১৫০. ভিদাদিতো নো ক্ত+ক্তৱন্তূনং

ভিদাদীহি পৰেসং ক্ত+ক্তৱন্তূনং তস্স নো হোতি. আকতিগণো+যং. ‘‘ক্তো ভাৱকম্মেসূ’’তি কম্মে উপৰি সব্বত্থ ক্তো. ভিজ্জিত্থোতি ভিন্নো, তস্স নে পৰৰূপং. অভিন্দীতি ভিন্নৱা, ‘‘কত্তৰি ভূতে’’ চ্চাদিনা ক্তৱন্তু. এৱ+মুপৰিপি. ছিজ্জিত্থাতি ছিন্নো. অছিন্দীতি ছিন্নৱা. ছদ=অপৱাৰণে, ছাদীযিত্থাতি ছন্নো. অছাদযীতি ছন্নৱা, চুৰাদিত্তা ণি, তস্স ‘‘ণিণাপীনং তেসূ’’তি এত্থ ‘‘ণি’’ ইতি যোগৱিভাগা লোপো. খিদ=অসহনে, খিজ্জীতি খিন্নো খিন্নৱা, কত্তৰি. এৱ+মুপৰিপি. উপ্পজ্জীতি উপ্পন্নো উপ্পন্নৱা. সিদ=পাকে, অসিজ্জীতি সিন্নো সিন্নৱা. সদ=ৱিসৰণগত্য ৱসাদনাদানেসু, সিদীতি সন্নো সন্নৱা. পীনীতি পীনো পীনৱা. সূ=পসৱে, সূনীতি সূনো. পসৱীতি সূনৱা. দী=খযে, দীযীতি দীনো দীনৱা. ডী+লী=আকাসগমনে, ডীযীতি ডীনো ডীনৱা. লীযি লেযি অলীযীতি লীনো লীনৱা. অলুযীতি লূনো লূনৱা.