘‘পঞ্চেৱ কামগুণা কামধাতূ’’তি? আমন্তা. ননু ৱুত্তং ভগৱতা – ‘‘পঞ্চিমে, ভিক্খৱে, কামগুণা! কতমে পঞ্চ? চক্খুৱিঞ্ঞেয্যা ৰূপা ইট্ঠা কন্তা মনাপা পিযৰূপা কামূপসংহিতা ৰজনীযা, সোতৱিঞ্ঞেয্যা সদ্দা…পে… ঘানৱিঞ্ঞেয্যা গন্ধা…পে… জিৱ্হাৱিঞ্ঞেয্যা ৰসা…পে… কাযৱিঞ্ঞেয্যা ফোট্ঠব্বা ইট্ঠা কন্তা মনাপা পিযৰূপা কামূপসংহিতা ৰজনীযা – ইমে খো, ভিক্খৱে, পঞ্চ কামগুণা’’তি. অত্থেৱ সুত্তন্তোতি? আমন্তা. তেন হি পঞ্চেৱ কামগুণা কামধাতূতি.

কামগুণকথা নিট্ঠিতা.