নমো তস্স ভগৱতো অৰহতো সম্মাসম্বুদ্ধস্স

চতুৰাৰক্খদীপনী

কাযপচ্চৱেক্খণা

১. দুস্সীলকথা,

২. সীলানিসংসকথা,

৩. অনূসাসনকথা,

৪. আৱাসিকাচাৰকথা,

৫. পচ্চযনিস্সগ্গকথা,

৬. পাতিমোক্খকথা,

৭. দাযকোৱাদকথা,

পণামপটিঞা

১. চক্কৱাড় নহুতা গ, দেৱালি গণ চুম্বিতো;

বুদ্ধ পাদম্বুজো ঠাতু, সীসে দযা তিগন্ধজো.

২. নন্ত চক্কৱাড় ব্ভুগ্গ, গুণ সন্নিচ্চিতং জিনং;

ৱন্দে তপ্পূজিতং ধম্মং, তজ্জং সঙ্ঘঞ্চ নিম্মলং.

৩. ৱক্খামি চতুৰাৰক্খং, সম্বুদ্ধ ৱচন ন্ৱযং;

অপ্পমাদাৱহং এতং, সোত্তব্বং ভৱভীৰুহি.

৪. বুদ্ধানুস্সতি মৰণা, ভুভা মেত্তাচ ভাৱনা;

অপ্পমাদায আৰক্খা, চতস্সো মানিতা সতং.

১. বুদ্ধানূস্সতি ভাৱনা,

২. মৰণস্সতি ভাৱনা,

৩. অসুভ ভাৱনা,

৪. মেত্তা ভাৱনা,

৫. বুদ্ধোৱাদং সৰিত্ৱাৱ, মচ্চুব্বিগ্গা সুখেসিনো;

সীতা সীততৰং যন্তি, সুভমেত্তম্বুসি-ট্ঠিতা.

৬. মৰণগ্গি ৱাৰণম্বু, সম্বুদ্ধৱচনং যিদং;

বহূ তদগ্গি সন্তত্তা, সীতাৱাসুং তদম্বুনা.

৭. সদ্ধং বুদ্ধেন তেজেত্ৱা, মানং মৰণচিন্তযা;

অসুভায হনে ৰাগং, দোসং মেত্তায পঞ্ঞৱা.

১. বুদ্ধানুস্সতি নিদ্দেস

১. অৰহং সম্মাসম্বুদ্ধো, ৱিজ্জক্খি চৰণপ্পদো;

সুগতো সুগদো সত্থা, সব্বঞ্ঞূ ভগৱাদমো.

২. আৰকত্তাৰিহন্তত্তা, পাপাকাৰকতোৰহো;

হত চক্কাৰতো পূজা, ৰহত্তা চাৰহং নমে.

৩. সমুত্তে জিয গিহীনং, অনুপুব্বিকথো জিনো;

অদাসি পৰমং তুট্ঠিং, সচ্চানি দস্সযং দিৱা.

৪. ভিক্খূনং পঠমে যামে, পাযেসি অমতাগদং;

জাতিখেত্তাগ দেৱানং, কঙ্খচ্ছেদো স মজ্ঝিমে;

৫. আদো ফলসুখং ৱেদি, মজ্ঝে সেয্য মকা জিনো;

ৱেনেয্যো লোকনং অন্তে, পচ্ছিমেপি তিধা কতে.

৬. খেদং অগণযং নাথো, পঞ্চ বুদ্ধকতং ৱহং;

সত্থসিদ্ধো পৰত্থংৱ, ব্যাৱটো সুমহাদযো.

৭. চঙ্কমিত্ৱা নিসীদিত্ৱা, ৰত্তিংদিৱঞ্চ ঝাযিতুং;

সুপিতুং মজ্ঝযামেৱ, বুদ্ধো ভিক্খূন মোৱদি.

৮. নাল মালসিতুং তস্স, মহাৱীৰস্স সাসনে;

পমাদায মুনিন্দস্স, কতঞ্ঞূ সাধু সম্মতো.

৯. অনঞ্ঞাতস্স ঞাতায, অপত্তস্সচ পত্তিযা;

আৰভেতুংৱ নো যুত্তো, অপ্পমত্তো ৰহোগতো.

১০. আৰব্ভথ নিক্কমথ, যুঞ্জথ বুদ্ধসাসনে;

ধুনাথ মচ্চুনো সেনং, নড়াগাৰংৱ কুঞ্জৰো.

১১. যো ইমস্মিং ধম্মৱিনযে, অপ্পমত্তো ৱিহিস্সতি;

পহায জাতি সংসাৰং, দুক্খস্সন্তং কৰিস্সতি;

১২. ইতি উয্যোজনং ম্হাকং, মুত্তস্স মুত্তিযা সৰং;

নযুত্তোৱ পমাদায, মহাদযস্স সত্থুনো.

১৩. সুত্তেন দুব্বিতক্কেন, অকিচ্চ কৰণেনৱা;

মোঘ কালক্খযো মন্দো, দুক্খস্সন্তং কথংকৰে.

১৪. আকাসং চক্কৱাড়ঞ্চ, সত্তা বুদ্ধগুণা পিচ;

অনন্তানাম চত্তাৰো, পৰিচ্ছেদো নৱিজ্জতি.

১৫. যথাপি নভ মাকাসং, অঙ্গুলৰজ্জুযট্ঠিভি;

মিনেতুং নেৱ সক্কোতি, এৱং কেনচি তগ্গুণং.

২. মৰণস্সতিনিদ্দেস

১. মৰণস্সতি মিচ্ছন্তো, তাৱ বুদ্ধৱচো সুণ;

অৱিক্খিত্তেন চিত্তেন, সম্বুদ্ধ ৱচনং হিদং.

২. অনিমিত্ত মনঞ্ঞাতং, মচ্চানং ইধ জীৱিতং;

কসিৰঞ্চ পৰিত্তঞ্চ, তঞ্চ দুক্খেন সংযুতং.

৩. ন হি সো পক্কমো অত্থি, যেন জাতা নমিয্যৰে;

জৰম্পি পত্ৱা মৰণং, এৱংধম্মা হি পাণিনো.

৪. ফলান মিৱ পক্কানং, পাতো পতনতো ভযং;

এৱং জাতান মচ্চানং, নিচ্চং মৰণ তো ভযং.

৫. যথাপি কুম্ভকাৰস্স, কতা মত্তিকভাজনা;

সব্বে ভেদপৰিযন্তা, এৱং মচ্চান জীৱিতং.

৬. দহৰাচ মহন্তাচ, যেবালা যেচ পণ্ডিতা;

সব্বে মচ্চুৱসং যন্তি, সব্বে মচ্চুপৰাযনা.

৭. তেসং মচ্চুপৰেতানং, গচ্ছতং পৰলোকতো;

নপিতা তাযতে পুত্তং, ঞাতিৱাপন ঞাতকে;

৮. পেক্খতঞ্ঞেৱ ঞাতীনং, পস্স লালপ্পতং পুথু;

একমেকোৱ মচ্চানং, গো ৱজ্ঝোৱিয নিয্যতি.

৯. এৱ মব্ভাহতো লোকো, মচ্চুনাচ জৰাযচ;

তস্মা ধীৰা নসোচন্তি, ৱিদিত্ৱা লোক পৰিযাযং.

১০. অঞ্ঞেপি পস্স গমনে, যথা কম্মুপগে নৰে;

মচ্চুনো ৱসমাগম্ম, ফন্দন্তেৱিধ পাণিনো.

১১. যেন যেনহি মঞ্ঞন্তি,

ততোতস্স হি অঞ্ঞথা;

এতাদিসো ৱিনাভাৱো,

পস্স লোকস্স পৰিযাযন্তি.

[সুল্ল সুত্তে ৱুত্তং.]

১২. যথাপি সেলা ৱিপুলা,

নভং আহচ্চ পচ্চতা;

সমন্তা অনুপৰি যেয্যুং,

নিপ্পোথেন্তা চতুদ্দিসা.

১৩. এৱং জৰাচ মচ্চুচ,

অধিৱত্তন্তি পাণিনে;

খত্তিযেব্ৰাহ্মণে ৱেস্সে,

সুদ্দে চণ্ডাল পক্কুসে;

নকিঞ্চি পৰিৱজ্জেতি,

সব্বমেৱা ভিমদ্দতি.

১৪. ন তত্থ হত্থি নং ভুম্মি, ন ৰথানং নপত্তিযা;

ন চাপি মন্তযুদ্ধেন, সক্কা জেতুং ধনেনৱা.

১৫. তস্মাহি পণ্ডিতো পোসো,

সম্পস্সং অত্থ মত্তনো;

বুদ্ধে ধম্মে চ সঙ্ঘেচ,

ধীৰো সদ্দং নিৱেসযে.

১৬. যো ধম্মচাৰী কাযেন, ৱাচায উদ চেতসা;

ইধেৱনং পসংসন্তি, পচ্চসগ্গে পমোদতীতি.

[পব্বতূ মম সুত্তে ৱুত্তং.]

১৭. যথা ৱাৰিৱহো পূৰো, ৱহে ৰুক্খে পকূলজে;

এৱং জৰামৰণেন, ৱুয্হন্তে সব্ব পাণিনো.

১৮. দহৰাপি হি মিয্যন্তি,

নৰাচ অথনাৰিযো;

তত্থ কো ৱিসাসেপোসো,

দহৰো ম্হীতিজীৱিতে.

১৯. সায মেকে নিদিস্সন্তি, পাতো দিট্ঠা বহুজ্জনা;

পাতো একে নদিস্সন্তি, সাযং দিট্ঠা বহুজ্জনা.

২০. অজ্জেৱ কিচ্চং আতপ্পং, কো জঞ্ঞা মৰণং সুৱে;

নহি নো সঙ্কৰং তেন, মহাসেনন মচ্চুনাতি.

[জাতকেসুৱুত্তং.]

২১. নত্থেত্থঞ্ঞো নুসাসন্তো, সযংৱত্তান মোৱদ;

জিনেৰিতা নুসাৰেন, ভিক্খু সংসাৰ ভীৰুকো.

২২. অহিৱাপি মং ডংসেয্য, অঞ্ঞেপি ৱিসধাৰিনো;

অপিযাপিচ ঘাতেয্যুং, উপ্পজ্জেয্যুং ৰুজাপিমে.

২৩. মচ্চুসেনা ৱুধাসঙ্খ্যা, বাহিৰজ্ঝত্তু পদ্দৱা;

তেহাযু পীড়িতংছেজ্জং, মৰিস্স মজ্জৱা সুৱে.

২৪. অড়ক্কা হি গৱাদীহি, চোৰাদীহি অৰীহিপি;

অভিণ্হ সন্নিপাতেহি, ৰুজা ছনৱুতীহিপি.

২৫. বহূন মুপকাৰেহি, অন্নোদকাদিকেহিপি;

মৰিস্সং পীড়িতো নিচ্চং, নিৰুজ্ঝেয্যাযু অজ্জৱা.

২৬. বহ্ৱাৱুধে ৱিসজ্জেতি, নিল্লেণং মচ্চুনিদ্দযো;

ৱসন্তং ভৱসঙ্গামে, নমুত্তো কোচি আৱুধা;

২৭. মহব্বলা মহাপঞ্ঞা, মহিদ্ধিকা মহদ্ধনা;

নমুত্তা সম্মাসম্বুদ্ধো, সব্বলোকাধিপো অপি;

২৮. মযা সমা নৱা ৱুদ্ধা, তদাৱুধেহি তে মতা;

তথা হম্পি মৰিস্সামি, লেণং পুঞ্ঞংৱ মে কতং.

২৯. পথব্যাপাদযো ধাত্থূ,

আহাৰা ভোজনাদযো;

সীতুণ্হ মুতুনামেতং,

দোসা পিত্তসেম্হানিলা.

৩০. ধাত্ৱাহাৰু তুদোসানং, সমত্তে ৱাযু তিট্ঠতি;

ৱিসমে তঙ্খণঞ্ঞেৱ, ছেজ্জ মপ্পং পৰাধিনং.

৩১. ধাত্ৱা হাৰুতু দোসানং, ৱিসমা স্ৱেপ্যকল্লকো;

উস্সাহে কল্লকালেৱ, কিংকৰেয্যঅকল্লকো;

৩২. উপ্পজ্জেয্যুং ৰুজা স্ৱেপি, অসাতো দুক্খমা খৰা;

পুৰেতৰংৱ আৰব্ভে, মাপচ্ছা অনুতাপনং.

৩৩. সত্তানং নীচকম্মানং, সৰণোপি ভযঙ্কৰো;

নীচানীচং নজানামি, মৰণাসন্নতম্পিচ.

৩৪. কম্ম পীড়িত সত্তানং, তঙ্খণম্পি ভযুব্ভৱো;

মৰেয্য মজ্জৱা স্ৱেৱা, নযুত্তোৱ পমজ্জিতুং.

৩৫. পুঞ্ঞক্খীণা পজা খিপ্পং, অহেতুনাপি নস্সযে;

সুদ্ধচিত্তো মৰিস্সামি, ন কিলিট্ঠেন চেতসা.

৩৬. উপচ্ছেদাপি মে সন্তি, ভৱাভৱচিতা বহূ;

ছেজ্জং তেহাযু অজ্জাপি, সাধ্ৱাসুমাৰভে মতং;