কাযপচ্চৱেক্খণা

১. নাদিকাল ৱিপৰিত, জন ভূতত্থ দস্সিনো;

দাতুমে কন্তিকস্সাদং, সত্থু পাদো তিমানিতো.

২. সীসে পিলন্দিযা মোদী, সম্বুদ্ধ চৰণ ম্বুজং;

সাধু তুট্ঠিকৰং ব্ৰূমি, সুকায পচ্চৱেক্খণং.

৩. যোনিসো মনসীকত্ৱা, নাদা ৱিৰুদ্ধ মঞ্ঞিতং;

সাধৱো ত মুদিক্খন্তু, মযাপি মন্দবুদ্ধিনো.

৪. ইচ্ছিতব্বান মাযত্তা, তেসঞ্চ চযভাৱতো;

তদাকাৰেন ৱত্তিতা, কাযো জেগুচ্ছ পুঞ্জকো.

৫. পুনপ্পুনংৱ ওক্কম, ঞাণ মন্তো পৱেসিয;

বাহিৰংৱ অনালম্ব, ইক্খণা পচ্চৱেক্খণা.

৬. মংসচ্ছন্ন ট্ঠিৰূপেৱ, মনোজ ৱাযু চালিতে;

নাৰী গতাতি যাচিন্তা, নেৱ সাপচ্চৱেক্খণা.

৭. সঞ্ঞাদিট্ঠিচ চিত্তঞ্চ, ৱিপল্লাসা ইমেতযো;

ত দাকাৰেন ৱত্তন্তি, অৱিজ্জো ত্থৰিতা ভুসং.

৮. আসা ৱিপৰিতে যেসং,

ৱিপল্লাসাতি তেমতা;

আসা আসিসনা ৱুত্তা,

তণ্হাযেৱ সভাৱতো.

৯. অসুভেৱ সুভমিতি, অনিচ্চেএৱ নিচ্চতো;

দুক্খেযেৱ সুখংৱাতি, অনত্তনিৱ অত্ততো.

১০. সঞ্ঞাণং দস্সনং চিন্তা,

দ্ৱাদসা কাৰতো তযো;

দিট্ঠিসা চাদি মগ্গেন,

সেসা সেসেহি ৱজ্ঝিতা.

১১. তণ্হা তস্সি মমেতন্তি, মানো মঞ্ঞি অহন্তিচ;

যস্সি দিট্ঠিচ অত্তাতি, পপঞ্চা নামিমে তযো.

১২. পপঞ্চন্তি সংসাৰং, তস্মা পপঞ্চনামকা;

ভৱযন্তে পযোজেন্তা, মোক্খং নাদংসু তে চিৰং.

১৩. ভৱপঙ্কে নি মুজ্জন্তা, পপঞ্চানং ৱসানুগা;

চিৰস্সং দুক্খিতা হোন্তি, আৰা নিব্বানতো তিৱ.

১৪. নমে নাহং নঅত্তাতি, এতেহি ৱিৱদং কৰে;

ভণ্ডন্তা ৱিৱদন্তা তে, নিব্বানতো অদূৰিনো.

১৫. ৱিপল্লাসে পপঞ্চেচ, দ্ৱেপিএতে পহাতৱে;

সোপচ্চৱেক্খিতব্বে ৱং, কাযো জেগুচ্ছপুঞ্জকো.

১৬. কেসা লোমা নখাদন্তা,

তণ্হাযাপিচ গোচৰা;

তস্মা তে দট্ঠুকামেন,

তণ্হা নিৱাৰিতা সদা.

১৭. লগ্গিকা ছৱিযংযেৱ, তণ্হা বাহিৰগোচৰা;

তস্মা এত্থ তচোৱাহ, সম্বুদ্ধো ন বহিচ্ছৱিং.

১৮. এসা তচপৰিযন্ত, পদেনাপি নিৱাৰিতা;

অতো ছৱি মনালম্ব, তচসীৱ মনেকৰে.

১৯. জিগুচ্ছিতানি ছাদেতি, অট্ঠি মংস তচাদিনি;

ঞাণেন ছিন্দি তব্বাচ, তস্মা ছৱীতি ৱুচ্চতি.

২০. ছৱিং ছেত্ৱা তচং পস্সে,

তং ছেত্ৱা মংসকাদযো;

গব্ভেৱত্থূনি দীপেন,

যথা পঞ্ঞাপদীপিকো.

২১. জেগুচ্ছো ছৱিযা কাযো,

অসুভোৱ সুভাযতে;

নিচ্ছৱা তচমত্তেন,

কথং সুভাযতে অযং.

২২. ন্হাৰুবন্ধো ট্ঠিসঙ্ঘাতো, মংসলোহি ত লিম্পিতো;

ছৱিযাৱ ৱিমোহেতি, তচচ্ছন্নো ইমং পজং.

২৩. ৱণ্ণ সণ্ঠান তোচেৱ,

গন্ধো কাসা সযেহিচ;

জেগুচ্ছা পটিকুল্যাচ,

কেসানাম ন মেপিযা.

২৪. একেকং মনসীকত্ৱা, নযে নিচ্চেৱ মাদিনা;

ভাৱেতব্বা সমাৰম্ভ, যথাপঞ্ঞাযতে তথা.

২৫. পূৰিতং মত্থলুঙ্গস্স, সীসট্ঠিপি জিগুচ্ছিতং;

মুখ নাসক্খি কণ্ণাদি, ছিদ্দা ৱছিদ্দ দুদ্দসং.

২৬. পূতি ৱাযু ৱিচৰিত, কুচ্ছিট্ঠন্তানি লোহিতং;

পিত্তং সেম্হঞ্চ পপ্ফাসং, হদযং যকনম্পি ধী.

২৭. অন্ন পানং মনুঞ্ঞম্পি, খেড় তিন্ত মধোপৰি;

দন্তেহি পিসিতং স্ৱান, ৱমথূৱ জিগুচ্ছিতং.

২৮. যাৱতাযু অধোতেৱা, মাসযে গিলিতং ঠিতং;

কিমিকূল সমাকিণ্ণে, তহিমেৱা সিতাসিতং.

২৯. এতং উদৰিযং নাম, তম্হা পক্কাসযং গতং;

দিনচ্চযে কৰীসন্তং, সা সযং তংদ্ৱযম্পি ধী.

৩০. পকাসেত্ৱা পৱেসেতি, অন্নপানং মহাৰহং;

পটিচ্ছন্নো নিহৰতি, তমেৱ ন্তো ঠিতং জনো.

৩১. পৱেসে তং পৰিৱতো,

নিহৰেকো ৰহো লিনো;

মনুঞ্ঞংৱ পৱীসন্তে,

নিক্খমন্তে জিগুচ্ছিতং.

৩২. জেগুচ্ছ পটিকুল্যানি, মংসন্হাৰু তচট্ঠিনি;

নপিযানি ন তুট্ঠানি, নেৱইত্থী নপূপিসো.

৩৩. হত্থ পাদ মুখাদীনি,

নত্থঞ্ঞানি জিগুচ্ছিতা;

তত্থা কুমাৰিকা কঞ্ঞা,

মোহেন অত্থিসঞ্ঞিতা.

৩৪. পচ্চেকং ৱিনিভুত্তেস, কেস লোম নখাদিসু;

নত্থিকঞ্ঞা কুমাৰীৱা, সম্পিণ্ডিতেসু সা কুতো.

৩৫. আকাসোযেৱ কাযাঙ্খ্যো,

তচাদি পৰিৱাৰিতো;

তথাসীসং মুখংহত্থো,

পাদোৰু কটিআদযো.

৩৬. থম্ভাদীস্ৱিৱ গেহোতি,

পিণ্ডিতে স্ৱেসু সম্মুতি;

কাযোতি ইত্থিপোসোতি,

সংমুড়্হো তাযৰজ্জতি.

৩৭. সন্তং চিন্তেয্য নাসন্তং, সন্তং চিন্তযতো সুখং;

অসন্তং অনুচিন্তেন্তো, নানাদুক্খেহি তপ্পতি.

৩৮. জৱত্যা ৱিজ্জমানেৱ, নাৱিজ্জা ৱিজ্জমানকে;

তস্মাতংনামকো মোহো, তণ্হাপিচ তদন্ৱিতা.

৩৯. পুংকাযোৱাথীকাযোৱা, মলাসুচিজিগুচ্ছিতো;

তস্সমং নত্থিগাৰয্হং, য্ৱামলম্পি মলংকৰে.

৪০. নত্থি কাযসমোৱেৰী,

মহানত্থকৰো চীৰং;

নত্থি কাযসমো ৱঞ্চো,

অসুভোৱ সুভাযতে.

৪১. থীপুং সপৰকাযোতি, পস্সতিপি নপস্সতি;

জেগুচ্ছ পটিকুল্যোতি, সম্মা পস্সতি পস্সতি.

৪২. সুভোসুভোতি মঞ্ঞন্তা,

ধীতি ধীতি জিনেৰিতে;

লোকালোকা নধীযেসং,

ভৱা ভৱা ৱচাৰিনো.

৪৩. ভিয্যোভিয্যোৱ ৰাগগ্গি,

সুভোসুভোতিপস্সতো;

মন্দোমন্দোৱ সোঅগ্গি,

ধীৱধীৱৱিপস্সতো.

৪৪. বহুস্সুতোপি বালোৱ, অসুভে সুভমঞ্ঞকো;

অসুভোতি ৱিপস্সন্তো, অপ্পস্সুতোপিপণ্ডিতো.

৪৫. যোচ সিপ্পানি জানেয্য, সতানি সহস্সানিপি;

কাযেকজাননং সেয্যো, যঞ্চে অঞ্ঞ ৱিজানংনং.

৪৬. কাযমেকম্পি নঞ্ঞামি, বুদ্ধালদ্ধনযো অপি;

সুতাচ পণ্ডিতাত্যম্হা, যুত্তোযেৱা তিলজ্জিতুং.

৪৭. সুভতোযেৱ মঞ্ঞামি, এৱং জিগুচ্ছিতম্পিনং;

মঞ্চ ঞে পণ্ডিতো ত্যাহু, অলমেৱাতিলজ্জিতুং.

৪৮. কাযে অসুভসঞ্ঞংযো, নলভামি কদাচিপি;

সুলদ্ধ সুগতো ৱাদো, স্ৱাৰহোৱাতিলজ্জিতুং.

৪৯. কাযেন সংসৰন্তোপি, তদাকাৰং যথাতথং;

ভৱেভৱে অজানন্তো, মমাযিত্ৱাৱ তং চজিং.

৫০. কাযেন সংসৰন্তোপি, নঞ্ঞা কায জিগুচ্চতং;

নিচ্চুপাদা মমাযন্তো, পিযাযিত্ৱাৱ তং চজিং.

৫১. কুভাৰং সাৰসঞ্ঞায, পিযাযিত্ৱাৱ হিংসকং;

অনন্তদুক্খ মাপাদিং, ৱিপল্লাসো ভৱেভৱে.

৫২. মহাজানীয পত্তোতি, সংৱেজেত্ৱা সকংমনং;

দিৰোকত জিনোৱাদো, অনিৱত্তিত ৱীৰিযো.

৫৩. অদিট্ঠপুব্ব মেতস্স, তথাকাৰংৱ পস্সতু;

কিচ্চ মঞ্ঞ মুপেক্খায, সংসাৰ ভয ভীৰুকো.

৫৪. যঞ্হিকিচ্চং অপৱিট্ঠং, অকিচ্চং পন কযিৰা;

উন্নড়ানং পমত্তানং, তেসং ৱড্ঢন্তি আসৱা.

৫৫. যেসঞ্চ সুসমাৰদ্ধা, নিচ্চং কাযগতা সতি;

অকিচ্চং তে নসেৱন্তি, কিচ্চে সাতত কাৰিনো;

সতানং সম্পজানানং, অত্থং গচ্ছন্তি আসৱাতি.

৫৬. থোমেন্তা সোণ্ণং কাযোৰ,

মুখক্খি ত্যাদিনা ইমং;

ৰত্তে মুট্ঠে কৰোন্তেতে,

অঞ্ঞেজনে সযংৱিয.

৫৭. কাযসোভ্য পকাসেতা,

ৱাচা ৱে মাৰদেসনা;

তদসোভ্য পকাসেতা,

ৱাচা সম্মুদ্ধ দেসনা.

৫৮. অসুভোতি জিনুদ্দিট্ঠং, কাযং সুভোতি গাহিনো;

সংমুড়্হাতে ন মুচ্চন্তি, ভৱা বুদ্ধ ৱিৰোধিনো.

৫৯. অসুভোতি জিনুদ্দিট্ঠং, কাযং তথেৱ গাহিনো;

পণ্ডিতা তেৱ মুচ্চন্তি, ভৱা বুদ্ধমতানুগা.