৬০. আহাৰত্থা

অজ্ঝোহাৰত্থা আধাৰে ক্তো হোতি যথাপত্তঞ্চ. ভুত্তৱন্তো+স্মিন্তি ভুত্তং. এৱং পীতং, ‘‘গাপান+মী’’তি ঈ. ভুঞ্জনং ভুত্তং পানং পীতং. ভুঞ্জীযিত্থাতি ভুত্তো ওদনো. এৱং পীতং উদকং. অকত্তত্থং ভিন্নযোগকৰণং. বহুলাধিকাৰা কত্তৰিপি ‘‘অপিৱিংসূতি পীতা গাৱো’’তি হোতেৱ. সিদ=পাকে, পস্সিজ্জীতি পস্সন্নো, ‘‘গমনত্থ’’ দিনা ক্তো, ‘‘ভিদা’’ দিনা তস্স নো পৰৰূপঞ্চ. অমঞ্ঞিত্থাতি মতো. ইচ্ছীযিত্থাতি ইট্ঠো. অবুজ্ঝিতাতি বুদ্ধো, ‘‘ধো ধহভেহী’’তি তস্স ধো. পূজীযিত্থাতি পূজিতো, চুৰাদিত্তা ণি. এৱং সীলীযিত্থাতি সীলিতো. ৰক্খীযিত্থাতি ৰক্খিতো. খমীযিত্থাতি খন্তো, মস্স নিগ্গহীতং. অক্কোচ্ছীযিত্থাতি অক্কুট্ঠো, আস্স ৰস্সো. ৰুস=ৰোসে, অৰোসীতি ৰুট্ঠো, ‘‘গমনত্থা’’ দিনা কত্তৰি ক্তো. ঞিম্হি ৰুসিতো. হৰ=হৰণে, অভি+ ৱি+আপুব্বো, অভিব্যাহৰীযিত্থাতি অভিব্যাহটো. দয=দানগতিহিংসাদানেসু, অদযীযিত্থাতি দযিতো. হস=আলিক্যে, অহসীতি হট্ঠো. কামীযিত্থাতি কন্তো, ‘‘ণিণাপীনং তেসূ’’তি এত্থ ‘‘ণিণাপীনং’’তি যোগৱিভাগা চুৰাদিণিলোপো. সংযমীতি সংযতো. নঞপুব্বো, ন মৰীতি অমতো, নঞসমাসে নস্স টো.

কট্ঠং দুক্খং আপন্নোতি ফলভূতে দুক্খে কট্ঠসদ্দস্স ৱত্তনতো ফলস্স ভাৱিত্তা ভূতেযেৱ ক্তো. কস=গতিহিংসাৱিলেখনেসু, অকসি=হিংসীতি কট্ঠং.