পযোগসিদ্ধি নিগমনং

১. যে নন্ততন্তৰতনাকৰমন্থনেন,

মন্থাচলোল্লসিতঞাণৱৰেন লদ্ধা;

সাৰামতা+তিসুখিতা সুখযন্তি চ+ঞ্ঞে,

তে মে জযন্তি গুৰৱো গুৰৱো গুণেহি.

২. যস্স সাধুগুণুব্ভূত-কিত্তি সব্বত্ত পত্থটা;

মোগ্গল্লানো মহাপঞ্ঞো, জযতী সো হ সব্বদা.

৩. পৰমপ্পিচ্ছতা+নেক-সন্তোসূপসমেসিনং;

সুচিসলেখৱুত্তীনং, সদা+ৰঞ্ঞনিৱাসিনং.

৪. সাসনুজোতকাৰীন+মাচেৰত্ত+মুপাগতং;

উদুম্বৰগিৰীখ্যাতা+যতনং যতিপুঙ্গৱং.

৫. মেধঙ্কৰোতি আখ্যাত-নামধেয্যং তপোধনং;

থেৰং থিৰদযা মেধা-নিধানং সাধু পূজিতং.

৬. সিস্সং সহায+মাগম্ম, কল্যাণমিত্ত+মত্তনো;

সোধেতুং সাসনং সত্থু, পৰক্কম+মকাসি যো.

৭. সঙ্ঘৰক্খিতনামেন, মহাথেৰেন ধীমতা;

নিৱাসভূতেনা+নেক-গুণান+প্পিচ্ছতাদিনং.

৮. মোগ্গল্লানব্যাকৰণ-পযোগক্কমসাধকা;

এত্তাৱতা কতা এসা, পযোগসিদ্ধি নিট্ঠিতা.

৯. তেনেৱ ৰচিতা সাধু, সাসনোদযকাৰিনা;

খুদ্দসিক্খায টীকা চ, তথা সম্বন্ধচিন্তনা.

১০. সুসদ্দসিদ্ধিং যো যোগ-নিচ্ছযং সব্ভি ৱণ্ণিতং;

অকা সুবোধালঙ্কাৰং, তথা সম্বন্ধচিন্তনং.

১১. সত্থসঞ্চিতপুঞ্ঞেন, নিব্বানসাধকং হিতং;

সাধেন্তো লোকনাথস্স, সদ্ধম্মো তিট্ঠতং চিৰন্তি.

ইতি সঙ্ঘৰক্খিতমহাসামিথেৰপাদৱিৰচিতা

পযোগসিদ্ধি নিট্ঠিতা.

(ৱিসেসলক্খণং). যথাৱুত্তানং পন পযোগসিদ্ধিনিগমন গাথানং একাদসন্নং পুব্বেযেৱ ৱক্খমানা ইমা গাথাযো দিস্সন্তি পোৰাণে সীহড়মূলপযোগসিদ্ধিপাঠে. তা চ গাথাযো পচ্ছা সীহড়মূলপযোগসিদ্ধিসংসোধকেন মেধঙ্কৰোতি গৰূহি গহিতনামধেয্যেন থেৰেন পক্খিত্তাতি ৱেদিতব্বা, তস্মা মযং তা গাথাযো সব্বপচ্ছাযেৱ ইমস্মিং-ঠানে ঠপেম. তা পন গাথাযো কতমাতি চে –

১. চাগৱিক্কমসদ্ধানু-সম্পন্নগুণসামিনো;

পৰক্কমনৰিন্দস্স, সীহড়িন্দস্স ধীমতো.

২. অত্ৰজেনা+নুজাতেন, ভূপালকুলকেতুনা;

দিসন্তপত্থটোদাৰ-ৱিক্কমেন যসস্সিনা.

৩. ভুৱনেকভুজৱ্হেন, মহাৰাজেন ধীমতা;

চতুপচ্চযদানেন, সততং সমুপট্ঠিতো.

৪. ‘‘জম্বুদোণী’’তি ৱিখ্যাতা –

ৱাসে নিৱসতো সতো;

সুমঙ্গলমহত্থেৰ –

সামিনো সুচিৱুত্তিনো.

৫. ৱংসে ৱিসুদ্ধে সংজাতো,

পন্থসেনাসনে ৰতো;

পৰিযত্তিমহাসিন্ধু –

নিয্যামকধুৰন্ধৰো.

৫. অপ্পিচ্ছাদিগুণূপেতো, জিনসাসনমামকো;

ৱনেৰতমহত্থেৰো, মেধঙ্কৰসমৱ্হযো.

৬. পাটৱত্থায ভিক্খূনং, ৱিনযে সুৱিসাৰদো;

পযোগসিদ্ধিং সোধযি, সদা সপ্পঞ্ঞগোচৰং.

৭. ইমং লিখিতপুঞ্ঞেন, মেত্তেক্যং উপসংকমি;

পতিট্ঠহিত্ৱা সৰণে, সুপ্পতিট্ঠামি সাসনেতি.

পযোগসিদ্ধিসিদ্ধং.