৫৭. কিম্হা

সমুদাযো নাম দ্ৱ্যৱযৱো ৱা সিযা বহুকাৱযৱো ৱা, তত্থ দ্ৱ্যৱযৱসমুদাযা নিদ্ধাৰণে সামত্থিযা একস্সেৱ নিদ্ধাৰণং ৱিঞ্ঞাযতি তমেৱানুসৰতি. বহুকাৱযৱসমুদাযাপ্যে ‘কস্স নিদ্ধাৰণে’তি সুত্তে একস্সাতি ৱচনাভাৱেপি একস্সেৱ নিদ্ধাৰণং ৱিঞ্ঞাতব্বং তেনেৱ কতৰো ভৱতং দেৱদত্তো’ত্যাদিকমুদাহৰণমদাসি. কতৰো ভৱতং দেৱদত্তো কতৰো ভৱতং কঠোত্যাদ্যুদাহৰণবহুত্তেন নিদ্ধাৰণৱাচীনমবহুত্থেপি নিদ্ধাৰিযমানৱাচীহী’তি বহুত্তেন ৱুত্তং. অপচ্চপৰংপৰায পৱত্তং গোত্তং ৱংসো, তদভি ধাযিনো অপচ্চপ্পচ্চযন্তাপি অভেদোপচাৰেন গোত্তং, তেৱাপচ্চা পচ্চৱন্তসম্বন্ধদ্ৱাৰেনাপচ্চে পৱত্তাতি সম্বন্ধিসদ্দা ভৱন্তি, চৰণসদ্দা চ কঠা যো কিৰিযাসদ্দা ভৱন্তি কঠাদীহি ৱুত্তজ্ঝযনত্থং যথা সকংৱতচৰণকিৰিযানিমিত্তত্তেনাজ্ঝেতূসু পৱত্তাতি তেসং সম্বন্ধিসদ্দানং কেসঞ্চি অত্থস্স কিৰিযাসদ্দানং চাত্থস্স অসত্যপি জাতিত্তে জাতিনিবন্ধনং লোকে কাৰিযমিট্ঠং তদুত্তং ‘‘গোত্তঞ্চ চৰ- ণেহি সহা’’তি. তত্থাপি জাতিত্তম্পৰিভাসিতং, তেনাহ- ‘কঠস্স চৰণত্তা জাতিত্তং গোতত্তা জাতিত্ত’ন্তি চ.