১২৫. সংযো

অন্তৰসদ্দো-নেকত্থোপীহান্তৰাড়ৱাচী মজ্ঝৱাচী গয্হতি, ন ৱিজ্জতেন্তৰমেসন্তি অন্তৰাড়মত্তপটিসেধেপযোজনং নত্থীতি কত্ৱান্তৰা ড়ট্ঠস্সাভাৱান্তৰাড়ং নত্থীত্যুপচৰীযতি, এৱঞ্হি লোকে পযুজ্জতে ‘অনন্তৰা ইমে গামা অনন্তৰা ইমে পাসাদা’তি অন্তৰাড়গতস্স ঞ্ঞস্স গামস্সঞ্ঞস্স পাসাদস্স ৱাভাৱা তথা ব্যপদিসীযতে, তথেৱমিহাপ্যন্তৰাড়গতস্সঞ্ঞস্স ব্যঞ্জনস্সাভাৱা অনন্তৰা ইত্যুচ্চন্তে, অথৱান্তৰসদ্দো ব্যৱধানৱাচী ব্যৱধানাভাৱতো-নন্তৰা ইতি ৱুচ্চন্তে. অন্তৰং কৰোতীতি ৱা খাদিইপ্পচ্চযং [ণিপ্পচ্চযং (পোত্থকে)] ৱিধায অন্তৰাযতি ব্যৱধানং কৰোতীতি কত্তৰি অপ্পচ্চযং ৱিধায অন্তৰো ব্যৱধাযকো নত্থেতেসন্তি অনন্তৰা. যথা ‘ৰুক্খা ৱনন্তে’ত্থ ৰুক্খা সমুদিতাৱেকৱনব্যপদেসং লভন্তে, তথাত্ৰাপি ব্যঞ্জনা সমুদিতাৱেতে সংযোগব্যপদেসগোচৰত্তং পটিপজ্জন্তে.

সংযোগোতি হি সমুদাযপ্পধানো নিদ্দেসো ব্যঞ্জনাত্যৱযৱপ্পধানো, তস্মা ব্যঞ্জনাতি বহুৱচনেন সংযোগোতি একৱচননিদ্দেসো ঘটতে, ননু চ ৱণ্ণানমুচ্চাৰিতপ্পধংসিত্তা যোগপজ্জমট্ঠিতমানানং ন সম্ভৱতি সমুদাযত্তন্তি সমুদাযত্তমযুত্তন্তি নাযুত্তং, তথাহি উত্তৰুত্তৰগ্গাহিনি বুদ্ধি পুব্বপৰীভূতে ব্যঞ্জনাৱযৱে সমুদাযৰূপেন সঙ্কপ্পেন্তী সমুদাযৱোহাৰম্পৱত্তযীতি.

ণানুবন্ধেতি দিতিসদ্দস্স সংযোগাৱিসযত্তা দেচ্চোতি ‘সৰানমাদিস্সা’তি ৱিসযো, উড়ুম্পসদ্দস্স সংযোগৱিসযত্তা ওড়ুম্পিকোতি এতস্স ৱিসযোতি তত্থ ৰাঘৱো ৱেনতেয্যো মেনিকো দেচ্চো দোসগ্গান্তি ৰূপানি. ইধ তু ওড়ুম্পিকো কোণ্ডঞ্ঞোতি যুজ্জন্তি. তেনেৱ চ তত্থ পঞ্চিকা এত্থ, এত্থ চ পঞ্চিকা তত্থ উপনেতব্বাতি.