৩৫. ছট্ঠী

সামিস্সৰাদিযোগে ছট্ঠীসত্তমিযো যথা সিযুন্তি ‘‘সামিস্সৰাধিপতিদাযাদসক্খিপতিভূপসুতেহি চ ‘‘ইতি (২-৩-৩৯) আৰদ্ধং পৰেহি, তদাহ-‘সামি’চ্চাদি, অত্ৰ চ জিনিন্দবুদ্ধিনা ‘‘সাম্যাদীনং ভেদেনো পাদানং পৰিযাযন্তৰনিৱত্যত্থমিহ মা হোতু গামস্স ৰাজা’’তি ৱুত্তং ৱাক্যমুপন্যস্য হস্সাপ্য যুত্তত্তমুপদস্সযমাহ-‘সামিস্সৰে’চ্চাদি, কেন নিৱাৰীযতে, ন কেনাপীত্যত্থো, ৱিসযৱচনিচ্ছাযং ‘গামে ৰাজা’ত্যপি ভৱিতব্বমিত্যনেনাহ, ‘‘আযুত্তকুসলেহ্যাসেৱায’’মীতি (২-৩-৪০) আৰদ্ধং, তদাহ-‘আযুত্তে’চ্চাদি, আসৱা তপ্পৰতা, ব্যাৱটো নিযুত্তো, তত্থেদং সিযা ‘‘আসেৱাযন্তি ৱক্খামী ত্যৱস্সং ৱচনমিদমাৰব্ভনীযমঞ্ঞথা ঈসংযুত্তেপি ‘আযুত্তো গো সকটস্সা’তি পসজ্জতী’’ত্যাসঙ্কিয নত্থেৱেতম্পি পযোজনন্তি দস্সেতুমাহ-‘ৱিনাপি’চ্চাদি, ‘‘সামিস্সৰা’’ত্যদিকং কচ্চাযনসুত্তং, তেনেৱাতি কচ্চাযনসুত্তে পসূতসদ্দানন্তৰং কুসলসদ্দনিদ্দেসেনেৱ, ইধাতি মোগ্গল্লানৱুত্তিযং. কচ্চাযনেন ‘‘কম্মকৰণ নিমিত্তত্থেসু সত্তমী’’ (২-৬-৪০) ‘‘পঞ্চম্যত্থে চ’’ (২-৬-৪১) ইতি চ সুত্তিতং, তেনাহ-‘কম্মে’চ্চাদি, গহণস্স বাহা ৱিসযোতি সম্বন্ধো, কচ্চাযনানং‘ভিক্খূসূ’তিআদীনি কম্মত্থে উদাহৰণানি, হত্থেসূতিআদীনি কৰণত্থে, কদলীসূতি পঞ্চম্যত্থে. ‘‘মণ্ডিতুস্সুক্কেসু ততিযা চে’’তি (২-৬-৪৫) কচ্চাযনসুত্তং, তদাহ ‘পসন্নত্থে’চ্চাদি, পসন্নত্থেতি মণ্ডিতত্থে, উস্সুক্কত্থেতি উস্সাহত্থে.