৯১. য্ৱাদো ন্তুস্স

যোআদীসু ন্তুস্স অ হোতি. গুণৱন্তইতি অকাৰন্তা টা+টেআদেসা হোন্তি, গুণৱন্তা. ‘‘টটাঅং গে’’তি টাদযো, ভো গুণৱ গুণৱা গুণৱং, গুণৱন্তো গুণৱন্তা. ‘‘ন্তস্স চ ট ৱং+সে’’তি অংসেসু ন্তস্স টো ৱা, গুণৱং গুণৱন্তং, গুণৱন্তে. ‘‘তো+তা+তি+তা স+স্মা+স্মিং+নাসূ’’তি তাআদযো হোন্তি, গুণৱতা গুণৱন্তেন, গুণৱন্তেহি গুণৱন্তেভি. ‘‘লক্খণিকপটিপদোত্তেসু পটিপদোত্তস্সেৱ গহণং, ন লক্খণিকস্সা’’তি ঞাযা ‘‘ন লক্খণিকস্সা’’তি ৱুত্তব্যত্তিপক্খ+মনপেক্খিত্ৱা ‘‘অতো’’তি ৰস্সাকাৰজাতিযা পেক্খিতত্তা গুণৱন্তেনাতি ‘‘অতেনা’’ ত্য+নেন সিজ্ঝতি. জাতি=সামঞ্ঞং, ব্যত্তি=ৱিসেসো. গুণৱতো গুণৱস্স গুণৱন্তস্স, ‘‘তং নংম্হি’’তি নংম্হী তং ৱা, গুণৱতং গুণৱন্তানং. গুণৱতা গুণৱন্তা গুণৱন্তম্হা গুণৱন্তস্মা. গুণৱতি গুণৱন্তে গুণৱন্তম্হি গুণৱন্তস্মিং, গুণৱন্তেসু. ‘‘ন্তস্স চ ট ৱা’’তি যোগৱিভাগা যোসু চ ন্তুস্স ৱা টাদেসে কতে যোস্স টা, ‘‘চক্খুমা অন্ধিতা হোন্তি’’, ‘‘ৱগ্গুমুদাতীৰিযা ভিক্খু ৱণ্ণৱা’’ ইচ্চাদী হোন্তি.

এৱং গণৱা কুলৱা ফলৱা যসৱা ধনৱা সুতৱা ভগৱা হিমৱা বলৱা সীলৱা পঞ্ঞৱা ইচ্চাদী.