১১. অনুপুব্বনিৰোধসুত্তং

৩১. ‘‘নৱযিমে, ভিক্খৱে, অনুপুব্বনিৰোধা. কতমে নৱ? পঠমং ঝানং সমাপন্নস্স কামসঞ্ঞা [আমিস্সসঞ্ঞা (স্যা.)] নিৰুদ্ধা হোতি; দুতিযং ঝানং সমাপন্নস্স ৱিতক্কৱিচাৰা নিৰুদ্ধা হোন্তি; ততিযং ঝানং সমাপন্নস্স পীতি নিৰুদ্ধা হোতি; চতুত্থং ঝানং সমাপন্নস্স অস্সাসপস্সাসা নিৰুদ্ধা হোন্তি; আকাসানঞ্চাযতনং সমাপন্নস্স ৰূপসঞ্ঞা নিৰুদ্ধা হোতি; ৱিঞ্ঞাণঞ্চাযতনং সমাপন্নস্স আকাসানঞ্চাযতনসঞ্ঞা নিৰুদ্ধা হোতি; আকিঞ্চঞ্ঞাযতনং সমাপন্নস্স ৱিঞ্ঞাণঞ্চাযতনসঞ্ঞা নিৰুদ্ধা হোতি; নেৱসঞ্ঞানাসঞ্ঞাযতনং সমাপন্নস্স আকিঞ্চঞ্ঞাযতনসঞ্ঞা নিৰুদ্ধা হোতি; সঞ্ঞাৱেদযিতনিৰোধং সমাপন্নস্স সঞ্ঞা চ ৱেদনা চ নিৰুদ্ধা হোন্তি. ইমে খো, ভিক্খৱে, নৱ অনুপুব্বনিৰোধা’’তি [দী. নি. ৩.৩৪৪, ৩৪৯]. একাদসমং.

সত্তাৱাসৱগ্গো ততিযো.