(৬৪) ২. সম্পযুত্তকথা

৪৭৩. নত্থি কেচি ধম্মা কেহিচি ধম্মেহি সম্পযুত্তাতি? আমন্তা. ননু অত্থি কেচি ধম্মা কেহিচি ধম্মেহি সহগতা সহজাতা সংসট্ঠা একুপ্পাদা একনিৰোধা একৱত্থুকা একাৰম্মণাতি? আমন্তা. হঞ্চি অত্থি কেচি ধম্মা কেহিচি ধম্মেহি সহগতা সহজাতা সংসট্ঠা একুপ্পাদা একনিৰোধা একৱত্থুকা একাৰম্মণা, নো চ ৱত ৰে ৱত্তব্বে – ‘‘নত্থি কেচি ধম্মা কেহিচি ধম্মেহি সম্পযুত্তা’’তি.

ৱেদনাক্খন্ধো সঞ্ঞাক্খন্ধেন সহজাতোতি? আমন্তা. হঞ্চি ৱেদনাক্খন্ধো সঞ্ঞাক্খন্ধেন সহজাতো, তেন ৱত ৰে ৱত্তব্বে – ‘‘ৱেদনাক্খন্ধো সঞ্ঞাক্খন্ধেন সম্পযুত্তো’’তি.

ৱেদনাক্খন্ধো সঙ্খাৰক্খন্ধেন… ৱিঞ্ঞাণক্খন্ধেন সহজাতোতি? আমন্তা. হঞ্চি ৱেদনাক্খন্ধো ৱিঞ্ঞাণক্খন্ধেন সহজাতো, তেন ৱত ৰে ৱত্তব্বে – ‘‘ৱেদনাক্খন্ধো ৱিঞ্ঞাণক্খন্ধেন সম্পযুত্তো’’তি.

সঞ্ঞাক্খন্ধো … সঙ্খাৰক্খন্ধো… ৱিঞ্ঞাণক্খন্ধো ৱেদনাখন্ধেন… সঞ্ঞাক্খন্ধেন… সঙ্খাৰক্খন্ধেন সহজাতোতি? আমন্তা. হঞ্চি ৱিঞ্ঞাণক্খন্ধো সঙ্খাৰক্খন্ধেন সহজাতো, তেন ৱত ৰে ৱত্তব্বে – ‘‘ৱিঞ্ঞাণক্খন্ধো সঙ্খাৰক্খন্ধেন সম্পযুত্তো’’তি.

৪৭৪. যথা তিলম্হি তেলং অনুগতং অনুপৱিট্ঠং, উচ্ছুম্হি ৰসো অনুগতো অনুপৱিট্ঠো; এৱমেৱ তে ধম্মা তেহি ধম্মেহি অনুগতা অনুপৱিট্ঠাতি? ন হেৱং ৱত্তব্বে…পে….

সম্পযুত্তকথা নিট্ঠিতা.