৬. আনন্দসুত্তং

৩৭. একং সমযং আযস্মা আনন্দো কোসম্বিযং ৱিহৰতি ঘোসিতাৰামে. তত্ৰ খো আযস্মা আনন্দো ভিক্খূ আমন্তেসি – ‘‘আৱুসো ভিক্খৱে’’তি. ‘‘আৱুসো’’তি খো তে ভিক্খূ আযস্মতো আনন্দস্স পচ্চস্সোসুং. আযস্মা আনন্দো এতদৱোচ –

‘‘অচ্ছৰিযং, আৱুসো, অব্ভুতং, আৱুসো! যাৱঞ্চিদং তেন ভগৱতা জানতা পস্সতা অৰহতা সম্মাসম্বুদ্ধেন সম্বাধে ওকাসাধিগমো অনুবুদ্ধো সত্তানং ৱিসুদ্ধিযা সোকপৰিদেৱানং সমতিক্কমায দুক্খদোমনস্সানং অত্থঙ্গমায ঞাযস্স অধিগমায নিব্বানস্স সচ্ছিকিৰিযায. তদেৱ নাম চক্খুং ভৱিস্সতি তে ৰূপা তঞ্চাযতনং নো পটিসংৱেদিস্সতি [পটিসংৱেদযতি (ক.)]. তদেৱ নাম সোতং ভৱিস্সতি তে সদ্দা তঞ্চাযতনং নো পটিসংৱেদিস্সতি. তদেৱ নাম ঘানং ভৱিস্সতি তে গন্ধা তঞ্চাযতনং নো পটিসংৱেদিস্সতি. সাৱ নাম জিৱ্হা ভৱিস্সতি তে ৰসা তঞ্চাযতনং নো পটিসংৱেদিস্সতি. সোৱ নাম কাযো ভৱিস্সতি তে ফোট্ঠব্বা তঞ্চাযতনং নো পটিসংৱেদিস্সতী’’তি.

এৱং ৱুত্তে আযস্মা উদাযী আযস্মন্তং আনন্দং এতদৱোচ – ‘‘সঞ্ঞীমেৱ নু খো, আৱুসো আনন্দ, তদাযতনং নো পটিসংৱেদেতি উদাহু অসঞ্ঞী’’তি? ‘‘সঞ্ঞীমেৱ খো, আৱুসো, তদাযতনং নো পটিসংৱেদেতি, নো অসঞ্ঞী’’তি.

‘‘কিংসঞ্ঞী পনাৱুসো, তদাযতনং নো পটিসংৱেদেতী’’তি? ‘‘ইধাৱুসো, ভিক্খু, সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা ‘অনন্তো আকাসো’তি আকাসানঞ্চাযতনং উপসম্পজ্জ ৱিহৰতি. এৱংসঞ্ঞীপি খো, আৱুসো, তদাযতনং নো পটিসংৱেদেতি.

‘‘পুন চপৰং, আৱুসো, ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৱিঞ্ঞাণ’ন্তি ৱিঞ্ঞাণঞ্চাযতনং উপসম্পজ্জ ৱিহৰতি. এৱংসঞ্ঞীপি খো, আৱুসো, তদাযতনং নো পটিসংৱেদেতি.

‘‘পুন চপৰং, আৱুসো, ভিক্খু সব্বসো ৱিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৱিহৰতি. এৱংসঞ্ঞীপি খো, আৱুসো, তদাযতনং নো পটিসংৱেদেতী’’তি.

‘‘একমিদাহং, আৱুসো, সমযং সাকেতে ৱিহৰামি অঞ্জনৱনে মিগদাযে. অথ খো, আৱুসো, জটিলৱাসিকা [জটিলগাহিযা (সী. পী.), জডিলভাগিকা (স্যা.)] ভিক্খুনী যেনাহং তেনুপসঙ্কমি; উপসঙ্কমিত্ৱা মং অভিৱাদেত্ৱা একমন্তং অট্ঠাসি. একমন্তং ঠিতা খো, আৱুসো, জটিলৱাসিকা ভিক্খুনী মং এতদৱোচ – ‘যাযং, ভন্তে আনন্দ, সমাধি ন চাভিনতো ন চাপনতো ন চ সসঙ্খাৰনিগ্গয্হৱাৰিতগতো [সসঙ্খাৰনিগ্গয্হৱাৰিতৱতো (সী. স্যা. কং. পী.), সসঙ্খাৰনিগ্গয্হৱাৰিৱাৱটো (ক.) অ. নি. ৩.১০২; ৫.২৭; দী. নি. ৩.৩৫৫], ৱিমুত্তত্তা ঠিতো, ঠিতত্তা সন্তুসিতো, সন্তুসিতত্তা নো পৰিতস্সতি. অযং, ভন্তে আনন্দ, সমাধি কিংফলো ৱুত্তো ভগৱতা’’’তি?

‘‘এৱং ৱুত্তে, সোহং, আৱুসো, জটিলৱাসিকং ভিক্খুনিং এতদৱোচং – ‘যাযং, ভগিনি, সমাধি ন চাভিনতো ন চাপনতো ন চ সসঙ্খাৰনিগ্গয্হৱাৰিতগতো, ৱিমুত্তত্তা ঠিতো, ঠিতত্তা সন্তুসিতো, সন্তুসিতত্তা নো পৰিতস্সতি. অযং, ভগিনি, সমাধি অঞ্ঞাফলো ৱুত্তো ভগৱতা’তি. এৱংসঞ্ঞীপি খো, আৱুসো, তদাযতনং নো পটিসংৱেদেতী’’তি. ছট্ঠং.