২. পুৰৱগ্গ

১৯৮. পুৰং নগৰ মিত্থী ৱা, ঠানীযং পুটভেদনং;

থিযং তু ৰাজধানী [ৰাজঠানী (টী.)] চ, খন্ধাৱাৰো ভৱে থ চ.

১৯৯. সাখানগৰ মঞ্ঞত্ৰ, যং তং মূলপুৰা পুৰং;

বাৰাণসী চ সাৱত্থি, ৱেসালী মিথিলা, ড়ৱী.

২০০. কোসম্বু, জ্জেনিযো তক্ক, সিলা চম্পা চ সাগলং;

সুসুমাৰগিৰং [সংসুমাৰ (টীকা)] ৰাজ, গহং কপিলৱত্থু চ.

২০১. সাকেত, মিন্দপত্থঞ্চো, ক্কট্ঠা পাটলিপুত্তকং;

জেতুত্তৰঞ্চ সঙ্কস্সং, কুসিনাৰাদযো পুৰী.

২০২. ৰচ্ছা চ ৱিসিখা ৱুত্তা, ৰথিকা ৱীথি চাপ্যথ;

ব্যূহো ৰচ্ছা অনিব্বিদ্ধা, নিব্বিদ্ধা তু পথদ্ধি চ.

২০৩. চতুক্কং চচ্চৰে মগ্গ, সন্ধি সিঙ্ঘাটকং ভৱে;

পাকাৰো ৱৰণো চাথ, উদাপো [উদ্দাপ, উদ্দাপ] উপকাৰিকা.

২০৪. কুট্টং তু ভিত্তি নাৰী থ, গোপুৰং দ্ৱাৰকোট্ঠকো;

এসিকা ইন্দখীলো চ, অট্টো ত্ৱট্টালকো ভৱে.

২০৫. তোৰণং তু বহিদ্ৱাৰং, পৰিখাতু চ দীঘিকা;

মন্দিৰং সদনা, গাৰং, নিকাযো নিলযা, লযো.

২০৬. আৱাসো ভৱনং ৱেস্মং, নিকেতনং নিৱেসনং;

ঘৰং গহঞ্চা, ৱসথো, সৰণঞ্চ পতিস্সযো.

২০৭. ওকং সালা খযো ৱাসো, থিযং কুটি ৱসত্য’পি;

গেহঞ্চা, নিত্থি সদুমং, চেতিযা, যতনানি তু.

২০৮. পাসাদো চেৱ যূপো থ, মুণ্ডচ্ছদো চ হম্মিযং;

যূপোতু গজকুম্ভম্হি, হত্থিনখো পতিট্ঠিতো.

২০৯. সুপণ্ণৱঙ্কচ্ছদন, মড্ঢযোগো সিযা থ চ;

এককূটযুতো মাড়ো,

পাসাদো চতুৰস্সকো.

২১০. সভাযঞ্চ সভা চাথ, মণ্ডপং ৱা জনালযো;

অথো আসনসালাযং, পটিক্কমন মীৰিতং.

২১১. জিনস্স ৱাসভৱন, মিত্থী গন্ধকুটি প্যথ;

থিযং ৰসৱতী পাক, ট্ঠানঞ্চেৱ মহানসং.

২১২. আৱেসনং সিপ্পসালা, সোণ্ডা তু পানমন্দিৰং;

ৱচ্চট্ঠানং ৱচ্চকুটি, মুনীনং ঠান মস্সমো.

২১৩. পণ্যৱিক্কযসালা কু, আপণো পণ্যৱীথিকা;

উদোসিতো ভণ্ডসালা, চঙ্কমনং তু চঙ্কমো.

২১৪. জন্তাঘৰং ত্ৱগ্গিসালা, পপা পানীযসালিকা;

গব্ভো ওৱৰকো ৱাসা, গাৰং তু সযনিগ্গহং.

২১৫. ইত্থাগাৰং তু ওৰোধো, সুদ্ধন্তো’ ন্তেপুৰম্পি চ;

অসব্বৱিসযট্ঠানং, ৰঞ্ঞং কচ্ছন্তৰং মতং.

২১৬. সোপানো ৱা’ৰোহণঞ্চ,

নিস্সেণী সা, ধিৰোহিণী;

ৱাতপানং গৱক্খো চ, জালঞ্চ সীহপঞ্জৰং.

২১৭. আলোকসন্ধি ৱুত্তো থ, লঙ্গী’ত্থী পলিঘো ভৱে;

কপিসীসো, গ্গলত্থম্ভো, নিব্বং তু ছদ্দকোটিযং.

২১৮. ছদনং পটলং ছদ্দ, মজিৰং চচ্চৰো, ঙ্গণং;

পঘানো পঘনা, লিন্দো, পমুখং দ্ৱাৰবন্ধনং.

২১৯. পিট্ঠসঙ্ঘাটকং দ্ৱাৰ, বাহা কূটং তু কণ্ণিকা;

দ্ৱাৰঞ্চ পটিহাৰো থ, উম্মাৰো দেহনী, ত্থিযং.

২২০. এড়কো ইন্দখীলো থ, থম্ভো থূণো পুমিত্থিযং;

পাটিকা, ড্ঢেন্দুপাসাণে, গিঞ্জকা তু চ ইট্ঠকা.

২২১. ৱলভিচ্ছাদিদাৰুম্হি, ৱঙ্কে গোপানসী, ত্থিযং;

কপোতপালিকাযং তু, ৱিটঙ্কো নিত্থিযং ভৱে.

২২২. কুঞ্চিকাৱিৱৰং তাড়, চ্ছিগ্গলো প্যথ কুঞ্চিকা;

তাড়ো’ৱাপুৰণং চাথ, ৱেদিকা ৱেদি কথ্যতে.

২২৩. সঙ্ঘাতো পক্খপাসো চ, মন্দিৰঙ্গা তুলা অপি;

থিযং সম্মুজ্জনী চেৱ, সম্মজ্জনী চ সোধনী.

২২৪. সঙ্কটীৰং তু সঙ্কাৰ, ট্ঠানং সঙ্কাৰকূটকং;

অথো কচৱৰো, ক্লাপো, সঙ্কাৰো চ কসম্বুপি.

২২৫. ঘৰাদিভূমি তং ৱত্থু, গামো সংৱসথো থ সো;

পাকটো নিগমো ভোগ, মচ্চাদিভ্যো ধি তূদিতো [‘অধিভূ’তি ঈৰিতো কথিতো (টী.)].

২২৬. সীমা চ মৰিযাদা থ,

ঘোসো গোপালগামকোতি.

পুৰৱগ্গো নিট্ঠিতো.