৭. সত্তমৱগ্গো

(৭২) ১০. ৱিপাকো ৱিপাকধম্মধম্মোতিকথা

৫০১. ৱিপাকো ৱিপাকধম্মধম্মোতি? আমন্তা. তস্স ৱিপাকো ৱিপাকধম্মধম্মোতি? ন হেৱং ৱত্তব্বে…পে… তস্স ৱিপাকো ৱিপাকধম্মধম্মোতি? আমন্তা. তস্স তস্সেৱ নত্থি দুক্খস্স অন্তকিৰিযা নত্থি ৱট্টুপচ্ছেদো নত্থি অনুপাদাপৰিনিব্বানন্তি? ন হেৱং ৱত্তব্বে…পে….

ৱিপাকো ৱিপাকধম্মধম্মোতি? আমন্তা. ৱিপাকোতি ৱা ৱিপাকধম্মধম্মোতি ৱা ৱিপাকধম্মধম্মোতি ৱা ৱিপাকোতি ৱা এসেসে একট্ঠে সমে সমভাগে তজ্জাতেতি? ন হেৱং ৱত্তব্বে…পে….

ৱিপাকো ৱিপাকধম্মধম্মোতি? আমন্তা. ৱিপাকো চ ৱিপাকধম্মধম্মো চ ৱিপাকধম্মধম্মো চ ৱিপাকো চ সহগতা সহজাতা সংসট্ঠা সম্পযুত্তা একুপ্পাদা একনিৰোধা একৱত্থুকা একাৰম্মণাতি? ন হেৱং ৱত্তব্বে…পে….

ৱিপাকো ৱিপাকধম্মধম্মোতি? আমন্তা. তঞ্ঞেৱ অকুসলং সো অকুসলস্স ৱিপাকো, তঞ্ঞেৱ কুসলং সো কুসলস্স ৱিপাকোতি? ন হেৱং ৱত্তব্বে…পে….

ৱিপাকো ৱিপাকধম্মধম্মোতি? আমন্তা. যেনেৱ চিত্তেন পাণং হনতি তেনেৱ চিত্তেন নিৰযে পচ্চতি, যেনেৱ চিত্তেন দানং দেতি তেনেৱ চিত্তেন সগ্গে মোদতীতি? ন হেৱং ৱত্তব্বে…পে….

৫০২. ন ৱত্তব্বং – ‘‘ৱিপাকো ৱিপাকধম্মধম্মো’’তি? আমন্তা. ননু ৱিপাকা চত্তাৰো খন্ধা অৰূপিনো অঞ্ঞমঞ্ঞপচ্চযাতি? আমন্তা. হঞ্চি ৱিপাকা চত্তাৰো খন্ধা অৰূপিনো অঞ্ঞমঞ্ঞপচ্চযা, তেন ৱত ৰে ৱত্তব্বে – ‘‘ৱিপাকো ৱিপাকধম্মধম্মো’’তি.

ৱিপাকো ৱিপাকধম্মধম্মোতিকথা নিট্ঠিতা.

সত্তমৱগ্গো.

তস্সুদ্দানং –

সঙ্গহো, সম্পযুত্তো, চেতসিকো ধম্মো, চেতসিকং দানং, পৰিভোগমযং পুঞ্ঞং ৱড্ঢতি, ইতো দিন্নেন তত্থ যাপেন্তি, পথৱী কম্মৱিপাকো, জৰামৰণং ৱিপাকো, নত্থি অৰিযধম্মৱিপাকো, ৱিপাকো ৱিপাকধম্মধম্মোতি.