নমো তস্স ভগৱতো অৰহতো সম্মাসম্বুদ্ধস্স

চাণক্যনীতিপাড়ি

১. নানাসত্থো দ্ধতং ৱক্খে,

ৰাজ নীতি সমুচ্চযং;

সব্ব বীজ মিদং সত্থং,

চাণক্যং সাৰসঙ্গহং.

২. মূলসুত্তং পৱক্খামি,

চাণক্যেন যথোদিতং;

যস্স ৱিঞ্ঞান মত্তেন,

মূড়্হো ভৱতি পণ্ডিতো.

৩. ৱিদুত্তং নৰপচ্চঞ্চ,

নেৱতুল্যং কুদাচনং;

সদেসে পুজ্জতে ৰাজা,

ৱিদূ সব্বত্থ পুজ্জতে.

৪. পণ্ডিতে চ গুণা সব্বে,

মূড়্হে দোসা হি কেৱলং;

তস্মা মূড়্হসহস্সেসু,

পঞ্ঞো একো ৱিসিস্যতে.

৫. মাতৰিৱ পৰদাৰেসু,

পৰদব্বেসু লেট্টুৱ;

অত্তনিৱ সব্বভূতেসু,

যো পস্সতি সপণ্ডিতো.

৬. কিংকুলেন ৱিসালেন,

গুণহীনো তু যোনৰো;

অকুলিনোপি সত্থঞ্ঞো,

দেৱতাহিপি পুজ্জতে.

৭. ৰূপযোব্বনসম্পন্না,

ৱিসালকুলসম্ভৱা;

ৱিজ্জাহীনা নসোভন্তে,

নিগ্গন্ধা ইৱ কিংসুকা.

৮. তাৰানং ভূসণং চন্দো,

নাৰীনং ভূসণং পতি;

পুথব্যা ভূসণং ৰাজা,

ৱিজ্জা সব্বস্স ভূসণং.

৯. মাতা সত্তু পিতা ৱেৰী,

যেন বালো নপাট্ঠিতো;

ন সোভতে সভামজ্ঝে,

হংসমজ্ঝে বকোযথা.

১০. ৱৰমেকো গুণী পুত্তো,

ন চ মূড়্হসতেহিপি;

একো চন্দো তমো হন্তি,

ন চ তাৰগণেহিপি.

১১. লালযে পঞ্চৱস্সানি,

দসৱস্সানি তালযে;

পত্তে তু সোড়সে ৱস্সে,

পুত্তং মিত্তংৱ আচৰে.

১২. লালনে বহৱো দোসা,

তালনে বহৱো গুণা;

তস্মা পুত্তঞ্চ সিস্সঞ্চ,

তালযে ন তু লালযে.

১৩. একেনাপি সুৱক্খেন,

পুপ্ফিতেন সুগন্ধিনা;

ৱাসিতস্স ৱনং সব্বং,

সুপুত্তেন কুলংযথা.

১৪. একস্সাপি কুৱক্খস্স,

কোটৰট্ঠেন অগ্গিনা;

দয্হতে হি ৱনং সব্বং,

কুপুত্তেন কুলং যথা.

১৫. দূৰতো সোভতে মূড়্হো,

লম্বমান পটাৱুতো;

তাৱঞ্চ সোভতে মূড়্হো,

যাৱ কিঞ্চি নভাসতে.

১৬. ৱিসতো অমতং গায্হং,

অমেজ্ঝাঅপি কঞ্চনং;

নীচতো উত্তমা ৱিজ্জা,

থীৰত্নং দুক্কুলাঅপি.

১৭. উস্সৱে ব্যসনেচেৱ,

দুব্ভিক্খে সত্তুৱিগ্গহে;

ৰাজদ্ৱাৰে সুসানেচ,

যো তিট্ঠতি সবন্ধৱো.

১৮. পৰোক্খে কিচ্চহন্তাৰং,

পচ্চক্খে পিযৱাদিনং;

ৱজ্জযে তাদিসং মিত্তং,

ৱিসকুম্ভং পযোমুখং.

১৯. সকিং দুট্ঠঞ্চ মিত্তং যো,

পুন সন্ধাতু মিচ্ছতি;

সমচ্চু মুপগণ্হাতি,

গব্ভ মস্সতৰী যথা.

২০. ন ৱিস্সসে অৱিস্সত্থং,

মিত্তঞ্চাপি ন ৱিস্সসে;

কদাচি কুপিতং মিত্তং,

সব্বদোসং পকাসযে.

২১. জানিযা পেসনে ভচ্চে,

বন্ধৱে ব্যসনাগমে;

মিত্তঞ্চা পদিকালেচ,

ভৰিযঞ্চ ৱিভৱক্খযে.

২২. উপকাৰগ্গহিতেন,

সত্তুনাসত্তুমুদ্ধৰে;

পাদলগ্গং কৰট্ঠেন,

কণ্টকেনেৱ কণ্টকং.

২৩. ন মিত্তং কোচি কস্সচি,

ন কোচি ৰিপু কস্সচি;

কাৰণেন হি ঞাযতি,

মিত্তানি চ ৰিপূ তথা.

২৪. দুজ্জনো পিযৱাদী চ,

নেতং ৱিস্সাসকাৰণং;

মধু তিট্ঠতি জিৱ্হগ্গে,

হদযে তু হলাহলং.

২৫. দুজ্জনো পৰিহন্তব্বো,

ৱিজ্জাযা লঙ্কতোপি সং;

মণিনা ভূসিতো সপ্পো,

কিমে সো নভযং কৰো.

২৬. সপ্পো কূৰো খলো কূৰো,

সপ্পা কূৰতৰো খলো;

মন্তো সধিৱসো সপ্পো,

খলো কেন নিৱায্যতে.

২৭. নখীনঞ্চ নদীনঞ্চ,

সিঙ্গীনং সত্থপাণিনং;

ৱিস্সাসো নেৱকাতব্বো,

থীসু ৰাজকুলেসু চ.

২৮. হত্থী হত্থসহস্সেন,

সতহত্থেন ৱাজিনো;

সিঙ্গিনো দসহত্থেন,

ঠানচাগেন দুজ্জনো.

২৯. আপদত্থং ধনং ৰক্খে,

দাৰং ৰক্খে ধনেহিপি;

অত্তানং সততং ৰক্খে,

দাৰেহিপি ধনেহিপি.

৩০. পৰদাৰং পৰদব্বং,

পৰিৱাদং পৰস্স চ;

পৰিহাসং গুৰুট্ঠানে,

চাপল্যঞ্চ ৱিৱজ্জযে.

৩১. চজে একং কুলস্সত্থে,

গামস্সত্থে কুলং চজে;

গাম জনপদস্সত্থে,

অত্তত্থে পথৱিং চজে.

৩২. চলত্যেকেন পাদেন,

তিট্ঠ ত্যেকেন বুদ্ধিমা;

নাসমিক্খ্য পৰং ঠানং,

পুব্বমাযতনং চজে.

৩৩. লুদ্ধ মত্থেন গণ্হেয্য,

থদ্ধ মঞ্জলী কম্মুনা;

মূড়্হং ছন্দো নুৱত্তেন,

তথা তথেন পণ্ডিতং.

৩৪. অত্থনাসং মনোতাপং,

গেহে দুচ্চৰিতানি চ;

ৱঞ্চনঞ্চ পমাণঞ্চ,

মতিমা ন পকাসযে.

৩৫. ধনধঞ্ঞপ্পযোগেসু,

তথা ৱিজ্জাগমেসু চ;

আহাৰে ব্যৱহাৰে চ,

চত্তলজ্জো সদা ভৱে.

৩৬. ধনিনো সোত্থিযো ৰাজা,

নদী ৱেজ্জো তু পঞ্চমো;

পঞ্চ যত্ৰ নৱিজ্জন্তে,

তত্ৰ ৱাসং নকাৰযে.

৩৭. যস্মিংদেসে ন সম্মানং,

ন পীতি নচ বন্ধৱা;

ন চ ৱিজ্জাগমো কোচি,

তংদেসং পৰিৱজ্জযে.