৮. অট্ঠমৱগ্গো

(৭৬) ৪. কামকথা

৫১৩. পঞ্চেৱাযতনা কামাতি? আমন্তা. ননু অত্থি তপ্পটিসংযুত্তো ছন্দোতি? আমন্তা. হঞ্চি অত্থি তপ্পটিসংযুত্তো ছন্দো, নো চ ৱত ৰে ৱত্তব্বে – ‘‘পঞ্চেৱাযতনা কামা’’তি. ননু অত্থি তপ্পটিসংযুত্তো ৰাগো তপ্পটিসংযুত্তো ছন্দো তপ্পটিসংযুত্তো ছন্দৰাগো তপ্পটিসংযুত্তো সঙ্কপ্পো তপ্পটিসংযুত্তো ৰাগো তপ্পটিসংযুত্তো সঙ্কপ্পৰাগো তপ্পটিসংযুত্তা পীতি তপ্পটিসংযুত্তং সোমনস্সং তপ্পটিসংযুত্তং পীতিসোমনস্সন্তি? আমন্তা. হঞ্চি অত্থি তপ্পটিসংযুত্তং পীতিসোমনস্সং, নো চ ৱত ৰে ৱত্তব্বে – ‘‘পঞ্চেৱাযতনা কামা’’তি.

৫১৪. ন ৱত্তব্বং – ‘‘পঞ্চেৱাযতনা কামা’’তি? আমন্তা. ননু ৱুত্তং ভগৱতা – ‘‘পঞ্চিমে, ভিক্খৱে, কামগুণা! কতমে পঞ্চ? চক্খুৱিঞ্ঞেয্যা ৰূপা…পে… কাযৱিঞ্ঞেয্যা ফোট্ঠব্বা ইট্ঠা কন্তা মনাপা পিযৰূপা কামূপসংহিতা ৰজনীযা – ইমে খো, ভিক্খৱে, পঞ্চ কামগুণা’’তি. অত্থেৱ সুত্তন্তোতি? আমন্তা. তেন হি পঞ্চেৱাযতনা কামাতি.

পঞ্চেৱাযতনা কামাতি? আমন্তা. ননু ৱুত্তং ভগৱতা – ‘‘পঞ্চিমে, ভিক্খৱে, কামগুণা! কতমে পঞ্চ? চক্খুৱিঞ্ঞেয্যা ৰূপা…পে… কাযৱিঞ্ঞেয্যা ফোট্ঠব্বা ইট্ঠা কন্তা মনাপা পিযৰূপা কামূপসংহিতা ৰজনীযা – ইমে খো, ভিক্খৱে, পঞ্চ কামগুণা. অপি চ, ভিক্খৱে, নেতে কামা কামগুণা নামেতে অৰিযস্স ৱিনযে ৱুচ্চ’’ন্তি –

‘‘সঙ্কপ্পৰাগো পুৰিসস্স কামো,

ন তে কামা যানি চিত্ৰানি লোকে;

সঙ্কপ্পৰাগো পুৰিসস্স কামো,

তিট্ঠন্তি চিত্ৰানি তথেৱ লোকে;

অথেত্থ ধীৰা ৱিনযন্তি ছন্দ’’ন্তি [অ. নি. ৬.৬৩ নিব্বেধিকসুত্তে].

অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘পঞ্চেৱাযতনা কামা’’তি.

কামকথা নিট্ঠিতা.