১০. তপুস্সসুত্তং

৪১. একং সমযং ভগৱা মল্লেসু ৱিহৰতি উৰুৱেলকপ্পং নাম মল্লানং নিগমো. অথ খো ভগৱা পুব্বণ্হসমযং নিৱাসেত্ৱা পত্তচীৱৰমাদায উৰুৱেলকপ্পং পিণ্ডায পাৱিসি. উৰুৱেলকপ্পে পিণ্ডায চৰিত্ৱা পচ্ছাভত্তং পিণ্ডপাতপটিক্কন্তো আযস্মন্তং আনন্দং আমন্তেসি – ‘‘ইধেৱ তাৱ ত্ৱং, আনন্দ, হোহি, যাৱাহং মহাৱনং অজ্ঝোগাহামি দিৱাৱিহাৰাযা’’তি. ‘‘এৱং, ভন্তে’’তি খো আযস্মা আনন্দো ভগৱতো পচ্চস্সোসি. অথ খো ভগৱা মহাৱনং অজ্ঝোগাহেত্ৱা অঞ্ঞতৰস্মিং ৰুক্খমূলে দিৱাৱিহাৰং নিসীদি.

অথ খো তপুস্সো গহপতি যেনাযস্মা আনন্দো তেনুপসঙ্কমি; উপসঙ্কমিত্ৱা আযস্মন্তং আনন্দং অভিৱাদেত্ৱা একমন্তং নিসীদি. একমন্তং নিসিন্নো খো তপুস্সো গহপতি আযস্মন্তং আনন্দং এতদৱোচ –

‘‘মযং, ভন্তে আনন্দ, গিহী কামভোগিনো কামাৰামা কামৰতা কামসম্মুদিতা. তেসং নো, ভন্তে, অম্হাকং গিহীনং কামভোগীনং কামাৰামানং কামৰতানং কামসম্মুদিতানং পপাতো ৱিয খাযতি, যদিদং নেক্খম্মং. সুতং মেতং, ভন্তে, ‘ইমস্মিং ধম্মৱিনযে দহৰানং দহৰানং ভিক্খূনং নেক্খম্মে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো’ [পস্সতং (?)]. তযিদং, ভন্তে, ইমস্মিং ধম্মৱিনযে ভিক্খূনং বহুনা জনেন ৱিসভাগো, যদিদং নেক্খম্ম’’ন্তি.

‘‘অত্থি খো এতং, গহপতি, কথাপাভতং ভগৱন্তং দস্সনায. আযাম, গহপতি, যেন ভগৱা তেনুপসঙ্কমিস্সাম; উপসঙ্কমিত্ৱা ভগৱতো এতমত্থং আৰোচেস্সাম. যথা নো ভগৱা ব্যাকৰিস্সতি তথা নং ধাৰেস্সামা’’তি.

‘‘এৱং, ভন্তে’’তি খো তপুস্সো গহপতি আযস্মতো আনন্দস্স পচ্চস্সোসি. অথ খো আযস্মা আনন্দো তপুস্সেন গহপতিনা সদ্ধিং যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা আনন্দো ভগৱন্তং এতদৱোচ –

‘‘অযং, ভন্তে, তপুস্সো গহপতি এৱমাহ – ‘মযং, ভন্তে আনন্দ, গিহী কামভোগিনো কামাৰামা কামৰতা কামসম্মুদিতা, তেসং নো ভন্তে, অম্হাকং গিহীনং কামভোগীনং কামাৰামানং কামৰতানং কামসম্মুদিতানং পপাতো ৱিয খাযতি, যদিদং নেক্খম্মং’. সুতং মেতং, ভন্তে, ‘ইমস্মিং ধম্মৱিনযে দহৰানং দহৰানং ভিক্খূনং নেক্খম্মে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো. তযিদং, ভন্তে, ইমস্মিং ধম্মৱিনযে ভিক্খূনং বহুনা জনেন ৱিসভাগো যদিদং নেক্খম্ম’’’ন্তি.

‘‘এৱমেতং, আনন্দ, এৱমেতং, আনন্দ! ময্হম্পি খো, আনন্দ, পুব্বেৱ সম্বোধা অনভিসম্বুদ্ধস্স বোধিসত্তস্সেৱ সতো এতদহোসি – ‘সাধু নেক্খম্মং, সাধু পৱিৱেকো’তি. তস্স ময্হং, আনন্দ, নেক্খম্মে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে নেক্খম্মে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘কামেসু খো মে আদীনৱো অদিট্ঠো, সো চ মে অবহুলীকতো, নেক্খম্মে চ আনিসংসো অনধিগতো, সো চ মে অনাসেৱিতো. তস্মা মে নেক্খম্মে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং কামেসু আদীনৱং দিস্ৱা তং বহুলং কৰেয্যং [বহুলীকৰেয্যং (সী. স্যা. পী.)], নেক্খম্মে আনিসংসং অধিগম্ম তমাসেৱেয্যং, ঠানং খো পনেতং ৱিজ্জতি যং মে নেক্খম্মে চিত্তং পক্খন্দেয্য পসীদেয্য সন্তিট্ঠেয্য ৱিমুচ্চেয্য এতং সন্তন্তি পস্সতো’. সো খো অহং, আনন্দ, অপৰেন সমযেন কামেসু আদীনৱং দিস্ৱা তং বহুলমকাসিং, নেক্খম্মে আনিসংসং অধিগম্ম তমাসেৱিং. তস্স ময্হং, আনন্দ, নেক্খম্মে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো. সো খো অহং, আনন্দ, ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰামি. তস্স ময্হং, আনন্দ, ইমিনা ৱিহাৰেন ৱিহৰতো কামসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স মে কামসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং ৱিতক্কৱিচাৰানং ৱূপসমা…পে… দুতিযং ঝানং উপসম্পজ্জ ৱিহৰেয্য’ন্তি. তস্স ময্হং, আনন্দ, অৱিতক্কে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে অৱিতক্কে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘ৱিতক্কেসু খো মে আদীনৱো অদিট্ঠো, সো চ মে অবহুলীকতো, অৱিতক্কে চ আনিসংসো অনধিগতো, সো চ মে অনাসেৱিতো. তস্মা মে অৱিতক্কে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং ৱিতক্কেসু আদীনৱং দিস্ৱা তং বহুলং কৰেয্যং, অৱিতক্কে আনিসংসং অধিগম্ম তমাসেৱেয্যং, ঠানং খো পনেতং ৱিজ্জতি যং মে অৱিতক্কে চিত্তং পক্খন্দেয্য পসীদেয্য সন্তিট্ঠেয্য ৱিমুচ্চেয্য এতং সন্তন্তি পস্সতো’. সো খো অহং, আনন্দ, অপৰেন সমযেন ৱিতক্কেসু আদীনৱং দিস্ৱা তং বহুলমকাসিং, অৱিতক্কে আনিসংসং অধিগম্ম তমাসেৱিং. তস্স ময্হং, আনন্দ, অৱিতক্কে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো. সো খো অহং, আনন্দ, ৱিতক্কৱিচাৰানং ৱূপসমা…পে… দুতিযং ঝানং উপসম্পজ্জ ৱিহৰামি. তস্স ময্হং, আনন্দ, ইমিনা ৱিহাৰেন ৱিহৰতো ৱিতক্কসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স মে ৱিতক্কসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং পীতিযা চ ৱিৰাগা উপেক্খকো চ ৱিহৰেয্যং সতো চ সম্পজানো সুখঞ্চ কাযেন পটিসংৱেদেয্যং যং তং অৰিযা আচিক্খন্তি – উপেক্খকো সতিমা সুখৱিহাৰীতি ততিযং ঝানং উপসম্পজ্জ ৱিহৰেয্য’ন্তি. তস্স ময্হং, আনন্দ, নিপ্পীতিকে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে নিপ্পীতিকে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘পীতিযা খো মে আদীনৱো অদিট্ঠো, সো চ মে অবহুলীকতো, নিপ্পীতিকে চ আনিসংসো অনধিগতো, সো চ মে অনাসেৱিতো. তস্মা মে নিপ্পীতিকে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং পীতিযা আদীনৱং দিস্ৱা তং বহুলং কৰেয্যং, নিপ্পীতিকে আনিসংসং অধিগম্ম তমাসেৱেয্যং, ঠানং খো পনেতং ৱিজ্জতি যং মে নিপ্পীতিকে চিত্তং পক্খন্দেয্য পসীদেয্য সন্তিট্ঠেয্য ৱিমুচ্চেয্য এতং সন্তন্তি পস্সতো’. সো খো অহং, আনন্দ, অপৰেন সমযেন পীতিযা আদীনৱং দিস্ৱা তং বহুলমকাসিং, নিপ্পীতিকে আনিসংসং অধিগম্ম তমাসেৱিং. তস্স ময্হং, আনন্দ, নিপ্পীতিকে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো. সো খো অহং, আনন্দ, পীতিযা চ ৱিৰাগা…পে… ততিযং ঝানং উপসম্পজ্জ ৱিহৰামি. তস্স ময্হং, আনন্দ, ইমিনা ৱিহাৰেন ৱিহৰতো পীতিসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স মে পীতিসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং সুখস্স চ পহানা দুক্খস্স চ পহানা পুব্বেৱ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপাৰিসুদ্ধিং চতুত্থং ঝানং উপসম্পজ্জ ৱিহৰেয্য’ন্তি. তস্স ময্হং, আনন্দ, অদুক্খমসুখে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে অদুক্খমসুখে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘উপেক্খাসুখে খো মে আদীনৱো অদিট্ঠো, সো চ মে অবহুলীকতো, অদুক্খমসুখে চ আনিসংসো অনধিগতো, সো চ মে অনাসেৱিতো. তস্মা মে অদুক্খমসুখে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং উপেক্খাসুখে আদীনৱং দিস্ৱা তং বহুলং কৰেয্যং, অদুক্খমসুখে আনিসংসং অধিগম্ম তমাসেৱেয্যং, ঠানং খো পনেতং ৱিজ্জতি যং মে অদুক্খমসুখে চিত্তং পক্খন্দেয্য পসীদেয্য সন্তিট্ঠেয্য ৱিমুচ্চেয্য এতং সন্তন্তি পস্সতো’. সো খো অহং, আনন্দ, অপৰেন সমযেন উপেক্খাসুখে আদীনৱং দিস্ৱা তং বহুলমকাসিং অদুক্খমসুখে আনিসংসং অধিগম্ম তমাসেৱিং. তস্স ময্হং, আনন্দ, অদুক্খমসুখে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো. সো খো অহং, আনন্দ, সুখস্স চ পহানা…পে… চতুত্থং ঝানং উপসম্পজ্জ ৱিহৰামি. তস্স ময্হং, আনন্দ, ইমিনা ৱিহাৰেন ৱিহৰতো উপেক্খাসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স মে উপেক্খাসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা ‘‘অনন্তো আকাসো’’তি আকাসানঞ্চাযতনং উপসম্পজ্জ ৱিহৰেয্য’ন্তি. তস্স ময্হং, আনন্দ, আকাসানঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে আকাসানঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘ৰূপেসু খো মে আদীনৱো অদিট্ঠো, সো চ অবহুলীকতো, আকাসানঞ্চাযতনে চ আনিসংসো অনধিগতো, সো চ মে অনাসেৱিতো. তস্মা মে আকাসানঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং ৰূপেসু আদীনৱং দিস্ৱা তং বহুলং কৰেয্যং, আকাসানঞ্চাযতনে আনিসংসং অধিগম্ম তমাসেৱেয্যং, ঠানং খো পনেতং ৱিজ্জতি যং মে আকাসানঞ্চাযতনে চিত্তং পক্খন্দেয্য পসীদেয্য সন্তিট্ঠেয্য ৱিমুচ্চেয্য এতং সন্তন্তি পস্সতো’. সো খো অহং, আনন্দ, অপৰেন সমযেন ৰূপেসু আদীনৱং দিস্ৱা তং বহুলমকাসিং, আকাসানঞ্চাযতনে আনিসংসং অধিগম্ম তমাসেৱিং. তস্স ময্হং, আনন্দ, আকাসানঞ্চাযতনে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো. সো খো অহং, আনন্দ, সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা ‘অনন্তো আকাসো’তি আকাসানঞ্চাযতনং উপসম্পজ্জ ৱিহৰামি. তস্স ময্হং, আনন্দ, ইমিনা ৱিহাৰেন ৱিহৰতো ৰূপসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স মে ৰূপসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং সব্বসো আকাসানঞ্চাযতনং সমতিক্কম্ম ‘‘অনন্তং ৱিঞ্ঞাণ’’ন্তি ৱিঞ্ঞাণঞ্চাযতনং উপসম্পজ্জ ৱিহৰেয্য’ন্তি. তস্স ময্হং, আনন্দ, ৱিঞ্ঞাণঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে ৱিঞ্ঞাণঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘আকাসানঞ্চাযতনে খো মে আদীনৱো অদিট্ঠো, সো চ অবহুলীকতো, ৱিঞ্ঞাণঞ্চাযতনে চ আনিসংসো অনধিগতো, সো চ মে অনাসেৱিতো. তস্মা মে ৱিঞ্ঞাণঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং আকাসানঞ্চাযতনে আদীনৱং দিস্ৱা তং বহুলং কৰেয্যং, ৱিঞ্ঞাণঞ্চাযতনে আনিসংসং অধিগম্ম তমাসেৱেয্যং, ঠানং খো পনেতং ৱিজ্জতি যং মে ৱিঞ্ঞাণঞ্চাযতনে চিত্তং পক্খন্দেয্য পসীদেয্য সন্তিট্ঠেয্য ৱিমুচ্চেয্য এতং সন্তন্তি পস্সতো’. সো খো অহং, আনন্দ, অপৰেন সমযেন আকাসানঞ্চাযতনে আদীনৱং দিস্ৱা তং বহুলমকাসিং, ৱিঞ্ঞাণঞ্চাযতনে আনিসংসং অধিগম্ম তমাসেৱিং. তস্স ময্হং, আনন্দ, ৱিঞ্ঞাণঞ্চাযতনে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো. সো খো অহং, আনন্দ, সব্বসো আকাসানঞ্চাযতনং সমতিক্কম্ম ‘অনন্তং ৱিঞ্ঞাণ’ন্তি ৱিঞ্ঞাণঞ্চাযতনং উপসম্পজ্জ ৱিহৰামি. তস্স ময্হং, আনন্দ, ইমিনা ৱিহাৰেন ৱিহৰতো আকাসানঞ্চাযতনসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স মে আকাসানঞ্চাযতনসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং সব্বসো ৱিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৱিহৰেয্য’ন্তি. তস্স ময্হং, আনন্দ, আকিঞ্চঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে আকিঞ্চঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘ৱিঞ্ঞাণঞ্চাযতনে খো মে আদীনৱো অদিট্ঠো, সো চ মে অবহুলীকতো, আকিঞ্চঞ্ঞাযতনে চ আনিসংসো অনধিগতো, সো চ মে অনাসেৱিতো. তস্মা মে আকিঞ্চঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং ৱিঞ্ঞাণঞ্চাযতনে আদীনৱং দিস্ৱা তং বহুলং কৰেয্যং, আকিঞ্চঞ্ঞাযতনে আনিসংসং অধিগম্ম তমাসেৱেয্যং, ঠানং খো পনেতং ৱিজ্জতি যং মে আকিঞ্চঞ্ঞাযতনে চিত্তং পক্খন্দেয্য পসীদেয্য সন্তিট্ঠেয্য ৱিমুচ্চেয্য এতং সন্তন্তি পস্সতো’. সো খো অহং, আনন্দ, অপৰেন সমযেন ৱিঞ্ঞাণঞ্চাযতনে আদীনৱং দিস্ৱা তং বহুলমকাসিং, আকিঞ্চঞ্ঞাযতনে আনিসংসং অধিগম্ম তমাসেৱিং. তস্স ময্হং, আনন্দ, আকিঞ্চঞ্ঞাযতনে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো. সো খো অহং, আনন্দ, সব্বসো ৱিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৱিহৰামি. তস্স ময্হং, আনন্দ, ইমিনা ৱিহাৰেন ৱিহৰতো ৱিঞ্ঞাণঞ্চাযতনসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স মে ৱিঞ্ঞাণঞ্চাযতনসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰেয্য’ন্তি. তস্স ময্হং, আনন্দ, নেৱসঞ্ঞানাসঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে নেৱসঞ্ঞানাসঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘আকিঞ্চঞ্ঞাযতনে খো মে আদীনৱো অদিট্ঠো, সো চ মে অবহুলীকতো, নেৱসঞ্ঞানাসঞ্ঞাযতনে চ আনিসংসো অনধিগতো, সো চ মে অনাসেৱিতো. তস্মা মে নেৱসঞ্ঞানাসঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং আকিঞ্চঞ্ঞাযতনে আদীনৱং দিস্ৱা তং বহুলং কৰেয্যং, নেৱসঞ্ঞানাসঞ্ঞাযতনে আনিসংসং অধিগম্ম তমাসেৱেয্যং, ঠানং খো পনেতং ৱিজ্জতি যং মে নেৱসঞ্ঞানাসঞ্ঞাযতনে চিত্তং পক্খন্দেয্য পসীদেয্য সন্তিট্ঠেয্য ৱিমুচ্চেয্য এতং সন্তন্তি পস্সতো’. সো খো অহং, আনন্দ, অপৰেন সমযেন আকিঞ্চঞ্ঞাযতনে আদীনৱং দিস্ৱা তং বহুলমকাসিং, নেৱসঞ্ঞানাসঞ্ঞাযতনে আনিসংসং অধিগম্ম তমাসেৱিং. তস্স ময্হং, আনন্দ, নেৱসঞ্ঞানাসঞ্ঞাযতনে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো. সো খো অহং, আনন্দ, সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰামি. তস্স ময্হং, আনন্দ, ইমিনা ৱিহাৰেন ৱিহৰতো আকিঞ্চঞ্ঞাযতনসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স মে আকিঞ্চঞ্ঞাযতনসহগতা সঞ্ঞামনসিকাৰা সমুদাচৰন্তি. স্ৱস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং নেৱসঞ্ঞানাসঞ্ঞাযতনং সমতিক্কম্ম সঞ্ঞাৱেদযিতনিৰোধং উপসম্পজ্জ ৱিহৰেয্য’ন্তি. তস্স ময্হং, আনন্দ, সঞ্ঞাৱেদযিতনিৰোধে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু, কো পচ্চযো, যেন মে সঞ্ঞাৱেদযিতনিৰোধে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘নেৱসঞ্ঞানাসঞ্ঞাযতনে খো মে আদীনৱো অদিট্ঠো, সো চ মে অবহুলীকতো, সঞ্ঞাৱেদযিতনিৰোধে চ আনিসংসো অনধিগতো, সো চ মে অনাসেৱিতো. তস্মা মে সঞ্ঞাৱেদযিতনিৰোধে চিত্তং ন পক্খন্দতি নপ্পসীদতি ন সন্তিট্ঠতি ন ৱিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং নেৱসঞ্ঞানাসঞ্ঞাযতনে আদীনৱং দিস্ৱা তং বহুলং কৰেয্যং, সঞ্ঞাৱেদযিতনিৰোধে আনিসংসং অধিগম্ম তমাসেৱেয্যং, ঠানং খো পনেতং ৱিজ্জতি যং মে সঞ্ঞাৱেদযিতনিৰোধে চিত্তং পক্খন্দেয্য পসীদেয্য সন্তিট্ঠেয্য ৱিমুচ্চেয্য এতং সন্তন্তি পস্সতো’. সো খো অহং, আনন্দ, অপৰেন সমযেন নেৱসঞ্ঞানাসঞ্ঞাযতনে আদীনৱং দিস্ৱা তং বহুলমকাসিং, সঞ্ঞাৱেদযিতনিৰোধে আনিসংসং অধিগম্ম তমাসেৱিং. তস্স ময্হং, আনন্দ, সঞ্ঞাৱেদযিতনিৰোধে চিত্তং পক্খন্দতি পসীদতি সন্তিট্ঠতি ৱিমুচ্চতি এতং সন্তন্তি পস্সতো. সো খো অহং, আনন্দ, সব্বসো নেৱসঞ্ঞানাসঞ্ঞাযতনং সমতিক্কম্ম সঞ্ঞাৱেদযিতনিৰোধং উপসম্পজ্জ ৱিহৰামি, পঞ্ঞায চ মে দিস্ৱা আসৱা পৰিক্খযং অগমংসু.

‘‘যাৱকীৱঞ্চাহং, আনন্দ, ইমা নৱ অনুপুব্বৱিহাৰসমাপত্তিযো ন এৱং অনুলোমপটিলোমং সমাপজ্জিম্পি ৱুট্ঠহিম্পি, নেৱ তাৱাহং, আনন্দ, সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায ‘অনুত্তৰং সম্মাসম্বোধিং অভিসম্বুদ্ধো’তি পচ্চঞ্ঞাসিং. যতো চ খো অহং, আনন্দ, ইমা নৱ অনুপুব্বৱিহাৰসমাপত্তিযো এৱং অনুলোমপটিলোমং সমাপজ্জিম্পি ৱুট্ঠহিম্পি, অথাহং, আনন্দ, সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায ‘অনুত্তৰং সম্মাসম্বোধিং অভিসম্বুদ্ধো’তি পচ্চঞ্ঞাসিং. ঞাণঞ্চ পন মে দস্সনং উদপাদি – ‘অকুপ্পা মে চেতোৱিমুত্তি [ৱিমুত্তি (ক. সী. ক.)], অযমন্তিমা জাতি, নত্থি দানি পুনব্ভৱো’’’তি. দসমং.

মহাৱগ্গো চতুত্থো.