৩. অসুভভাৱনা নিদ্দেস

১. সিৰিমং গণিকং দিস্ৱা, দমেতুং ৰত্তচেতসং;

দস্সেত্ৱা মতসাৰীৰং, তস্সা জিনো ইদং ব্ৰৱি.

২. চৰংৱা যদিৱা তিট্ঠং, নিসিন্নো উদৱা সযং;

সমঞ্ছেতি পসাৰেতি, এসা কাযস্স ইঞ্জনা.

৩. অট্ঠি ন্হাৰূহি সংযুত্তো, তচ মংসাৱ লেপনো;

ছৱিযা কাযো পটিচ্ছন্নো, যথাভূতং নদিস্সতি.

৪. অন্তপূৰো দৰপূৰো, যকন পেড়স্স ৱত্থিনো;

হদযস্স পপ্ফাসস্স, ৱক্কস্স পিহকস্সচ.

৫. সিঙ্ঘানিকায খেড়স্স, সেদস্সচ মেদস্সচ;

লোহিতস্স লসিকায, পিত্তস্সচ ৱসাযচ.

৬. অথস্স নৱহি সোতেহি, অসুচি সৱতি সব্বদা;

অক্খিম্হা অক্খিগূথকো, কণ্ণম্হা কণ্ণগূথকো.

৭. সিঙ্ঘানিকাচ নাসতো, মুখতো ৱমতি একদা;

পিত্তং সেম্হঞ্চ ৱমতি, কাযম্হা সেদজল্লিকা.

৮. অথস্স সুসিৰং সীসং,

মত্থলুঙ্গস্স পূৰিতং;

সুভতো নং মঞ্ঞতি বালো,

অৱিজ্জায পুৰক্খতো.

৯. যদাচ সো মতো সেতি,

উদ্ধুমাতো ৱিনীলকো;

অপৱিদ্ধো সুসানস্মিং,

অনপেক্খা হোন্তি ঞাতযো.

১০. খাদন্তি নং সুৱানাচ, সিঙ্গালকাচ কিমিযো;

কাকা গিজ্ঝাচ খাদন্তি, যেচঞ্ঞে সন্তি পাণকা.

১১. সুত্ৱান বুদ্ধৱচনং, ভিক্খু পঞ্ঞাণৱা ইধ;

সোখো নং পৰিজানাতি, যথাভূতঞ্হি পস্সতি.

১২. যথাইদং তথাএতং, যথাএতং তথাইদং;

অজ্ঝত্তঞ্চ বহিদ্ধাচ, কাযে ছন্দং ৱিৰাজযে.

১৩. ছন্দ ৰাগ ৱিৰত্তো সো, ভিক্খু পঞ্ঞাণৱা ইধ;

অজ্ঝগা অমতং সন্তিং, নিব্বানং পদ মচ্চুতং.

১৪. দ্ৱিপাদকো যং অসুচি, দুগ্গন্ধো পৰিহাৰতি;

নানাকুণপ পৰিপূৰো, ৱিস্সৱন্তো ততোততো.

১৫. এতাদিসেন কাযেন, যো মঞ্ঞে উন্নমেতৱে;

পৰংৱা অৱজানেয্য, কিমঞ্ঞত্ৰ অদস্সনাতি;

কায ৱিচ্ছন্দনীযসুত্তং, ৱিজযসুত্তন্তিপি ৱত্তব্বং.

১৬. ৰ-অক্খৰো সিযাগ্গিম্হি, ৰোৱ অগ্গিৱ আগতো;

তস্মা ৰাগোতি ৱত্তব্বো, তণ্হাৱ নিচ্চতাপিকা.

১৭. অভিণ্হমেৱ ৰাগগ্গি, দয্হতে সুভসঞ্ঞিনং;

কিমিখজ্জৱণো সাৱ, দুক্খী ৰাগী স সব্বদা.

১৮. দুক্খী পিয মলদ্ধান, লদ্ধাপ্য পৰিপুণ্ণতো;

নত্থি ৰাগগ্গিখন্ধস্স, পিযিন্ধেন হি পুণ্ণতা.

১৯. নত্থি ৰাগসমো অগ্গি,

ইতি ৱুত্তং মহেসিনা;

তেন ৰাগগ্গিনা দড্ঢো,

সব্বো লোকো তিদুক্খিতো.

২০. একস্স পিৱিতং খীৰং, চতূ দধি জলা বহু;

ৰাগহেতু ভৱে সন্ধি, ট্ঠানং অনমতগ্গিকং.

২১. চতূদমি জলা ভিয্যো, সীসচ্ছেদন লোহিতং;

ৰাগহেতু ভৱে মচ্চ, ভযং অনমতগ্গিকং.

২২. একস্স ৰুদতো অস্সু, চতূ দধি জলা বহু;

দুক্খং অনমতগ্গংৱ, তংহেতু পৰিদেৱনং.

২৩. তত্তাযো গুড় গিলিত, ৱধগ্গি দয্হনা দিকং;

অসঙ্খ্যেয্যং মহাদুক্খং, তংহেতু নিৰযে লভি.

২৪. এক দ্ৱিত্তি চতু পঞ্চ, বুদ্ধুপ্পাদেপ্য মোচিতং;

খুপ্পিপাসিত নিজ্ঝামং, লভি তংহেতু পেত্তিকং.

২৫. তিৰচ্ছানে অসূৰেচ, দুক্খং নানাৱিধং লভি;

নমতগ্গিক সংসাৰে, সব্বন্তং ৰাগহেতুকং.

২৬. একস্সেকেন কপ্পেন, পুগ্গলস্সট্ঠি সঞ্চযো;

সচে সংহাৰিতো অস্স, ৱেপুল্ল পব্বতাধিকো.

২৭. এক কপ্পে ইদং দুক্খং, নাদিকপ্পেসু কাকথা;

ৰাগো ননু মহাৱেৰী, বালো জনো ত মিচ্ছতি.

২৮. ৰাগসুদ্ধি অসোকোচ, নিদ্দুক্খো ঞাযপত্তিচ;

নিব্বানং পঞ্চ পচ্চক্খা, অসুভায ফলা মতা.

২৯. অসুভগ্গহণং ঝাযী, মিতা সিন্দ্ৰিয সংৱৰো;

সোমিত্য মুক্কট্ঠাৱাচা, ছড়িমে ৰাগ সুদ্ধিযা.

৩০. নিচ্চুগ্গৰাগ ৰোগীনং, অসুভা ৱাতুলোসধা;

ৰাগযক্খাভি গয্হানং, অসুভা মন্ত মুত্তৰং.

৩১. সজীৱকাচ নিজ্জীৱা, অসুভা দুৱিধা মতা;

সজীৱা কেসলোমাদি, দসেৱিমে অজীৱকা.

৩২. উদ্ধুমাতক ৱীনীলং, ৱিপুব্বকং ৱিছিদ্দকং;

ৱিক্খাযিতক ৱিক্খিত্তং, হতিৱিক্খিত্ত লোহিতং.

৩৩. পুড়ুৱ ট্ঠিক মিচ্চেসু, লদ্ধা অঞ্ঞতৰং সতো;

ৰতন ৱানপস্সেয্য, যথা চেতসি পাকটং.

৩৪. মতং খজ্জং স মংসঞ্চ, নিলোহিতং নিমংসকং;

ৱিক্খিত্তং সেত পুঞ্জট্ঠিং, নৱধা পুতিমিক্খযে.

৩৫. মচ্চুতো পৰিমুচ্চামি, পটিৱত্তি যিমা যিতি;

পযোজন সমাৱজ্জ, মোদিতব্বং জিগুচ্ছকে.

৩৬. সজীৱকে জিগুচ্ছত্থং, নিজ্জীৱা সুভ মীৰিতং;

তথূপমো অযংকাযো, এৱমেৱ ভৱিস্সতি.

৩৭. এৱংধম্মো অযংকাযো, এৱংভাৱী নতিক্কমো;

ইচ্চুপ সংহৰে দিস্ৱা, একদ্ৱিহ মতাদিকং.

৩৮. যথা ইদং তথাএতং, যথাএতং তথা ইদং;

জেগুচ্ছং পটিকূল্যঞ্চ, কাযে ইচ্চুপ সংহৰে.

৩৯. উদ্ধুমাত ৱিনীলাদি,

পটিকূল্যো জিগুচ্ছিতো;

তথেৱাযম্পি মে কাযো,

ৱিসেসো নাযু-সাযুৱ.

৪০. উদ্ধুমাত ৱিনীলাদো, সোভণং নত্থি কিঞ্চিপি;

ইমস্মিংপি মে কাযে, গৱেসন্তোপি সব্বসো.

৪১. পটিকূলৱসা ধাতু, ৱসাচ দ্ৱিপ্পকাৰতো;

পচ্চৱেক্খেয্যিমং কাযং, ইচ্ছং ৱিৰাগ মত্তনি.

৪২. ৱণ্ণ সণ্ঠান গন্ধেহি, আসযো কাসতোপিচ;

জেগুচ্ছ পটিকূল্যাচ, কেসা ন তুট্ঠমানিতা.

৪৩. ইতি কেসেসু ইক্খেয্য,

লোমা দীসুপ্যযং নযো;

দ্ৱত্তিংসেৱঞ্হি কোট্ঠাসে,

পচ্চৱেক্খে ৱিসুংৱিসুং.

৪৪. কাযতো বহিনিক্খন্তং, পটিকূল্যং জিগুচ্ছিতং;

অনিক্খন্তম্পি জেগুচ্ছং, পটিকূল্যংৱ তস্সমং.

৪৫. সঙ্খতম্পি যথা ৱচ্চং, মনুঞ্ঞতং ন পাপুণে;

উপক্কম সহস্সেহি, এৱং কেসাদিকম্পিচ.

৪৬. সভাৱ পটিকূল্যংৱ, একম্পি ৱচ্চ পুঞ্জকং;

ননু জেগুচ্ছিতা ভিয্যো, দ্ৱত্তিংস ৱচ্চপুঞ্জকা.

৪৭. পচ্চেকম্পি পটিকূল্যং, কেসাদিকং সভাৱতো;

কেসাদিদ্ৱত্তিংস পুঞ্জো, ভিয্যো জেগুচ্ছিতো ননু.

৪৮. পুঞ্জিতেস্ৱেৱ কন্তেসু, কন্তোহোতি স পুঞ্জকো;

পুঞ্জিতেসু অকন্তেস, অকন্তোৱ স পুঞ্জকো.

৪৯. পচ্চেকং ৱিনিভুত্তেস, কেস লোম নখাদিসু;

নত্থি তঞ্ঞা কুমাৰীৱা, মুখহত্থাদিকানিৱা.

৫০. সম্পিণ্ডি তেসু তেস্ৱেৱ,

কুতো তা তানি আগতা;

পঞ্ঞত্তি মত্ত মেৱেসা,

জিগুচ্ছঞ্ঞা ন কাচিপি.

৫১. সন্তং চিন্তেয্য নাসন্তং, সন্ত চিন্তযতো সুখং;

অসন্তং পৰিকপ্পেন্তো, নানাদুক্খেহি তপ্পতি.

৫২. নাৱজ্জ সন্তজেগুচ্ছং, সঞ্ঞং অসতি কাতুন;

সুভা ইত্থীতি গাৰগ্গি, উপ্পজ্জি সুভসঞ্ঞিনো.

৫৩. অসন্তংৱ অভূতংৱ, পস্সে ৰাগগ্গিজোতিযা;

তায সন্তঞ্চ ভূতঞ্চ, ন পস্সতি কদাচিপি.

৫৪. একস্স পিৱিতং খীৰং, সীসচ্ছেদন লোহিতং;

ৰুদতো অস্সু তংহেতু, চতূদধি জলা বহু.

৫৫. আযতিম্পি অতীতেৱ, সংসৰন্তস্স হেস্সতি;

ৰাগং হন্তু মনীহোচে, খীৰং অস্সুচ লোহিতং.

৫৬. সুভসঞ্ঞায সো ৱড্ঢো,

তদভাৱে স নস্সতি;

থিৰং হন্তুং ন তংসঞ্ঞং,

সক্কা সিথিল ৱীৰিযো.

৫৭. উস্সোড়্হি ৱীৰিযো হুত্ৱা, ব্ৰূহেয্যাসুভ ভাৱনং;

সুভসঞ্ঞাপ্প হানায, পৰিচ্চজ্জাপি জীৱিতং.

৫৮. অঞ্ঞকিচ্চ মুপেক্খায, ব্ৰূহেয্যাসুভ ভাৱনং;

মন্দি হুত্ৱেহ ৰাগগ্গি, নিব্বাযিস্সতি আযতিং.

৫৯. কিচ্চং মে ইদমেৱেতি, ব্ৰূহেয্যাসুভ ভাৱনং;

দানি মন্দগ্গি হুত্ৱান, পামোজ্জং ৱে লভিস্সতি.

৬০. কাযে দট্ঠব্ব জেগুচ্ছং, অপস্সন্তো পমাদৱা;

অলদ্ধা কিঞ্চি পামোজ্জং, পব্বজ্জম্পি ন মোদতি.

৬১. পুৰে মৰামি কাযে স্মিং, পস্সা মি পস্সিতব্বকং;

ইচ্চা ৰদ্ধো ৱীতিংলদ্ধা, পব্বজ্জং অতিমোদতি.

৬২. কাযে দট্ঠব্ব জেগুচ্ছং, অপস্সন্তো পমাদ ৱা;

মোঘংৱ দুল্লভাতীতো, মহাজানীযতং গতো.

৬৩. সন্তং ভূতঞ্চ জেগুচ্ছং, ৰাগগ্গিনা অপস্সিযং;

পঞ্ঞাপদীপজোতেন, সমিক্খেয্য অভিণ্হসো.

৬৪. সন্তং ভূতঞ্চ কাযে স্মিং, দট্ঠুকামো সদাসতো;

পঞ্ঞাপদীপকেনেৱ, দক্খে ন ৰাগীসীখিনা.

৬৫. জেগুচ্ছিতেন কাযেন, নিক্খন্তেন জিগুচ্ছতো;

অজ্জ স্ৱেৱা ৱিনট্ঠেন, নাল মুন্নমিতুং সতো.

৬৬. কীদিসং মং তুৱং মঞ্ঞি, অহং সব্ব জেগুচ্ছকো;

জেগুচ্ছতোচ নিক্খন্তো, ইচ্চেৱ ৱত্তু মৰহতি.

৬৭. কাযে জেগুচ্ছসঞ্ঞংৱ, কৰে সব্বিৰিযা পথে;

তস্মিং তুট্ঠব্বকং নত্থি, পিযাযিতং মমাযিতং.