৫১. তস্স

ননু চ সঙ্খ্যাসদ্দো সঙ্খ্যানে সঙ্খ্যেয্যে চ ৱত্ততে, কথমেত্থ সঙ্খ্যানেৱসিতা ৱুত্তি যেনেৱং ৱিৱৰণং কতমিচ্চাহ- ‘যদিপি’চ্চাদি, পচ্চাসন্নং সঙ্খ্যাসদ্দস্সাতি অধিপ্পাযো. ইমিনা চ কৰণসাধনো-যং পূৰণসদ্দোতি ৱিঞ্ঞাপেতি. যতোতি ৱুত্তযং সদ্দসম্বন্ধিনা তংসদ্দেন সেতি উল্লিঙ্গিতস্স সঙ্খ্যাতিঅত্থমুপদস্সিয সাযেৱ পূৰীযতেতীমস্স কম্মভাৱেন তিট্ঠতীতি দস্সেতুং তেন পূৰণেন পূৰীযতে’তি আহ.

সম্পজ্জতেতি পূৰীযতেত্যস্সত্থমাচিক্খতি. অনেনেতং দস্সেতি ‘‘(ন) ঘটিকাদীনমিৱ দব্বানং দব্বন্তৰে নাতিৰিত্তীকৰণং সঙ্খ্যায পূৰণং কিঞ্চৰহি তস্স সমপ্পত্তিযেৱা’’তি. অথ কাযং ৱচোযুত্তি ‘সাসঙ্খ্যা পূৰীযতে যেনে’তি, যাৱতা সাতি যস্মা পচ্চযো ৱিহিতো তস্স সঙ্খ্যাসদ্দস্স পৰামাসো তস্স চ পূৰণেন অভেদোচ্চাসঙ্কিযাহ- ‘অভেদেনোচ্চতে সঙ্খ্যা পূৰীযতে যেনেতী’তি অভিধানাভিধেয্যানমভেদোপচাৰেন ৱুচ্চতীত্যত্থো, সঙ্খ্যেয্যপূৰণে ডো ন হোতীতি ৱত্ৱা তদত্থং ৱিভাৱেতুমাহ- ‘দ্ৱাদসন্ন’মিচ্চাদি. সো ঘটো তাসং ঘটিকানং পূৰণো দব্বানং দব্বন্তৰে নাতি ৰিত্তীকৰণৱসেন. ৱীসতিযা পূৰণোতিআদিনা ৱিগ্গহো.