২. তেচীৱৰিকঙ্গকথা

২৫. তদনন্তৰং পন তেচীৱৰিকঙ্গং ‘‘চতুত্থকচীৱৰং পটিক্খিপামি, তেচীৱৰিকঙ্গং সমাদিযামী’’তি ইমেসং অঞ্ঞতৰৱচনেন সমাদিন্নং হোতি.

তেন পন তেচীৱৰিকেন চীৱৰদুস্সং লভিত্ৱা যাৱ অফাসুকভাৱেন কাতুং ৱা ন সক্কোতি, ৱিচাৰকং ৱা ন লভতি, সূচিআদীসু ৱাস্স কিঞ্চি ন সম্পজ্জতি, তাৱ নিক্খিপিতব্বং. নিক্খিত্তপচ্চযা দোসো নত্থি. ৰজিতকালতো পন পট্ঠায নিক্খিপিতুং ন ৱট্টতি, ধুতঙ্গচোৰো নাম হোতি. ইদমস্স ৱিধানং.

পভেদতো পন অযম্পি তিৱিধো হোতি. তত্থ উক্কট্ঠেন ৰজনকালে পঠমং অন্তৰৱাসকং ৱা উত্তৰাসঙ্গং ৱা ৰজিত্ৱা তং নিৱাসেত্ৱা ইতৰং ৰজিতব্বং. তং পাৰুপিত্ৱা সঙ্ঘাটি ৰজিতব্বা. সঙ্ঘাটিং পন নিৱাসেতুং ন ৱট্টতি. ইদমস্স গামন্তসেনাসনে ৱত্তং. আৰঞ্ঞকে পন দ্ৱে একতো ধোৱিত্ৱা ৰজিতুং ৱট্টতি. যথা পন কঞ্চি দিস্ৱা সক্কোতি কাসাৱং আকড্ঢিত্ৱা উপৰিকাতুং, এৱং আসন্নে ঠানে নিসীদিতব্বং. মজ্ঝিমস্স ৰজনসালাযং ৰজনকাসাৱং নাম হোতি, তং নিৱাসেত্ৱা ৱা পাৰুপিত্ৱা ৱা ৰজনকম্মং কাতুং ৱট্টতি. মুদুকস্স সভাগভিক্খূনং চীৱৰানি নিৱাসেত্ৱা ৱা পাৰুপিত্ৱা ৱা ৰজনকম্মং কাতুং ৱট্টতি. তত্ৰট্ঠকপচ্চত্থৰণম্পি তস্স ৱট্টতি. পৰিহৰিতুং পন ন ৱট্টতি. সভাগভিক্খূনং চীৱৰম্পি অন্তৰন্তৰা পৰিভুঞ্জিতুং ৱট্টতি. ধুতঙ্গতেচীৱৰিকস্স পন চতুত্থং ৱত্তমানং অংসকাসাৱমেৱ ৱট্টতি. তঞ্চ খো ৱিত্থাৰতো ৱিদত্থি, দীঘতো তিহত্থমেৱ ৱট্টতি.

ইমেসং পন তিণ্ণম্পি চতুত্থকচীৱৰং সাদিতক্খণেযেৱ ধুতঙ্গং ভিজ্জতি. অযমেত্থ ভেদো.

অযং পনানিসংসো, তেচীৱৰিকো ভিক্খু সন্তুট্ঠো হোতি কাযপৰিহাৰিকেন চীৱৰেন. তেনস্স পক্খিনো ৱিয সমাদাযেৱ গমনং, অপ্পসমাৰম্ভতা, ৱত্থসন্নিধিপৰিৱজ্জনং, সল্লহুকৱুত্তিতা, অতিৰেকচীৱৰলোলুপ্পপ্পহানং, কপ্পিযে মত্তকাৰিতায সল্লেখৱুত্তিতা, অপ্পিচ্ছতাদীনং ফলনিপ্ফত্তীতি এৱমাদযো গুণা সম্পজ্জন্তীতি.

অতিৰেকৱত্থতণ্হং, পহায সন্নিধিৱিৱজ্জিতো ধীৰো;

সন্তোসসুখৰসঞ্ঞূ, তিচীৱৰধৰো ভৱতি যোগী.

তস্মা সপত্তচৰণো, পক্খীৱ সচীৱৰোৱ যোগিৱৰো;

সুখমনুৱিচৰিতুকামো, চীৱৰনিযমে ৰতিং কযিৰাতি.

অযং তেচীৱৰিকঙ্গে সমাদানৱিধানপ্পভেদভেদানিসংসৱণ্ণনা.