১২৮. অত্যা

ৱুত্তিযং এতস্মিং ৱিসযেতি এত্থ এতস্মিন্তি ত্যাদিন্তৱজ্জিতপচ্চয ৱিসযেতি অত্থো. ৱিঞ্ঞাযমানত্তা ঞাপিতো হোতীতি গম্যতে. ন ঞাপকতোতি ইমিনা ইদং দস্সেতি ‘‘কিঞ্চি ৱচনানুসাৰতো ৱিঞ্ঞাযমানতামত্তেন ঞাপীযতে কিঞ্চি ঞাপকেন, অস্মিম্পক্খে ৱুত্তানুসাৰতো কত্থচি কস্সচি ধাতুনো অপ্পযোগো ৱিঞ্ঞাপীযতী’’তি. পক্খন্তৰমাহ- ‘ঞাপকত্তাযেৱ ৱা’তিআদি. সমত্থেতি তথাহিচ্চাদিনা. অসস্সাপ্পযোগোতি অসধাতুস্স কিস্মিঞ্চি তব্বাদিকে পচ্চযে পৰে ভৱিতব্বন্তিআদীনমপ্পযোগোতি অত্থো.

ৱিনাপি সুত্তন্তি ‘‘অত্যাদী’’তিআদিকং সুত্তং ৱিনাপি. এৱং মঞ্ঞতে ‘‘অসস্স ভূআদেসেন সাধীযমানং সব্বমিট্ঠং বহুলাধিকাৰতো ভূধাতুনাৱ সিজ্ঝতি ৱিনাপি ভূআদেসসুত্তন্তৰন্তি কত্থচি কস্সচি অপ্পযোগস্স ঞাপকত্তম্পিস্স যুজ্জতি অঞ্ঞত্থ কৰীযমানমিহাপি অত্থৱন্তং সিযা’’তি.

যেতি ধাতুপ্পযোগা যস্মিন্তি ৱিসযে, পাতিস্সাতি ‘পা-ৰক্খণে’তীমস্স, নপ্পযোগো পাযযতি পাযযিতব্বন্তিআদিপ্পযোগো ন হোতীতি. এৱমুপৰিপি যথাযোগং ঞেয্যং. ব্ৰূস্সাতি ‘ব্ৰূ=ৱচনে’ইচ্চস্স. অদিস্সাতি ‘অদ-ভক্খণে’ইচ্চস্স. ঈআদীতি ভূতে ঈআদি. এতিস্স চ ঈআদীসূতি সম্বন্ধো.

অৱবোধে এতিস্স ণিসেসু চ ঈআদীসু চ, অজ্ঝেনে এতিস্স পৰোক্খাসু চ ণিসেসু চ ঈআদীসুচাতি যোজেতব্বং. সব্বত্থ নপ্পযোগোতি যোজেত্ৱা অত্থো ৱেদিতব্বো. বহুলংৱিধানতো ঞাতব্বাতি যোজনা. যক্ৱিকৰণেন নিদ্দেসা ‘অস-ক্খেপনেতী মস্সা’তি ৱুত্তং, তদাহ- ‘অসস্সা’তিআদি.