২. দুতিযৱগ্গো

(১৩) ৪. পৰৱিতাৰণকথা

৩২২. অত্থি অৰহতো পৰৱিতাৰণাতি? আমন্তা. অৰহা পৰনেয্যো পৰপত্তিযো পৰপচ্চযো পৰপটিবদ্ধভূ, ন জানাতি ন পস্সতি সম্মূড়্হো অসম্পজানোতি? ন হেৱং ৱত্তব্বে…পে….

ননু অৰহা ন পৰনেয্যো ন পৰপত্তিযো ন পৰপচ্চযো ন পৰপটিবদ্ধভূ জানাতি পস্সতি অসম্মূড়্হো সম্পজানোতি? আমন্তা. হঞ্চি অৰহা ন পৰনেয্যো ন পৰপত্তিযো ন পৰপচ্চযো ন পৰপটিবদ্ধভূ, জানাতি পস্সতি অসম্মূড়্হো সম্পজানো, নো চ ৱত ৰে ৱত্তব্বে – ‘‘অত্থি অৰহতো পৰৱিতাৰণা’’তি.

অত্থি পুথুজ্জনস্স পৰৱিতাৰণা, সো চ পৰনেয্যো পৰপত্তিযো পৰপচ্চযো পৰপটিবদ্ধভূ, ন জানাতি ন পস্সতি সম্মূড়্হো অসম্পজানোতি? আমন্তা. অত্থি অৰহতো পৰৱিতাৰণা, সো চ পৰনেয্যো পৰপত্তিযো পৰপচ্চযো পৰপটিবদ্ধভূ, ন জানাতি ন পস্সতি সম্মূড়্হো অসম্পজানোতি? ন হেৱং ৱত্তব্বে…পে….

অত্থি অৰহতো পৰৱিতাৰণা, সো চ ন পৰনেয্যো ন পৰপত্তিযো ন পৰপচ্চযো ন পৰপটিবদ্ধভূ, জানাতি পস্সতি অসম্মূড়্হো সম্পজানোতি? আমন্তা. অত্থি পুথুজ্জনস্স পৰৱিতাৰণা, সো চ ন পৰনেয্যো ন পৰপত্তিযো ন পৰপচ্চযো ন পৰপটিবদ্ধভূ, জানাতি পস্সতি অসম্মূড়্হো সম্পজানোতি? ন হেৱং ৱত্তব্বে…পে….

অত্থি অৰহতো পৰৱিতাৰণাতি? আমন্তা. অত্থি অৰহতো সত্থৰি পৰৱিতাৰণা, ধম্মে পৰৱিতাৰণা, সঙ্ঘে পৰৱিতাৰণা, সিক্খায পৰৱিতাৰণা, পুব্বন্তে পৰৱিতাৰণা, অপৰন্তে পৰৱিতাৰণা, পুব্বন্তাপৰন্তে পৰৱিতাৰণা, ইদপ্পচ্চযতাপটিচ্চসমুপ্পন্নেসু ধম্মেসু পৰৱিতাৰণাতি? ন হেৱং ৱত্তব্বে…পে….

নত্থি অৰহতো সত্থৰি পৰৱিতাৰণা, ধম্মে পৰৱিতাৰণা…পে… ইদপচ্চযতাপটিচ্চসমুপ্পন্নেসু ধম্মেসু পৰৱিতাৰণাতি? আমন্তা. হঞ্চি নত্থি অৰহতো সত্থৰি পৰৱিতাৰণা, ধম্মে পৰৱিতাৰণা…পে… ইদপ্পচ্চযতাপটিচ্চসমুপ্পন্নেসু ধম্মেসু পৰৱিতাৰণা, নো চ ৱত ৰে ৱত্তব্বে – ‘‘অত্থি অৰহতো পৰৱিতাৰণা’’তি.

অত্থি পুথুজ্জনস্স পৰৱিতাৰণা, অত্থি তস্স সত্থৰি পৰৱিতাৰণা, ধম্মে পৰৱিতাৰণা…পে… ইদপ্পচ্চযতাপটিচ্চসমুপ্পন্নেসু ধম্মেসু পৰৱিতাৰণাতি? আমন্তা. অত্থি অৰহতো পৰৱিতাৰণা, অত্থি তস্স সত্থৰি পৰৱিতাৰণা, ধম্মে পৰৱিতাৰণা…পে… ইদপ্পচ্চযতাপটিচ্চসমুপ্পন্নেসু ধম্মেসু পৰৱিতাৰণাতি? ন হেৱং ৱত্তব্বে…পে….

অত্থি অৰহতো পৰৱিতাৰণা, নত্থি তস্স সত্থৰি পৰৱিতাৰণা, ধম্মে পৰৱিতাৰণা…পে… ইদপ্পচ্চযতাপটিচ্চসমুপ্পন্নেসু ধম্মেসু পৰৱিতাৰণাতি? আমন্তা. অত্থি পুথুজ্জনস্স পৰৱিতাৰণা, নত্থি তস্স সত্থৰি পৰৱিতাৰণা, ধম্মে পৰৱিতাৰণা…পে… ইদপ্পচ্চযতাপটিচ্চসমুপ্পন্নেসু ধম্মেসু পৰৱিতাৰণাতি? ন হেৱং ৱত্তব্বে…পে….

৩২৩. অত্থি অৰহতো পৰৱিতাৰণাতি? আমন্তা. ননু অৰহতো ৰাগো পহীনো উচ্ছিন্নমূলো তালাৱত্থুকতো অনভাৱঙ্কতো আযতিং অনুপ্পাদধম্মোতি? আমন্তা. হঞ্চি অৰহতো ৰাগো পহীনো উচ্ছিন্নমূলো তালাৱত্থুকতো অনভাৱঙ্কতো আযতিং অনুপ্পাদধম্মো, নো চ ৱত ৰে ৱত্তব্বে – ‘‘অত্থি অৰহতো পৰৱিতাৰণা’’তি.

অত্থি অৰহতো পৰৱিতাৰণাতি? আমন্তা. ননু অৰহতো দোসো পহীনো…পে… মোহো পহীনো…পে… অনোত্তপ্পং পহীনং উচ্ছিন্নমূলং তালাৱত্থুকতং অনভাৱঙ্কতং আযতিং অনুপ্পাদধম্মং…পে… ৰাগপ্পহানায মগ্গো ভাৱিতো…পে… বোজ্ঝঙ্গা ভাৱিতা…পে… দোসপ্পহানায…পে… অনোত্তপ্পপহানায মগ্গো ভাৱিতো…পে… বোজ্ঝঙ্গা ভাৱিতা…পে… ননু অৰহা ৱীতৰাগো ৱীতদোসো ৱীতমোহো…পে… সচ্ছিকাতব্বং সচ্ছিকতন্তি? আমন্তা. হঞ্চি অৰহা ৱীতৰাগো ৱীতদোসো ৱীতমোহো সচ্ছিকাতব্বং সচ্ছিকতং, নো চ ৱত ৰে ৱত্তব্বে – ‘‘অত্থি অৰহতো পৰৱিতাৰণা’’তি.

৩২৪. অত্থি অৰহতো পৰৱিতাৰণাতি? সধম্মকুসলস্স অৰহতো অত্থি পৰৱিতাৰণা, পৰধম্মকুসলস্স অৰহতো নত্থি পৰৱিতাৰণাতি. সধম্মকুসলস্স অৰহতো অত্থি পৰৱিতাৰণাতি? আমন্তা. পৰধম্মকুসলস্স অৰহতো অত্থি পৰৱিতাৰণাতি? ন হেৱং ৱত্তব্বে…পে….

পৰধম্মকুসলস্স অৰহতো নত্থি পৰৱিতাৰণাতি? আমন্তা. সধম্মকুসলস্স অৰহতো নত্থি পৰৱিতাৰণাতি? ন হেৱং ৱত্তব্বে…পে….

সধম্মকুসলস্স অৰহতো ৰাগো পহীনো, অত্থি তস্স পৰৱিতাৰণাতি? আমন্তা. পৰধম্মকুসলস্স অৰহতো ৰাগো পহীনো, অত্থি তস্স পৰৱিতাৰণাতি? ন হেৱং ৱত্তব্বে.

সধম্মকুসলস্স অৰহতো দোসো পহীনো…পে… মোহো পহীনো…পে… অনোত্তপ্পং পহীনং …পে… ৰাগপ্পহানায মগ্গো ভাৱিতো…পে… বোজ্ঝঙ্গা ভাৱিতা…পে… দোসপ্পহানায…পে… অনোত্তপ্পপহানায মগ্গো ভাৱিতো…পে… বোজ্ঝঙ্গা ভাৱিতা…পে… সধম্মকুসলো অৰহা ৱীতৰাগো ৱীতদোসো ৱীতমোহো…পে… সচ্ছিকাতব্বং সচ্ছিকতং, অত্থি তস্স পৰৱিতাৰণাতি? আমন্তা. পৰধম্মকুসলো অৰহা ৱীতৰাগো ৱীতদোসো ৱীতমোহো…পে… সচ্ছিকাতব্বং সচ্ছিকতং, অত্থি তস্স পৰৱিতাৰণাতি? ন হেৱং ৱত্তব্বে…পে….

পৰধম্মকুসলস্স অৰহতো ৰাগো পহীনো, নত্থি তস্স পৰৱিতাৰণাতি? আমন্তা. সধম্মকুসলস্স অৰহতো ৰাগো পহীনো, নত্থি তস্স পৰৱিতাৰণাতি? ন হেৱং ৱত্তব্বে.

পৰধম্মকুসলস্স অৰহতো দোসো পহীনো, মোহো পহীনো…পে… অনোত্তপ্পং পহীনং…পে… ৰাগপ্পহানায মগ্গো ভাৱিতো…পে… বোজ্ঝঙ্গা ভাৱিতা…পে… দোসপ্পহানায…পে… অনোত্তপ্পপহানায মগ্গো ভাৱিতো…পে… বোজ্ঝঙ্গা ভাৱিতা…পে… পৰধম্মকুসলো অৰহা ৱীতৰাগো ৱীতদোসো ৱীতমোহো…পে… সচ্ছিকাতব্বং সচ্ছিকতং, নত্থি তস্স পৰৱিতাৰণাতি? আমন্তা. সধম্মকুসলো অৰহা ৱীতৰাগো ৱীতদোসো ৱীতমোহো…পে… সচ্ছিকাতব্বং সচ্ছিকতং, নত্থি তস্স পৰৱিতাৰণাতি? ন হেৱং ৱত্তব্বে…পে….

৩২৫. অত্থি অৰহতো পৰৱিতাৰণাতি? আমন্তা. ননু ৱুত্তং ভগৱতা – ‘‘জানতোহং, ভিক্খৱে, পস্সতো আসৱানং খযং ৱদামি, নো অজানতো নো অপস্সতো! কিঞ্চ, ভিক্খৱে, জানতো কিং পস্সতো আসৱানং খযো হোতি? ‘ইতি ৰূপং’…পে… ‘ইতি ৱিঞ্ঞাণস্স অত্থঙ্গমো’তি – এৱং খো, ভিক্খৱে, জানতো এৱং পস্সতো আসৱানং খযো হোতী’’তি. অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘অত্থি অৰহতো পৰৱিতাৰণা’’তি.

অত্থি অৰহতো পৰৱিতাৰণাতি? আমন্তা. ননু ৱুত্তং ভগৱতা – ‘‘জানতোহং, ভিক্খৱে, পস্সতো আসৱানং খযং ৱদামি, নো অজানতো নো অপস্সতো! কিঞ্চ, ভিক্খৱে, জানতো কিং পস্সতো আসৱানং খযো হোতি? ‘ইদং দুক্খ’ন্তি – ভিক্খৱে, জানতো পস্সতো আসৱানং খযো হোতি, ‘অযং দুক্খসমুদযো’তি…পে… ‘অযং দুক্খনিৰোধো’তি…পে… ‘অযং দুক্খনিৰোধগামিনী পটিপদা’তি – জানতো পস্সতো আসৱানং খযো হোতি. এৱং খো, ভিক্খৱে, জানতো এৱং পস্সতো আসৱানং খযো হোতী’’তি. অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘অত্থি অৰহতো পৰৱিতাৰণা’’তি.

অত্থি অৰহতো পৰৱিতাৰণাতি? আমন্তা. ননু ৱুত্তং ভগৱতা – ‘‘সব্বং, ভিক্খৱে, অনভিজানং অপৰিজানং অৱিৰাজযং অপ্পজহং অভব্বো দুক্খক্খযায; সব্বঞ্চ খো, ভিক্খৱে, অভিজানং পৰিজানং ৱিৰাজযং পজহং ভব্বো দুক্খক্খযাযা’’তি! অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘অত্থি অৰহতো পৰৱিতাৰণা’’তি.

অত্থি অৰহতো পৰৱিতাৰণাতি? আমন্তা. ননু ৱুত্তং ভগৱতা – ‘‘সহাৱস্স দস্সনসম্পদায…পে… ছচ্চাভিঠানানি অভব্ব কাতু’’ন্তি. অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘অত্থি অৰহতো পৰৱিতাৰণা’’তি.

অত্থি অৰহতো পৰৱিতাৰণাতি? আমন্তা. ননু ৱুত্তং ভগৱতা – ‘‘যস্মিং, ভিক্খৱে, সমযে অৰিযসাৱকস্স ৱিৰজং ৱীতমলং ধম্মচক্খুং উদপাদি – ‘যং কিঞ্চি সমুদযধম্মং, সব্বং তং নিৰোধধম্ম’ন্তি, সহ দস্সনুপ্পাদা, ভিক্খৱে, অৰিযসাৱকস্স তীণি সংযোজনানি পহীযন্তি – সক্কাযদিট্ঠি, ৱিচিকিচ্ছা, সীলব্বতপৰামাসো’’তি! অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘অত্থি অৰহতো পৰৱিতাৰণা’’তি.

অত্থি অৰহতো পৰৱিতাৰণাতি? আমন্তা. ননু ৱুত্তং ভগৱতা –

‘‘নাহং সহিস্সামি [গমিস্সামি (সী. স্যা. ক.), সমীহামি (পী.)] পমোচনায,

কথঙ্কথিং ধোতক কঞ্চি [কিঞ্চি (ক.)] লোকে;

ধম্মঞ্চ সেট্ঠং অভিজানমানো,

এৱং তুৱং ওঘমিমং তৰেসী’’তি [সু. নি. ১০৭০ সুত্তনিপাতে; চূড়নি. ৩৩ ধোতকমাণৱপুচ্ছানিদ্দেস].

অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘অত্থি অৰহতো পৰৱিতাৰণা’’তি.

ন ৱত্তব্বং – ‘‘অত্থি অৰহতো পৰৱিতাৰণা’’তি? আমন্তা. ননু অৰহতো ইত্থিপুৰিসানং নামগোত্তং পৰে ৱিতাৰেয্যুং, মগ্গামগ্গং পৰে ৱিতাৰেয্যুং, তিণকট্ঠৱনপ্পতীনং নামং পৰে ৱিতাৰেয্যুন্তি? আমন্তা. হঞ্চি অৰহতো ইত্থিপুৰিসানং নামগোত্তং পৰে ৱিতাৰেয্যুং, মগ্গামগ্গং পৰে ৱিতাৰেয্যুং, তিণকট্ঠৱনপ্পতীনং নামং পৰে ৱিতাৰেয্যুং, তেন ৱত ৰে ৱত্তব্বে – ‘‘অত্থি অৰহতো পৰৱিতাৰণা’’তি.

অৰহতো ইত্থিপুৰিসানং নামগোত্তং পৰে ৱিতাৰেয্যুং, মগ্গামগ্গং পৰে ৱিতাৰেয্যুং, তিণকট্ঠৱনপ্পতীনং নামং পৰে ৱিতাৰেয্যুন্তি, অত্থি অৰহতো পৰৱিতাৰণাতি? আমন্তা. অৰহতো সোতাপত্তিফলং ৱা সকদাগামিফলং ৱা অনাগামিফলং ৱা অৰহত্তং ৱা পৰে ৱিতাৰেয্যুন্তি? ন হেৱং ৱত্তব্বে…পে….

পৰৱিতাৰণকথা নিট্ঠিতা.