৬৯. সব্বাদযো ৱুত্তিমত্তেতি

ইত্থিৱাচকা সব্বাদযো ৱুত্তিমত্তে পুমেৱ হোন্তি. এৱং পুব্বুত্তৰা, অপৰদক্খিণা, পচ্ছিমুত্তৰা. পুব্বা চ সা দক্খিণা চেতি ৱা.

৯. ব্যতিহাৰলক্খণো যথা – ‘‘তত্থ গহেত্ৱা তেন পহৰিত্ৱা যুদ্ধে সৰূপং’’তি সুত্তেন সমাসে কতে কেসেসু চ কেসেসু চ গহেত্ৱা যুদ্ধং পৱত্তং কেসাকেসী, দণ্ডেহি চ দণ্ডেহি চ পহৰিত্ৱা যুদ্ধং পৱত্তং দণ্ডাদণ্ডীতি হোতি. এত্থ চ ‘‘চী ৱীতিহাৰে’’তি চীপচ্চযে ‘‘চিস্মিং’’তি আকাৰো, এৱং মুট্ঠামুট্ঠী.

সোভণো গন্ধো সুগন্ধো, সো অস্স অত্থীতি সুগন্ধীহি অত্থিঅত্থে ঈপচ্চযেন সিদ্ধং. যস্মা চ ভদ্দায কাপিলানিযা অপদানে ‘‘পুনো পত্তং গহেত্ৱান, সোধযিত্ৱা সুগন্ধিনা’’তি ৱুত্তং, তস্মা ৱুত্তিযং ইকাৰন্তস্স অভাৱদীপনত্থং ‘‘সুগন্ধি দুগ্গন্ধীতি পযোগা ন দিস্সতী’’তি ৱুত্তং. সুগন্ধিনাতি একৱচনে ৰস্সো.