(১০) ১. পৰূপহাৰকথা

৩০৭. অত্থি অৰহতো অসুচি সুক্কৱিস্সট্ঠীতি? আমন্তা. অত্থি অৰহতো ৰাগো কামৰাগো কামৰাগপৰিযুট্ঠানং কামৰাগসংযোজনং কামোঘো কামযোগো কামচ্ছন্দনীৱৰণন্তি? ন হেৱং ৱত্তব্বে…পে….

নত্থি অৰহতো ৰাগো কামৰাগো কামৰাগপৰিযুট্ঠানং কামৰাগসংযোজনং কামোঘো কামযোগো কামচ্ছন্দনীৱৰণন্তি? আমন্তা. হঞ্চি নত্থি অৰহতো ৰাগো কামৰাগো কামৰাগপৰিযুট্ঠানং কামৰাগসংযোজনং কামোঘো কামযোগো কামচ্ছন্দনীৱৰণং, নো চ ৱত ৰে ৱত্তব্বে – ‘‘অত্থি অৰহতো অসুচি সুক্কৱিস্সট্ঠী’’তি.

অত্থি পুথুজ্জনস্স অসুচি সুক্কৱিস্সট্ঠি, অত্থি তস্স ৰাগো কামৰাগো কামৰাগপৰিযুট্ঠানং কামৰাগসংযোজনং কামোঘো কামযোগো কামচ্ছন্দনীৱৰণন্তি? আমন্তা. অত্থি অৰহতো অসুচি সুক্কৱিস্সট্ঠি, অত্থি তস্স ৰাগো কামৰাগো কামৰাগপৰিযুট্ঠানং…পে… কামচ্ছন্দনীৱৰণন্তি? ন হেৱং ৱত্তব্বে…পে….

অত্থি অৰহতো অসুচি সুক্কৱিস্সট্ঠি, নত্থি তস্স ৰাগো কামৰাগো কামৰাগপৰিযুট্ঠানং…পে… কামচ্ছন্দনীৱৰণন্তি? আমন্তা. অত্থি পুথুজ্জনস্স অসুচি সুক্কৱিস্সট্ঠি, নত্থি তস্স ৰাগো কামৰাগো কামৰাগপৰিযুট্ঠানং…পে… কামচ্ছন্দনীৱৰণন্তি? ন হেৱং ৱত্তব্বে…পে….

অত্থি অৰহতো অসুচি সুক্কৱিস্সট্ঠীতি? আমন্তা. কেনট্ঠেনাতি? হন্দ হি মাৰকাযিকা দেৱতা অৰহতো অসুচিং সুক্কৱিস্সট্ঠিং উপসংহৰন্তীতি.

মাৰকাযিকা দেৱতা অৰহতো অসুচিং সুক্কৱিস্সট্ঠিং উপসংহৰন্তীতি? আমন্তা. অত্থি মাৰকাযিকানং দেৱতানং অসুচি সুক্কৱিস্সট্ঠীতি? ন হেৱং ৱত্তব্বে…পে….

নত্থি মাৰকাযিকানং দেৱতানং অসুচি সুক্কৱিস্সট্ঠীতি? আমন্তা. হঞ্চি নত্থি মাৰকাযিকানং দেৱতানং অসুচি সুক্কৱিস্সট্ঠি, নো চ ৱত ৰে ৱত্তব্বে – ‘‘মাৰকাযিকা দেৱতা অৰহতো অসুচিং সুক্কৱিস্সট্ঠিং উপসংহৰন্তী’’তি.

মাৰকাযিকা দেৱতা অৰহতো অসুচিং সুক্কৱিস্সট্ঠিং উপসংহৰন্তীতি? আমন্তা. মাৰকাযিকা দেৱতা অত্তনো অসুচিং সুক্কৱিস্সট্ঠিং উপসংহৰন্তি, অঞ্ঞেসং অসুচিং সুক্কৱিস্সট্ঠিং উপসংহৰন্তি, তস্স অসুচিং সুক্কৱিস্সট্ঠিং উপসংহৰন্তীতি? ন হেৱং ৱত্তব্বে…পে….

মাৰকাযিকা দেৱতা নেৱ অত্তনো ন অঞ্ঞেসং ন তস্স অসুচিং সুক্কৱিস্সট্ঠিং উপসংহৰন্তীতি? আমন্তা. হঞ্চি মাৰকাযিকা দেৱতা নেৱ অত্তনো ন অঞ্ঞেসং ন তস্স অসুচিং সুক্কৱিস্সট্ঠিং উপসংহৰন্তি, নো চ ৱত ৰে ৱত্তব্বে – ‘‘মাৰকাযিকা দেৱতা অৰহতো অসুচিং সুক্কৱিস্সট্ঠিং উপসংহৰন্তী’’তি.

মাৰকাযিকা দেৱতা অৰহতো অসুচিং সুক্কৱিস্সট্ঠিং উপসংহৰন্তীতি? আমন্তা. লোমকূপেহি উপসংহৰন্তীতি? ন হেৱং ৱত্তব্বে…পে….

৩০৮. মাৰকাযিকা দেৱতা অৰহতো অসুচিং সুক্কৱিস্সট্ঠিং উপসংহৰন্তীতি? আমন্তা. কিং কাৰণাতি? হন্দ হি ৱিমতিং গাহযিস্সামাতি. অত্থি অৰহতো ৱিমতীতি? ন হেৱং ৱত্তব্বে…পে….

অত্থি অৰহতো ৱিমতীতি? আমন্তা. অত্থি অৰহতো সত্থৰি ৱিমতি, ধম্মে ৱিমতি, সঙ্ঘে ৱিমতি, সিক্খায ৱিমতি, পুব্বন্তে ৱিমতি, অপৰন্তে ৱিমতি, পুব্বন্তাপৰন্তে ৱিমতি, ইদপ্পচ্চযতাপটিচ্চসমুপ্পন্নেসু ধম্মেসু ৱিমতীতি? ন হেৱং ৱত্তব্বে…পে….

নত্থি অৰহতো সত্থৰি ৱিমতি, ধম্মে ৱিমতি, সঙ্ঘে ৱিমতি, সিক্খায ৱিমতি, পুব্বন্তে ৱিমতি, অপৰন্তে ৱিমতি, পুব্বন্তাপৰন্তে ৱিমতি, ইদপ্পচ্চযতাপটিচ্চসমুপ্পন্নেসু ধম্মেসু ৱিমতীতি? আমন্তা. হঞ্চি নত্থি অৰহতো সত্থৰি ৱিমতি…পে… ইদপ্পচ্চযতাপটিচ্চসমুপ্পন্নেসু ধম্মেসু ৱিমতি, নো চ ৱত ৰে ৱত্তব্বে – ‘‘অত্থি অৰহতো ৱিমতী’’তি.

অত্থি পুথুজ্জনস্স ৱিমতি, অত্থি তস্স সত্থৰি ৱিমতি…পে… ইদপ্পচ্চযতাপটিচ্চসমুপ্পন্নেসু ধম্মেসু ৱিমতীতি? আমন্তা. অত্থি অৰহতো ৱিমতি, অত্থি তস্স সত্থৰি ৱিমতি…পে… ইদপ্পচ্চযতাপটিচ্চসমুপ্পন্নেসু ধম্মেসু ৱিমতীতি? ন হেৱং ৱত্তব্বে…পে….

অত্থি অৰহতো ৱিমতি, নত্থি তস্স সত্থৰি ৱিমতি…পে… ইদপ্পচ্চযতাপটিচ্চসমুপ্পন্নেসু ধম্মেসু ৱিমতীতি? আমন্তা. অত্থি পুথুজ্জনস্স ৱিমতি, নত্থি তস্স সত্থৰি ৱিমতি…পে… ইদপ্পচ্চযতাপটিচ্চসমুপ্পন্নেসু ধম্মেসু ৱিমতীতি? ন হেৱং ৱত্তব্বে…পে….

অত্থি অৰহতো অসুচি সুক্কৱিস্সট্ঠীতি? আমন্তা. অৰহতো অসুচি সুক্কৱিস্সট্ঠি কিস্স নিস্সন্দোতি? অসিতপীতখাযিতসাযিতস্স নিস্সন্দোতি. অৰহতো অসুচি সুক্কৱিস্সট্ঠি অসিতপীতখাযিতসাযিতস্স নিস্সন্দোতি? আমন্তা. যে কেচি অসন্তি পিৱন্তি খাদন্তি সাযন্তি, সব্বেসংযেৱ অত্থি অসুচি সুক্কৱিস্সট্ঠীতি? ন হেৱং ৱত্তব্বে…পে….

যে কেচি অসন্তি পিৱন্তি খাদন্তি সাযন্তি, সব্বেসংযেৱ অত্থি অসুচি সুক্কৱিস্সট্ঠীতি? আমন্তা. দাৰকা অসন্তি পিৱন্তি খাদন্তি সাযন্তি, অত্থি দাৰকানং অসুচি সুক্কৱিস্সট্ঠীতি? ন হেৱং ৱত্তব্বে.

পণ্ডকা অসন্তি পিৱন্তি খাদন্তি সাযন্তি, অত্থি পণ্ডকানং অসুচি সুক্কৱিস্সট্ঠীতি? ন হেৱং ৱত্তব্বে…পে….

দেৱা অসন্তি পিৱন্তি খাদন্তি সাযন্তি, অত্থি দেৱতানং অসুচি সুক্কৱিস্সট্ঠীতি? ন হেৱং ৱত্তব্বে…পে….

৩০৯. অৰহতো অসুচি সুক্কৱিস্সট্ঠি অসিতপীতখাযিতসাযিতস্স নিস্সন্দোতি? আমন্তা. অত্থি তস্স আসযোতি? ন হেৱং ৱত্তব্বে…পে….

অৰহতো উচ্চাৰপস্সাৱো অসিতপীতখাযিতসাযিতস্স নিস্সন্দো, অত্থি তস্স আসযোতি? আমন্তা. অৰহতো অসুচি সুক্কৱিস্সট্ঠি অসিতপীতখাযিতসাযিতস্স নিস্সন্দো, অত্থি তস্স আসযোতি? ন হেৱং ৱত্তব্বে…পে….

অৰহতো অসুচি সুক্কৱিস্সট্ঠি অসিতপীতখাযিতসাযিতস্স নিস্সন্দো, নত্থি তস্স আসযোতি? আমন্তা. অৰহতো উচ্চাৰপস্সাৱো অসিতপীতখাযিতসাযিতস্স নিস্সন্দো, নত্থি তস্স আসযোতি? ন হেৱং ৱত্তব্বে…পে….

৩১০. অত্থি অৰহতো অসুচি সুক্কৱিস্সট্ঠীতি? আমন্তা. অৰহা মেথুনং ধম্মং পটিসেৱেয্য, মেথুনং উপ্পাদেয্য [মেথুনং ধম্মং উপ্পাদেয্য (সী. স্যা.)], পুত্তসম্বাধসযনং অজ্ঝাৱসেয্য, কাসিকচন্দনং পচ্চনুভৱেয্য, মালাগন্ধৱিলেপনং ধাৰেয্য, জাতৰূপৰজতং সাদিযেয্যাতি? ন হেৱং ৱত্তব্বে.

অত্থি পুথুজ্জনস্স অসুচি সুক্কৱিস্সট্ঠি, পুথুজ্জনো মেথুনং ধম্মং পটিসেৱেয্য, মেথুনং উপ্পাদেয্য, পুত্তসম্বাধসযনং অজ্ঝাৱসেয্য, কাসিকচন্দনং পচ্চনুভৱেয্য, মালাগন্ধৱিলেপনং ধাৰেয্য, জাতৰূপৰজতং সাদিযেয্যাতি? আমন্তা. অত্থি অৰহতো অসুচি সুক্কৱিস্সট্ঠি, অৰহা মেথুনং ধম্মং পটিসেৱেয্য, মেথুনং উপ্পাদেয্য, পুত্তসম্বাধসযনং অজ্ঝাৱসেয্য, কাসিকচন্দনং পচ্চনুভৱেয্য, মালাগন্ধৱিলেপনং ধাৰেয্য, জাতৰূপৰজতং সাদিযেয্যাতি? ন হেৱং ৱত্তব্বে…পে….

অত্থি অৰহতো অসুচি সুক্কৱিস্সট্ঠি, ন চ অৰহা মেথুনং ধম্মং পটিসেৱেয্য, মেথুনং উপ্পাদেয্য, পুত্তসম্বাধসযনং অজ্ঝাৱসেয্য, কাসিকচন্দনং পচ্চনুভৱেয্য, মালাগন্ধৱিলেপনং ধাৰেয্য, জাতৰূপৰজতং সাদিযেয্যাতি? আমন্তা. অত্থি পুথুজ্জনস্স অসুচি সুক্কৱিস্সট্ঠি, ন চ পুথুজ্জনো মেথুনং ধম্মং পটিসেৱেয্য, মেথুনং উপ্পাদেয্য, পুত্তসম্বাধসযনং অজ্ঝাৱসেয্য, কাসিকচন্দনং পচ্চনুভৱেয্য, মালাগন্ধৱিলেপনং ধাৰেয্য, জাতৰূপৰজতং সাদিযেয্যাতি? ন হেৱং ৱত্তব্বে.

অত্থি অৰহতো অসুচি সুক্কৱিস্সট্ঠীতি? আমন্তা. ননু অৰহতো ৰাগো পহীনো উচ্ছিন্নমূলো তালাৱত্থুকতো অনভাৱঙ্কতো আযতিং অনুপ্পাদধম্মোতি? আমন্তা. হঞ্চি অৰহতো ৰাগো পহীনো উচ্ছিন্নমূলো তালাৱত্থুকতো অনভাৱঙ্কতো আযতিং অনুপ্পাদধম্মো, নো চ ৱত ৰে ৱত্তব্বে – ‘‘অত্থি অৰহতো অসুচি সুক্কৱিস্সট্ঠী’’তি.

অত্থি অৰহতো অসুচি সুক্কৱিস্সট্ঠীতি? আমন্তা. ননু অৰহতো দোসো পহীনো…পে… মোহো পহীনো… মানো পহীনো… দিট্ঠি পহীনা… ৱিচিকিচ্ছা পহীনা… থিনং পহীনং… উদ্ধচ্চং পহীনং… অহিৰিকং পহীনং…পে… অনোত্তপ্পং পহীনং উচ্ছিন্নমূলং তালাৱত্থুকতং অনভাৱঙ্কতং আযতিং অনুপ্পাদধম্মন্তি? আমন্তা. হঞ্চি অৰহতো অনোত্তপ্পং পহীনং উচ্ছিন্নমূলং তালাৱত্থুকতং অনভাৱঙ্কতং আযতিং অনুপ্পাদধম্মং, নো চ ৱত ৰে ৱত্তব্বে – ‘‘অত্থি অৰহতো অসুচি সুক্কৱিস্সট্ঠী’’তি.

৩১১. অত্থি অৰহতো অসুচি সুক্কৱিস্সট্ঠীতি? আমন্তা. ননু অৰহতো ৰাগপ্পহানায মগ্গো ভাৱিতোতি? আমন্তা. হঞ্চি অৰহতো ৰাগপ্পহানায মগ্গো ভাৱিতো, নো চ ৱত ৰে ৱত্তব্বে – ‘‘অত্থি অৰহতো অসুচি সুক্কৱিস্সট্ঠী’’তি.

অত্থি অৰহতো অসুচি সুক্কৱিস্সট্ঠীতি? আমন্তা. ননু অৰহতো ৰাগপ্পহানায সতিপট্ঠানা ভাৱিতা…পে… সম্মপ্পধানা ভাৱিতা… ইদ্ধিপাদা ভাৱিতা… ইন্দ্ৰিযা ভাৱিতা… বলা ভাৱিতা…পে… বোজ্ঝঙ্গা ভাৱিতাতি? আমন্তা. হঞ্চি অৰহতো ৰাগপ্পহানায বোজ্ঝঙ্গা ভাৱিতা, নো চ ৱত ৰে ৱত্তব্বে – ‘‘অত্থি অৰহতো অসুচি সুক্কৱিস্সট্ঠী’’তি.

অত্থি অৰহতো অসুচি সুক্কৱিস্সট্ঠীতি? আমন্তা. ননু অৰহতো দোসপ্পহানায…পে… মোহপ্পহানায…পে… অনোত্তপ্পপহানায মগ্গো ভাৱিতো…পে… বোজ্ঝঙ্গা ভাৱিতাতি? আমন্তা. হঞ্চি অৰহতো অনোত্তপ্পপহানায বোজ্ঝঙ্গা ভাৱিতা, নো চ ৱত ৰে ৱত্তব্বে – ‘‘অত্থি অৰহতো অসুচি সুক্কৱিস্সট্ঠী’’তি.

অত্থি অৰহতো অসুচি সুক্কৱিস্সট্ঠীতি? আমন্তা. ননু অৰহা ৱীতৰাগো ৱীতদোসো ৱীতমোহো কতকৰণীযো ওহিতভাৰো অনুপ্পত্তসদত্থো পৰিক্খীণভৱসংযোজনো সম্মদঞ্ঞাৱিমুত্তো উক্খিত্তপলিঘো সঙ্কিণ্ণপৰিখো অব্বূড়্হেসিকো নিৰগ্গড়ো অৰিযো পন্নদ্ধজো পন্নভাৰো ৱিসঞ্ঞুত্তো সুৱিজিতৱিজযো, দুক্খং তস্স পৰিঞ্ঞাতং, সমুদযো পহীনো, নিৰোধো সচ্ছিকতো, মগ্গো ভাৱিতো, অভিঞ্ঞেয্যং অভিঞ্ঞাতং, পৰিঞ্ঞেয্যং পৰিঞ্ঞাতং, পহাতব্বং পহীনং, ভাৱেতব্বং ভাৱিতং, সচ্ছিকাতব্বং সচ্ছিকতন্তি? আমন্তা. হঞ্চি অৰহা ৱীতৰাগো ৱীতদোসো ৱীতমোহো কতকৰণীযো…পে… সচ্ছিকাতব্বং সচ্ছিকতং, নো চ ৱত ৰে ৱত্তব্বে – ‘‘অত্থি অৰহতো অসুচি সুক্কৱিস্সট্ঠী’’তি.

৩১২. অত্থি অৰহতো অসুচি সুক্কৱিস্সট্ঠীতি? সধম্মকুসলস্স অৰহতো অত্থি অসুচি সুক্কৱিস্সট্ঠি, পৰধম্মকুসলস্স অৰহতো নত্থি অসুচি সুক্কৱিস্সট্ঠীতি. সধম্মকুসলস্স অৰহতো অত্থি অসুচি সুক্কৱিস্সট্ঠীতি? আমন্তা. পৰধম্মকুসলস্স অৰহতো অত্থি অসুচি সুক্কৱিস্সট্ঠীতি? ন হেৱং ৱত্তব্বে…পে….

পৰধম্মকুসলস্স অৰহতো নত্থি অসুচি সুক্কৱিস্সট্ঠীতি? আমন্তা. সধম্মকুসলস্স অৰহতো নত্থি অসুচি সুক্কৱিস্সট্ঠীতি? ন হেৱং ৱত্তব্বে…পে….

সধম্মকুসলস্স অৰহতো ৰাগো পহীনো, অত্থি তস্স অসুচি সুক্কৱিস্সট্ঠীতি? আমন্তা. পৰধম্মকুসলস্স অৰহতো ৰাগো পহীনো, অত্থি তস্স অসুচি সুক্কৱিস্সট্ঠীতি? ন হেৱং ৱত্তব্বে…পে….

সধম্মকুসলস্স অৰহতো দোসো পহীনো…পে… মোহো পহীনো…পে… অনোত্তপ্পং পহীনং, অত্থি তস্স অসুচি সুক্কৱিস্সট্ঠীতি? আমন্তা. পৰধম্মকুসলস্স অৰহতো অনোত্তপ্পং পহীনং, অত্থি তস্স অসুচি সুক্কৱিস্সট্ঠীতি? ন হেৱং ৱত্তব্বে…পে….

সধম্মকুসলস্স অৰহতো ৰাগপ্পহানায মগ্গো ভাৱিতো…পে… বোজ্ঝঙ্গা ভাৱিতা…পে… দোসপ্পহানায…পে… মোহপ্পহানায…পে… অনোত্তপ্পপহানায মগ্গো ভাৱিতো…পে… বোজ্ঝঙ্গা ভাৱিতা, অত্থি তস্স অসুচি সুক্কৱিস্সট্ঠীতি? আমন্তা. পৰধম্মকুসলস্স অৰহতো অনোত্তপ্পপহানায বোজ্ঝঙ্গা ভাৱিতা, অত্থি তস্স অসুচি সুক্কৱিস্সট্ঠীতি? ন হেৱং ৱত্তব্বে…পে….

সধম্মকুসলো অৰহা ৱীতৰাগো ৱীতদোসো ৱীতমোহো…পে… সচ্ছিকাতব্বং সচ্ছিকতং, অত্থি তস্স অসুচি সুক্কৱিস্সট্ঠীতি? আমন্তা. পৰধম্মকুসলো অৰহা ৱীতৰাগো ৱীতদোসো ৱীতমোহো…পে… সচ্ছিকাতব্বং সচ্ছিকতং, অত্থি তস্স অসুচি সুক্কৱিস্সট্ঠীতি? ন হেৱং ৱত্তব্বে…পে….

পৰধম্মকুসলস্স অৰহতো ৰাগো পহীনো, নত্থি তস্স অসুচি সুক্কৱিস্সট্ঠীতি? আমন্তা. সধম্মকুসলস্স অৰহতো ৰাগো পহীনো, নত্থি তস্স অসুচি সুক্কৱিস্সট্ঠীতি? ন হেৱং ৱত্তব্বে…পে….

পৰধম্মকুসলস্স অৰহতো দোসো পহীনো…পে… মোহো পহীনো…পে… অনোত্তপ্পং পহীনং, নত্থি তস্স অসুচি সুক্কৱিস্সট্ঠীতি? আমন্তা. সধম্মকুসলস্স অৰহতো অনোত্তপ্পং পহীনং, নত্থি তস্স অসুচি সুক্কৱিস্সট্ঠীতি? ন হেৱং ৱত্তব্বে…পে….

পৰধম্মকুসলস্স অৰহতো ৰাগপ্পহানায মগ্গো ভাৱিতো…পে… বোজ্ঝঙ্গা ভাৱিতা…পে… দোসপ্পহানায…পে… মোহপ্পহানায…পে… অনোত্তপ্পপহানায মগ্গো ভাৱিতো…পে… বোজ্ঝঙ্গা ভাৱিতা, নত্থি তস্স অসুচি সুক্কৱিস্সট্ঠীতি? আমন্তা. সধম্মকুসলস্স অৰহতো অনোত্তপ্পপহানায বোজ্ঝঙ্গা ভাৱিতা, নত্থি তস্স অসুচি সুক্কৱিস্সট্ঠীতি? ন হেৱং ৱত্তব্বে…পে….

পৰধম্মকুসলো অৰহা ৱীতৰাগো ৱীতদোসো ৱীতমোহো…পে… সচ্ছিকাতব্বং সচ্ছিকতং, নত্থি তস্স অসুচি সুক্কৱিস্সট্ঠীতি? আমন্তা. সধম্মকুসলো অৰহা ৱীতৰাগো ৱীতদোসো ৱীতমোহো…পে… সচ্ছিকাতব্বং সচ্ছিকতং, নত্থি তস্স অসুচি সুক্কৱিস্সট্ঠীতি? ন হেৱং ৱত্তব্বে…পে….

৩১৩. অত্থি অৰহতো অসুচি সুক্কৱিস্সট্ঠীতি? আমন্তা. ননু ৱুত্তং ভগৱতা – ‘‘যে তে [যে কেচি (সী.)], ভিক্খৱে, ভিক্খূ পুথুজ্জনা সীলসম্পন্না সতা সম্পজানা নিদ্দং ওক্কমন্তি, তেসং অসুচি ন মুচ্চতি. যেপি তে, ভিক্খৱে, বাহিৰকা ইসযো কামেসু ৱীতৰাগা, তেসম্পি অসুচি ন মুচ্চতি. অট্ঠানমেতং, ভিক্খৱে, অনৱকাসো যং অৰহতো অসুচি মুচ্চেয্যা’’তি [মহাৱ. ৩৫৩ অত্থতো সমানং; অ. নি. ৫.২১০ পস্সিতব্বং]. অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘অত্থি অৰহতো অসুচি সুক্কৱিস্সট্ঠী’’তি.

ন ৱত্তব্বং – ‘‘অত্থি অৰহতো পৰূপহাৰো’’তি? আমন্তা. ননু অৰহতো চীৱৰপিণ্ডপাতসেনাসনগিলানপচ্চযভেসজ্জপৰিক্খাৰং পৰে উপসংহৰেয্যুন্তি? আমন্তা. হঞ্চি অৰহতো চীৱৰপিণ্ডপাতসেনাসনগিলানপচ্চযভেসজ্জপৰিক্খাৰং পৰে উপসংহৰেয্যুং, তেন ৱত ৰে ৱত্তব্বে – ‘‘অত্থি অৰহতো পৰূপহাৰো’’তি.

অৰহতো চীৱৰপিণ্ডপাতসেনাসনগিলানপচ্চযভেসজ্জপৰিক্খাৰং পৰে উপসংহৰেয্যুন্তি, অত্থি অৰহতো পৰূপহাৰোতি? আমন্তা. অৰহতো সোতাপত্তিফলং ৱা সকদাগামিফলং ৱা অনাগামিফলং ৱা অৰহত্তং ৱা পৰে উপসংহৰেয্যুন্তি? ন হেৱং ৱত্তব্বে…পে….

পৰূপহাৰকথা নিট্ঠিতা.