৮. দেৱাসুৰসঙ্গামসুত্তং

৩৯. ‘‘ভূতপুব্বং, ভিক্খৱে, দেৱাসুৰসঙ্গামো সমুপব্যূড়্হো [সমুপব্বূড়্হো (সী. পী.)] অহোসি. তস্মিং খো পন, ভিক্খৱে, সঙ্গামে অসুৰা জিনিংসু, দেৱা পৰাজযিংসু [পৰাজিযিংসু (সী. স্যা. ক.)]. পৰাজিতা চ, ভিক্খৱে, দেৱা [দেৱা ভীতা (পী.)] অপযিংসুযেৱ [অপযংস্ৱেৱ (সী.)] উত্তৰেনাভিমুখা, অভিযিংসু [অভিযংসু (সী.)] অসুৰা. অথ খো, ভিক্খৱে, দেৱানং এতদহোসি – ‘অভিযন্তেৱ খো অসুৰা. যংনূন মযং দুতিযম্পি অসুৰেহি সঙ্গামেয্যামা’তি. দুতিযম্পি খো, ভিক্খৱে, দেৱা অসুৰেহি সঙ্গামেসুং. দুতিযম্পি খো, ভিক্খৱে, অসুৰাৱ জিনিংসু, দেৱা পৰাজযিংসু. পৰাজিতা চ, ভিক্খৱে, দেৱা অপযিংসুযেৱ উত্তৰেনাভিমুখা, অভিযিংসু অসুৰা’’.

অথ খো, ভিক্খৱে, দেৱানং এতদহোসি – ‘অভিযন্তেৱ খো অসুৰা. যংনূন মযং ততিযম্পি অসুৰেহি সঙ্গামেয্যামা’তি. ততিযম্পি খো, ভিক্খৱে, দেৱা অসুৰেহি সঙ্গামেসুং. ততিযম্পি খো, ভিক্খৱে, অসুৰাৱ জিনিংসু, দেৱা পৰাজযিংসু. পৰাজিতা চ, ভিক্খৱে, দেৱা ভীতা দেৱপুৰংযেৱ পৱিসিংসু. দেৱপুৰগতানঞ্চ পন [পুন (ক.)], ভিক্খৱে, দেৱানং এতদহোসি – ‘ভীৰুত্তানগতেন খো দানি মযং এতৰহি অত্তনা ৱিহৰাম অকৰণীযা অসুৰেহী’তি. অসুৰানম্পি, ভিক্খৱে, এতদহোসি – ‘ভীৰুত্তানগতেন খো দানি দেৱা এতৰহি অত্তনা ৱিহৰন্তি অকৰণীযা অম্হেহী’তি.

‘‘ভূতপুব্বং, ভিক্খৱে, দেৱাসুৰসঙ্গামো সমুপব্যূড়্হো অহোসি. তস্মিং খো পন, ভিক্খৱে, সঙ্গামে দেৱা জিনিংসু, অসুৰা পৰাজযিংসু. পৰাজিতা চ, ভিক্খৱে, অসুৰা অপযিংসুযেৱ দক্খিণেনাভিমুখা, অভিযিংসু দেৱা. অথ খো, ভিক্খৱে, অসুৰানং এতদহোসি – ‘অভিযন্তেৱ খো দেৱা. যংনূন মযং দুতিযম্পি দেৱেহি সঙ্গামেয্যামা’তি. দুতিযম্পি খো, ভিক্খৱে, অসুৰা দেৱেহি সঙ্গামেসুং. দুতিযম্পি খো, ভিক্খৱে, দেৱা জিনিংসু, অসুৰা পৰাজযিংসু. পৰাজিতা চ, ভিক্খৱে, অসুৰা অপযিংসুযেৱ দক্খিণেনাভিমুখা, অভিযিংসু দেৱা’’.

অথ খো, ভিক্খৱে, অসুৰানং এতদহোসি – ‘অভিযন্তেৱ খো দেৱা. যংনূন মযং ততিযম্পি দেৱেহি সঙ্গামেয্যামা’তি. ততিযম্পি খো, ভিক্খৱে, অসুৰা দেৱেহি সঙ্গামেসুং. ততিযম্পি খো, ভিক্খৱে, দেৱা জিনিংসু, অসুৰা পৰাজযিংসু. পৰাজিতা চ, ভিক্খৱে, অসুৰা ভীতা অসুৰপুৰংযেৱ পৱিসিংসু. অসুৰপুৰগতানঞ্চ পন, ভিক্খৱে, অসুৰানং এতদহোসি – ‘ভীৰুত্তানগতেন খো দানি মযং এতৰহি অত্তনা ৱিহৰাম অকৰণীযা দেৱেহী’তি. দেৱানম্পি, ভিক্খৱে, এতদহোসি – ‘ভীৰুত্তানগতেন খো দানি অসুৰা এতৰহি অত্তনা ৱিহৰন্তি অকৰণীযা অম্হেহী’তি.

‘‘এৱমেৱং খো, ভিক্খৱে, যস্মিং সমযে ভিক্খু ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰতি, তস্মিং, ভিক্খৱে, সমযে ভিক্খুস্স এৱং হোতি – ‘ভীৰুত্তানগতেন খো দানাহং এতৰহি অত্তনা ৱিহৰামি অকৰণীযো মাৰস্সা’তি. মাৰস্সাপি, ভিক্খৱে, পাপিমতো এৱং হোতি – ‘ভীৰুত্তানগতেন খো দানি ভিক্খু এতৰহি অত্তনা ৱিহৰতি অকৰণীযো ময্হ’’’ন্তি.

‘‘যস্মিং, ভিক্খৱে, সমযে ভিক্খু ৱিতক্কৱিচাৰানং ৱূপসমা…পে… দুতিযং ঝানং… ততিযং ঝানং… চতুত্থং ঝানং উপসম্পজ্জ ৱিহৰতি, তস্মিং, ভিক্খৱে, সমযে ভিক্খুস্স এৱং হোতি – ‘ভীৰুত্তানগতেন খো দানাহং এতৰহি অত্তনা ৱিহৰামি অকৰণীযো মাৰস্সা’তি. মাৰস্সাপি, ভিক্খৱে, পাপিমতো এৱং হোতি – ‘ভীৰুত্তানগতেন খো দানি ভিক্খু এতৰহি অত্তনা ৱিহৰতি, অকৰণীযো ময্হ’’’ন্তি.

‘‘যস্মিং, ভিক্খৱে, সমযে ভিক্খু সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা ‘অনন্তো আকাসো’তি আকাসানঞ্চাযতনং উপসম্পজ্জ ৱিহৰতি. অযং ৱুচ্চতি, ভিক্খৱে, ‘ভিক্খু অন্তমকাসি মাৰং, অপদং ৱধিত্ৱা মাৰচক্খুং অদস্সনং গতো পাপিমতো তিণ্ণো লোকে ৱিসত্তিক’’’ন্তি.

‘‘যস্মিং, ভিক্খৱে, সমযে ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৱিঞ্ঞাণ’ন্তি ৱিঞ্ঞাণঞ্চাযতনং উপসম্পজ্জ ৱিহৰতি… সব্বসো ৱিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৱিহৰতি… সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰতি… সব্বসো নেৱসঞ্ঞানাসঞ্ঞাযতনং সমতিক্কম্ম সঞ্ঞাৱেদযিতনিৰোধং উপসম্পজ্জ ৱিহৰতি, পঞ্ঞায চস্স দিস্ৱা আসৱা পৰিক্খীণা হোন্তি. অযং ৱুচ্চতি, ভিক্খৱে, ‘ভিক্খু অন্তমকাসি মাৰং, অপদং ৱধিত্ৱা মাৰচক্খুং অদস্সনং গতো পাপিমতো তিণ্ণো লোকে ৱিসত্তিক’’’ন্তি. অট্ঠমং.