১. পংসুকূলিকঙ্গকথা

২৪. ইদানি একেকস্স সমাদানৱিধানপ্পভেদভেদানিসংসে ৱণ্ণযিস্সাম. পংসুকূলিকঙ্গং তাৱ ‘‘গহপতিদানচীৱৰং পটিক্খিপামি, পংসুকূলিকঙ্গং সমাদিযামী’’তি ইমেসু দ্ৱীসু ৱচনেসু অঞ্ঞতৰেন সমাদিন্নং হোতি. ইদং তাৱেত্থ সমাদানং.

এৱং সমাদিন্নধুতঙ্গেন পন তেন সোসানিকং, পাপণিকং, ৰথিযচোড়ং, সঙ্কাৰচোড়ং, সোত্থিযং, ন্হানচোড়ং, তিত্থচোড়ং, গতপচ্চাগতং, অগ্গিডড্ঢং, গোখাযিতং, উপচিকাখাযিতং, উন্দূৰখাযিতং, অন্তচ্ছিন্নং, দসাচ্ছিন্নং, ধজাহটং, থূপচীৱৰং, সমণচীৱৰং, আভিসেকিকং, ইদ্ধিমযং, পন্থিকং, ৱাতাহটং, দেৱদত্তিযং, সামুদ্দিযন্তিএতেসু অঞ্ঞতৰং চীৱৰং গহেত্ৱা ফালেত্ৱা দুব্বলট্ঠানং পহায থিৰট্ঠানানি ধোৱিত্ৱা চীৱৰং কত্ৱা পোৰাণং গহপতিচীৱৰং অপনেত্ৱা পৰিভুঞ্জিতব্বং.

তত্থ সোসানিকন্তি সুসানে পতিতকং. পাপণিকন্তি আপণদ্ৱাৰে পতিতকং. ৰথিযচোড়ন্তি পুঞ্ঞত্থিকেহি ৱাতপানন্তৰেন ৰথিকায ছড্ডিতচোড়কং. সঙ্কাৰচোড়ন্তি সঙ্কাৰট্ঠানে ছড্ডিতচোড়কং. সোত্থিযন্তি গব্ভমলং পুঞ্ছিত্ৱা ছড্ডিতৱত্থং. তিস্সামচ্চমাতা কিৰ সতগ্ঘনকেন ৱত্থেন গব্ভমলং পুঞ্ছাপেত্ৱা পংসুকূলিকা গণ্হিস্সন্তীতি তালৱেড়িমগ্গে ছড্ডাপেসি. ভিক্খূ জিণ্ণকট্ঠানত্থমেৱ গণ্হন্তি. ন্হানচোড়ন্তি যং ভূতৱেজ্জেহি সসীসং ন্হাপিতা কাড়কণ্ণিচোড়ন্তি ছড্ডেত্ৱা গচ্ছন্তি.

তিত্থচোড়ন্তি ন্হানতিত্থে ছড্ডিতপিলোতিকা. গতপচ্চাগতন্তি যং মনুস্সা সুসানং গন্ত্ৱা পচ্চাগতা ন্হত্ৱা ছড্ডেন্তি. অগ্গিডড্ঢন্তি অগ্গিনা ডড্ঢপ্পদেসং. তঞ্হি মনুস্সা ছড্ডেন্তি. গোখাযিতাদীনি পাকটানেৱ. তাদিসানিপি হি মনুস্সা ছড্ডেন্তি. ধজাহটন্তি নাৱং আৰোহন্তা ধজং বন্ধিত্ৱা আৰূহন্তি. তং তেসং দস্সনাতিক্কমে গহেতুং ৱট্টতি. যম্পি যুদ্ধভূমিযং ধজং বন্ধিত্ৱা ঠপিতং, তং দ্ৱিন্নম্পি সেনানং গতকালে গহেতুং ৱট্টতি.

থূপচীৱৰন্তি ৱম্মিকং পৰিক্খিপিত্ৱা বলিকম্মং কতং. সমণচীৱৰন্তি ভিক্খুসন্তকং. আভিসেকিকন্তি ৰঞ্ঞো অভিসেকট্ঠানে ছড্ডিতচীৱৰং. ইদ্ধিমযন্তি এহিভিক্খুচীৱৰং. পন্থিকন্তি অন্তৰামগ্গে পতিতকং. যং পন সামিকানং সতিসম্মোসেন পতিতং, তং থোকং ৰক্খিত্ৱা গহেতব্বং. ৱাতাহটন্তি ৱাতেন পহৰিত্ৱা দূৰে পাতিতং, তং পন সামিকে অপস্সন্তেন গহেতুং ৱট্টতি. দেৱদত্তিযন্তি অনুৰুদ্ধত্থেৰস্স ৱিয দেৱতাহি দিন্নকং. সামুদ্দিযন্তি সমুদ্দৱীচীহি থলে উস্সাৰিতং.

যং পন সঙ্ঘস্স দেমাতি দিন্নং, চোড়কভিক্খায ৱা চৰমানেহি লদ্ধং, ন তং পংসুকূলং. ভিক্খুদত্তিযেপি যং ৱস্সগ্গেন গাহেত্ৱা ৱা দীযতি, সেনাসনচীৱৰং ৱা হোতি, ন তং পংসুকূলং. নো গাহাপেত্ৱা দিন্নমেৱ পংসুকূলং. তত্ৰপি যং দাযকেহি ভিক্খুস্স পাদমূলে নিক্খিত্তং, তেন পন ভিক্খুনা পংসুকূলিকস্স হত্থে ঠপেত্ৱা দিন্নং, তং একতোসুদ্ধিকং নাম. যং ভিক্খুনো হত্থে ঠপেত্ৱা দিন্নং, তেন পন পাদমূলে ঠপিতং, তম্পি একতোসুদ্ধিকং. যং ভিক্খুনোপি পাদমূলে ঠপিতং, তেনাপি তথেৱ দিন্নং, তং উভতোসুদ্ধিকং. যং হত্থে ঠপেত্ৱা লদ্ধং, হত্থেযেৱ ঠপিতং, তং অনুক্কট্ঠচীৱৰং নাম. ইতি ইমং পংসুকূলভেদং ঞত্ৱা পংসুকূলিকেন চীৱৰং পৰিভুঞ্জিতব্বন্তি ইদমেত্থ ৱিধানং.

অযং পন পভেদো, তযো পংসুকূলিকা উক্কট্ঠো মজ্ঝিমো মুদূতি. তত্থ সোসানিকংযেৱ গণ্হন্তো উক্কট্ঠো হোতি. পব্বজিতা গণ্হিস্সন্তীতি ঠপিতকং গণ্হন্তো মজ্ঝিমো. পাদমূলে ঠপেত্ৱা দিন্নকং গণ্হন্তো মুদূতি.

তেসু যস্স কস্সচি অত্তনো ৰুচিযা গিহিদিন্নকং সাদিতক্খণে ধুতঙ্গং ভিজ্জতি. অযমেত্থ ভেদো.

অযং পনানিসংসো, ‘‘পংসুকূলচীৱৰং নিস্সায পব্বজ্জা’’তি (মহাৱ. ১২৮) ৱচনতো নিস্সযানুৰূপপটিপত্তিসব্ভাৱো, পঠমে অৰিযৱংসে পতিট্ঠানং, আৰক্খদুক্খাভাৱো, অপৰাযত্তৱুত্তিতা, চোৰভযেন অভযতা, পৰিভোগতণ্হায অভাৱো, সমণসাৰুপ্পপৰিক্খাৰতা, ‘‘অপ্পানি চেৱ সুলভানি চ তানি চ অনৱজ্জানী’’তি (অ. নি. ৪.২৭; ইতিৱু. ১০১) ভগৱতা সংৱণ্ণিতপচ্চযতা, পাসাদিকতা, অপ্পিচ্ছতাদীনং ফলনিপ্ফত্তি, সম্মাপটিপত্তিযা অনুব্ৰূহনং, পচ্ছিমায জনতায দিট্ঠানুগতিআপাদনন্তি.

মাৰসেনৱিঘাতায, পংসুকূলধৰো যতি;

সন্নদ্ধকৱচো যুদ্ধে, খত্তিযো ৱিয সোভতি.

পহায কাসিকাদীনি, ৱৰৱত্থানি ধাৰিতং;

যং লোকগৰুনা কো তং, পংসুকূলং ন ধাৰযে.

তস্মা হি অত্তনো ভিক্খু, পটিঞ্ঞং সমনুস্সৰং;

যোগাচাৰানুকূলম্হি, পংসুকূলে ৰতো সিযাতি.

অযং তাৱ পংসুকূলিকঙ্গে সমাদানৱিধানপ্পভেদভেদানিসংসৱণ্ণনা.