৩. নামে

পটিজানিস্সন্তীতি ৱত্তমানে অনাগতৱচনং, পটিজানন্তীতি অত্থো. ইতৰম্পন ভূতে ভৱিস্সতীতি আসি, কৰিস্সতীতি অকৰি, চেতে স্সসীতি চেতিতা অসি, ভুঞ্জিস্সসীতি ভুঞ্জিতা অসি. অনোকপ্পনা অস্সদ্ধা. অমৰিসনং অক্খমা. ইমিনাৱাতি অত্থিৱচনে উপপদে কোধা সদ্ধাসু গম্মমানেস্ৱ-সতীপি ৱচনন্তৰে ইমিনাৱ সামঞ্ঞৱচনেন সিদ্ধন্তি অত্থো. গৰহাৱমাতি তস্স হেতুৱচনং. তথাহিচ্চাদিনা গৰহাৱগমমেৱ সমত্থেতি. অত্থিনাম ঈদিসন্তি [অত্থিনামাতি (পোত্থকে)] আভিদোসিকস্স কুম্মাসস্স পৰিভুঞ্জনং ৱিজ্জতে নামাতি অত্থো. ৱিজ্জমানম্পি তং অসদ্দহন্তো অমৰিসন্তো এৱং ৱদতি. নত্থীতি মঞ্ঞেতি অধিপ্পাযো, তেনাহ- ‘পচ্চক্খমপী’তি [ঈদিসম্পীতি] আদি. যোপীতি সদ্দস্স সোপীতি তসদ্দেন সম্বন্ধো ৱেদিতব্বো. অত্থীতি ৱিজ্জমানত্থেতি ৱুত্তৱিজ্জমানত্থো ৱক্খমানপক্খত্তযেপি দট্ঠব্বো.

ননু অত্থিনাম তাতাতি এত্তকে ৱুত্তে পঠমো অত্থিনুখোচ্চাদিকো নিসীদিত্ৱাতি সদ্দপৰিযন্তো চ, দুতিযো অত্থিনুখোচ্চাদিকো নিসীদিত্ৱাতি সদ্দপৰিযন্তো চ ততিযো অত্থিমঞ্ঞেচ্চাদিকো জিগুচ্ছনেয্যন্তি সদ্দপৰিযন্তো চ ৱচনপ্পবন্ধো কথং লব্ভতীতি মনসি নিধাযাহ- ‘সোপনা’তিআদি. ইমিনাতি ‘অত্থিযেৱিহাপি নিন্দাৱগমো’তি ৱচনেন. ঠানভোজনে গৰহতীতি সম্বন্ধো. ৱুত্তং সক্কতানুসাৰেন. নিস্সাযনিস্সাযাতি যত্থ ভগৱা নিসিন্নো তং ঠানং নিস্সায নিস্সায.