৮. অট্ঠমৱগ্গো

(৭৪) ২. অন্তৰাভৱকথা

৫০৫. অত্থি অন্তৰাভৱোতি? আমন্তা. কামভৱোতি? ন হেৱং ৱত্তব্বে…পে… অত্থি অন্তৰাভৱোতি? আমন্তা. ৰূপভৱোতি? ন হেৱং ৱত্তব্বে…পে… অত্থি অন্তৰাভৱোতি? আমন্তা. অৰূপভৱোতি? ন হেৱং ৱত্তব্বে…পে… অত্থি অন্তৰাভৱোতি? আমন্তা. কামভৱস্স চ ৰূপভৱস্স চ অন্তৰে অত্থি অন্তৰাভৱোতি? ন হেৱং ৱত্তব্বে…পে… অত্থি অন্তৰাভৱোতি? আমন্তা. ৰূপভৱস্স চ অৰূপভৱস্স চ অন্তৰে অত্থি অন্তৰাভৱোতি? ন হেৱং ৱত্তব্বে…পে….

কামভৱস্স চ ৰূপভৱস্স চ অন্তৰে নত্থি অন্তৰাভৱোতি? আমন্তা. হঞ্চি কামভৱস্স চ ৰূপভৱস্স চ অন্তৰে নত্থি অন্তৰাভৱো, নো চ ৱত ৰে ৱত্তব্বে – ‘‘অত্থি অন্তৰাভৱো’’তি. ৰূপভৱস্স চ অৰূপভৱস্স চ অন্তৰে নত্থি অন্তৰাভৱোতি? আমন্তা. হঞ্চি ৰূপভৱস্স চ অৰূপভৱস্স চ অন্তৰে নত্থি অন্তৰাভৱো, নো চ ৱত ৰে ৱত্তব্বে – ‘‘অত্থি অন্তৰাভৱো’’তি.

৫০৬. অত্থি অন্তৰাভৱোতি? আমন্তা. পঞ্চমী সা যোনি, ছট্ঠমী সা গতি, অট্ঠমী সা ৱিঞ্ঞাণট্ঠিতি, দসমো সো সত্তাৱাসোতি? ন হেৱং ৱত্তব্বে…পে… অত্থি অন্তৰাভৱোতি? আমন্তা. অন্তৰাভৱো ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? ন হেৱং ৱত্তব্বে…পে… অত্থি অন্তৰাভৱূপগং কম্মন্তি? ন হেৱং ৱত্তব্বে…পে… অত্থি অন্তৰাভৱূপগা সত্তাতি? ন হেৱং ৱত্তব্বে…পে… অন্তৰাভৱে সত্তা জাযন্তি জীযন্তি মীযন্তি চৱন্তি উপপজ্জন্তীতি? ন হেৱং ৱত্তব্বে…পে… অন্তৰাভৱে অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? ন হেৱং ৱত্তব্বে…পে… অন্তৰাভৱো পঞ্চৱোকাৰভৱোতি? ন হেৱং ৱত্তব্বে…পে….

৫০৭. অত্থি কামভৱো, কামভৱো ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? আমন্তা. অত্থি অন্তৰাভৱো, অন্তৰাভৱো ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? ন হেৱং ৱত্তব্বে…পে… অত্থি কামভৱূপগং কম্মন্তি? আমন্তা. অত্থি অন্তৰাভৱূপগং কম্মন্তি? ন হেৱং ৱত্তব্বে…পে… অত্থি কামভৱূপগা সত্তাতি? আমন্তা. অত্থি অন্তৰাভৱূপগা সত্তাতি? ন হেৱং ৱত্তব্বে…পে… কামভৱে সত্তা জাযন্তি জীযন্তি মীযন্তি চৱন্তি উপপজ্জন্তীতি? আমন্তা. অন্তৰাভৱে সত্তা জাযন্তি জীযন্তি মীযন্তি চৱন্তি উপপজ্জন্তীতি? ন হেৱং ৱত্তব্বে…পে… কামভৱে অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? আমন্তা. অন্তৰাভৱে অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? ন হেৱং ৱত্তব্বে…পে… কামভৱো পঞ্চৱোকাৰভৱোতি? আমন্তা. অন্তৰাভৱো পঞ্চৱোকাৰভৱোতি? ন হেৱং ৱত্তব্বে…পে….

অত্থি ৰূপভৱো, ৰূপভৱো ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? আমন্তা. অত্থি অন্তৰাভৱো, অন্তৰাভৱো ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? ন হেৱং ৱত্তব্বে…পে… অত্থি ৰূপভৱূপগং কম্মন্তি? আমন্তা. অত্থি অন্তৰাভৱূপগং কম্মন্তি? ন হেৱং ৱত্তব্বে…পে… অত্থি ৰূপভৱূপগা সত্তাতি? আমন্তা. অত্থি অন্তৰাভৱূপগা সত্তাতি? ন হেৱং ৱত্তব্বে…পে… ৰূপভৱে সত্তা জাযন্তি জীযন্তি মীযন্তি চৱন্তি উপপজ্জন্তীতি? আমন্তা. অন্তৰাভৱে সত্তা জাযন্তি জীযন্তি মীযন্তি চৱন্তি উপপজ্জন্তীতি? ন হেৱং ৱত্তব্বে…পে… ৰূপভৱে অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? আমন্তা. অন্তৰাভৱে অত্থি ৰূপং ৱেদনা সঞ্ঞা সঙ্খাৰা ৱিঞ্ঞাণন্তি? ন হেৱং ৱত্তব্বে…পে… ৰূপভৱো পঞ্চৱোকাৰভৱোতি? আমন্তা. অন্তৰাভৱো পঞ্চৱোকাৰভৱোতি? ন হেৱং ৱত্তব্বে…পে….

অত্থি অৰূপভৱো, অৰূপভৱো ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? আমন্তা. অত্থি অন্তৰাভৱো, অন্তৰাভৱো ভৱো গতি সত্তাৱাসো সংসাৰো যোনি ৱিঞ্ঞাণট্ঠিতি অত্তভাৱপটিলাভোতি? ন হেৱং ৱত্তব্বে…পে… অত্থি অৰূপভৱূপগং কম্মন্তি? আমন্তা. অত্থি অন্তৰাভৱূপগং কম্মন্তি? ন হেৱং ৱত্তব্বে…পে… অত্থি অৰূপভৱূপগা সত্তাতি? আমন্তা. অত্থি অন্তৰাভৱূপগা সত্তাতি? ন হেৱং ৱত্তব্বে…পে… অৰূপভৱে সত্তা জাযন্তি জীযন্তি মীযন্তি চৱন্তি উপপজ্জন্তীতি? আমন্তা. অন্তৰাভৱে সত্তা জাযন্তি জীযন্তি মীযন্তি চৱন্তি উপপজ্জন্তীতি? ন হেৱং ৱত্তব্বে…পে… অৰূপভৱে অত্থি ৱেদনা সঞ্ঞা সঙ্খাৰা ৱিঞ্ঞাণন্তি? আমন্তা. অন্তৰাভৱে অত্থি ৱেদনা সঞ্ঞা সঙ্খাৰা ৱিঞ্ঞাণন্তি? ন হেৱং ৱত্তব্বে…পে… অৰূপভৱো চতুৱোকাৰভৱোতি? আমন্তা. অন্তৰাভৱো চতুৱোকাৰভৱোতি? ন হেৱং ৱত্তব্বে…পে….

৫০৮. অত্থি অন্তৰাভৱোতি? আমন্তা. সব্বেসঞ্ঞেৱ সত্তানং অত্থি অন্তৰাভৱোতি? ন হেৱং ৱত্তব্বে …পে… সব্বেসঞ্ঞেৱ সত্তানং নত্থি অন্তৰাভৱোতি? আমন্তা. হঞ্চি সব্বেসঞ্ঞেৱ সত্তানং নত্থি অন্তৰাভৱো, নো চ ৱত ৰে ৱত্তব্বে – ‘‘অত্থি অন্তৰাভৱো’’তি.

অত্থি অন্তৰাভৱোতি? আমন্তা. আনন্তৰিযস্স পুগ্গলস্স অত্থি অন্তৰাভৱোতি? ন হেৱং ৱত্তব্বে…পে… আনন্তৰিযস্স পুগ্গলস্স নত্থি অন্তৰাভৱোতি? আমন্তা. হঞ্চি আনন্তৰিযস্স পুগ্গলস্স নত্থি অন্তৰাভৱো, নো চ ৱত ৰে ৱত্তব্বে – ‘‘অত্থি অন্তৰাভৱো’’তি.

ন আনন্তৰিযস্স পুগ্গলস্স অত্থি অন্তৰাভৱোতি? আমন্তা. আনন্তৰিযস্স পুগ্গলস্স অত্থি অন্তৰাভৱোতি? ন হেৱং ৱত্তব্বে…পে… আনন্তৰিযস্স পুগ্গলস্স নত্থি অন্তৰাভৱোতি? আমন্তা. ন আনন্তৰিযস্স পুগ্গলস্স নত্থি অন্তৰাভৱোতি? ন হেৱং ৱত্তব্বে…পে… নিৰযূপগস্স পুগ্গলস্স…পে… অসঞ্ঞসত্তূপগস্স পুগ্গলস্স …পে… অৰূপূপগস্স পুগ্গলস্স অত্থি অন্তৰাভৱোতি? ন হেৱং ৱত্তব্বে…পে… অৰূপূপগস্স পুগ্গলস্স নত্থি অন্তৰাভৱোতি? আমন্তা. হঞ্চি অৰূপূপগস্স পুগ্গলস্স নত্থি অন্তৰাভৱো, নো চ ৱত ৰে ৱত্তব্বে – ‘‘অত্থি অন্তৰাভৱো’’তি.

ন অৰূপূপগস্স পুগ্গলস্স অত্থি অন্তৰাভৱোতি? আমন্তা. অৰূপূপগস্স পুগ্গলস্স অত্থি অন্তৰাভৱোতি? ন হেৱং ৱত্তব্বে…পে… অৰূপূপগস্স পুগ্গলস্স নত্থি অন্তৰাভৱোতি? আমন্তা. ন অৰূপূপগস্স পুগ্গলস্স নত্থি অন্তৰাভৱোতি? ন হেৱং ৱত্তব্বে…পে….

৫০৯. ন ৱত্তব্বং অত্থি অন্তৰাভৱোতি? আমন্তা. ননু অন্তৰাপৰিনিব্বাযী পুগ্গলো অত্থীতি? আমন্তা. হঞ্চি অন্তৰাপৰিনিব্বাযী পুগ্গলো অত্থি, তেন ৱত ৰে [নো চ ৱত ৰে (সী. ক.), নো ৱত ৰে (স্যা.)] ৱত্তব্বে – ‘‘অত্থি অন্তৰাভৱো’’তি.

অন্তৰাপৰিনিব্বাযী পুগ্গলো অত্থীতি কত্ৱা অত্থি অন্তৰাভৱোতি? আমন্তা. উপহচ্চপৰিনিব্বাযী পুগ্গলো অত্থীতি কত্ৱা অত্থি উপহচ্চভৱোতি? ন হেৱং ৱত্তব্বে…পে… অন্তৰাপৰিনিব্বাযী পুগ্গলো অত্থীতি কত্ৱা অত্থি অন্তৰাভৱোতি? আমন্তা. অসঙ্খাৰপৰিনিব্বাযী পুগ্গলো…পে… সসঙ্খাৰপৰিনিব্বাযী পুগ্গলো অত্থীতি কত্ৱা অত্থি সসঙ্খাৰভৱোতি? ন হেৱং ৱত্তব্বে…পে….

অন্তৰাভৱকথা নিট্ঠিতা.