২. সউপাদিসেসসুত্তং

১২. একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো আযস্মা সাৰিপুত্তো পুব্বণ্হসমযং নিৱাসেত্ৱা পত্তচীৱৰমাদায সাৱত্থিং পিণ্ডায পাৱিসি. অথ খো আযস্মতো সাৰিপুত্তস্স এতদহোসি – ‘‘অতিপ্পগো খো তাৱ সাৱত্থিযং পিণ্ডায চৰিতুং, যংনূনাহং যেন অঞ্ঞতিত্থিযানং পৰিব্বাজকানং আৰামো তেনুপসঙ্কমেয্য’’ন্তি. অথ খো আযস্মা সাৰিপুত্তো যেন অঞ্ঞতিত্থিযানং পৰিব্বাজকানং আৰামো তেনুপসঙ্কমি; উপসঙ্কমিত্ৱা তেহি অঞ্ঞতিত্থিযেহি পৰিব্বাজকেহি সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি.

তেন খো পন সমযেন তেসং অঞ্ঞতিত্থিযানং পৰিব্বাজকানং সন্নিসিন্নানং সন্নিপতিতানং অযমন্তৰাকথা উদপাদি – ‘‘যো হি কোচি, আৱুসো, সউপাদিসেসো কালং কৰোতি, সব্বো সো অপৰিমুত্তো নিৰযা অপৰিমুত্তো তিৰচ্ছানযোনিযা অপৰিমুত্তো পেত্তিৱিসযা অপৰিমুত্তো অপাযদুগ্গতিৱিনিপাতা’’তি. অথ খো আযস্মা সাৰিপুত্তো তেসং অঞ্ঞতিত্থিযানং পৰিব্বাজকানং ভাসিতং নেৱ অভিনন্দি নপ্পটিক্কোসি. অনভিনন্দিত্ৱা অপ্পটিক্কোসিত্ৱা উট্ঠাযাসনা পক্কামি – ‘‘ভগৱতো সন্তিকে এতস্স ভাসিতস্স অত্থং আজানিস্সামী’’তি. অথ খো আযস্মা সাৰিপুত্তো সাৱত্থিযং পিণ্ডায চৰিত্ৱা পচ্ছাভত্তং পিণ্ডপাতপটিক্কন্তো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা সাৰিপুত্তো ভগৱন্তং এতদৱোচ –

‘‘ইধাহং, ভন্তে, পুব্বণ্হসমযং নিৱাসেত্ৱা পত্তচীৱৰমাদায সাৱত্থিং পিণ্ডায পাৱিসিং. তস্স ময্হং, ভন্তে, এতদহোসি – ‘অতিপ্পগো খো তাৱ সাৱত্থিযং পিণ্ডায চৰিতুং; যংনূনাহং যেন অঞ্ঞতিত্থিযানং পৰিব্বাজকানং আৰামো তেনুপসঙ্কমেয্য’ন্তি. অথ খো অহং, ভন্তে, যেন অঞ্ঞতিত্থিযানং পৰিব্বাজকানং আৰামো তেনুপসঙ্কমিং; উপসঙ্কমিত্ৱা তেহি অঞ্ঞতিত্থিযেহি পৰিব্বাজকেহি সদ্ধিং সম্মোদিং. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদিং. তেন খো পন সমযেন তেসং অঞ্ঞতিত্থিযানং পৰিব্বাজকানং সন্নিসিন্নানং সন্নিপতিতানং অযমন্তৰাকথা উদপাদি – ‘যো হি কোচি, আৱুসো, সউপাদিসেসো কালং কৰোতি, সব্বো সো অপৰিমুত্তো নিৰযা অপৰিমুত্তো তিৰচ্ছানযোনিযা অপৰিমুত্তো পেত্তিৱিসযা অপৰিমুত্তো অপাযদুগ্গতিৱিনিপাতা’তি. অথ খো অহং, ভন্তে, তেসং অঞ্ঞতিত্থিযানং পৰিব্বাজকানং ভাসিতং নেৱ অভিনন্দিং নপ্পটিক্কোসিং. অনভিনন্দিত্ৱা অপ্পটিক্কোসিত্ৱা উট্ঠাযাসনা পক্কমিং – ‘ভগৱতো সন্তিকে এতস্স ভাসিতস্স অত্থং আজানিস্সামী’’’তি.

‘‘কে চ [কেচি (স্যা. পী.), তে চ (ক.)], সাৰিপুত্ত, অঞ্ঞতিত্থিযা পৰিব্বাজকা বালা অব্যত্তা, কে চ [কেচি (স্যা. পী. ক.) অ. নি. ৬.৪৪ পাড়িযা সংসন্দেতব্বং] সউপাদিসেসং ৱা ‘সউপাদিসেসো’তি জানিস্সন্তি, অনুপাদিসেসং ৱা ‘অনুপাদিসেসো’তি জানিস্সন্তি’’!

‘‘নৱযিমে, সাৰিপুত্ত, পুগ্গলা সউপাদিসেসা কালং কুৰুমানা পৰিমুত্তা নিৰযা পৰিমুত্তা তিৰচ্ছানযোনিযা পৰিমুত্তা পেত্তিৱিসযা পৰিমুত্তা অপাযদুগ্গতিৱিনিপাতা. কতমে নৱ? ইধ, সাৰিপুত্ত, একচ্চো পুগ্গলো সীলেসু পৰিপূৰকাৰী হোতি, সমাধিস্মিং পৰিপূৰকাৰী, পঞ্ঞায মত্তসো কাৰী. সো পঞ্চন্নং ওৰম্ভাগিযানং সংযোজনানং পৰিক্খযা অন্তৰাপৰিনিব্বাযী হোতি. অযং, সাৰিপুত্ত, পঠমো পুগ্গলো সউপাদিসেসো কালং কুৰুমানো পৰিমুত্তো নিৰযা পৰিমুত্তো তিৰচ্ছানযোনিযা পৰিমুত্তো পেত্তিৱিসযা পৰিমুত্তো অপাযদুগ্গতিৱিনিপাতা.

‘‘পুন চপৰং, সাৰিপুত্ত, ইধেকচ্চো পুগ্গলো সীলেসু পৰিপূৰকাৰী হোতি, সমাধিস্মিং পৰিপূৰকাৰী, পঞ্ঞায মত্তসো কাৰী. সো পঞ্চন্নং ওৰম্ভাগিযানং সংযোজনানং পৰিক্খযা উপহচ্চপৰিনিব্বাযী হোতি…পে… অসঙ্খাৰপৰিনিব্বাযী হোতি…পে… সসঙ্খাৰপৰিনিব্বাযী হোতি…পে… উদ্ধংসোতো হোতি অকনিট্ঠগামী. অযং, সাৰিপুত্ত, পঞ্চমো পুগ্গলো সউপাদিসেসো কালং কুৰুমানো পৰিমুত্তো নিৰযা পৰিমুত্তো তিৰচ্ছানযোনিযা পৰিমুত্তো পেত্তিৱিসযা পৰিমুত্তো অপাযদুগ্গতিৱিনিপাতা.

‘‘পুন চপৰং, সাৰিপুত্ত, ইধেকচ্চো পুগ্গলো সীলেসু পৰিপূৰকাৰী হোতি, সমাধিস্মিং মত্তসো কাৰী, পঞ্ঞায মত্তসো কাৰী. সো তিণ্ণং সংযোজনানং পৰিক্খযা ৰাগদোসমোহানং তনুত্তা সকদাগামী হোতি, সকিদেৱ ইমং লোকং আগন্ত্ৱা দুক্খস্সন্তং কৰোতি. অযং, সাৰিপুত্ত, ছট্ঠো পুগ্গলো সউপাদিসেসো কালং কুৰুমানো পৰিমুত্তো নিৰযা…পে… পৰিমুত্তো অপাযদুগ্গতিৱিনিপাতা.

‘‘পুন চপৰং, সাৰিপুত্ত, ইধেকচ্চো পুগ্গলো সীলেসু পৰিপূৰকাৰী হোতি, সমাধিস্মিং মত্তসো কাৰী, পঞ্ঞায মত্তসো কাৰী. সো তিণ্ণং সংযোজনানং পৰিক্খযা একবীজী হোতি, একংযেৱ মানুসকং ভৱং নিব্বত্তেত্ৱা দুক্খস্সন্তং কৰোতি. অযং, সাৰিপুত্ত, সত্তমো পুগ্গলো সউপাদিসেসো কালং কুৰুমানো পৰিমুত্তো নিৰযা…পে… পৰিমুত্তো অপাযদুগ্গতিৱিনিপাতা.

‘‘পুন চপৰং, সাৰিপুত্ত, ইধেকচ্চো পুগ্গলো সীলেসু পৰিপূৰকাৰী হোতি, সমাধিস্মিং মত্তসো কাৰী, পঞ্ঞায মত্তসো কাৰী. সো তিণ্ণং সংযোজনানং পৰিক্খযা কোলংকোলো হোতি, দ্ৱে ৱা তীণি ৱা কুলানি সন্ধাৱিত্ৱা সংসৰিত্ৱা দুক্খস্সন্তং কৰোতি. অযং, সাৰিপুত্ত, অট্ঠমো পুগ্গলো সউপাদিসেসো কালং কুৰুমানো পৰিমুত্তো নিৰযা…পে… পৰিমুত্তো অপাযদুগ্গতিৱিনিপাতা.

‘‘পুন চপৰং, সাৰিপুত্ত, ইধেকচ্চো পুগ্গলো সীলেসু পৰিপূৰকাৰী হোতি, সমাধিস্মিং মত্তসো কাৰী, পঞ্ঞায মত্তসো কাৰী. সো তিণ্ণং সংযোজনানং পৰিক্খযা সত্তক্খত্তুপৰমো হোতি, সত্তক্খত্তুপৰমং দেৱে চ মনুস্সে চ সন্ধাৱিত্ৱা সংসৰিত্ৱা দুক্খস্সন্তং কৰোতি. অযং, সাৰিপুত্ত, নৱমো পুগ্গলো সউপাদিসেসো কালং কুৰুমানো পৰিমুত্তো নিৰযা পৰিমুত্তো তিৰচ্ছানযোনিযা পৰিমুত্তো পেত্তিৱিসযা পৰিমুত্তো অপাযদুগ্গতিৱিনিপাতা.

‘‘কে চ, সাৰিপুত্ত, অঞ্ঞতিত্থিযা পৰিব্বাজকা বালা অব্যত্তা, কে চ সউপাদিসেসং ৱা ‘সউপাদিসেসো’তি জানিস্সন্তি, অনুপাদিসেসং ৱা ‘অনুপাদিসেসো’তি জানিস্সন্তি! ইমে খো, সাৰিপুত্ত, নৱ পুগ্গলা সউপাদিসেসা কালং কুৰুমানা পৰিমুত্তা নিৰযা পৰিমুত্তা তিৰচ্ছানযোনিযা পৰিমুত্তা পেত্তিৱিসযা পৰিমুত্তা অপাযদুগ্গতিৱিনিপাতা. ন তাৱাযং, সাৰিপুত্ত, ধম্মপৰিযাযো পটিভাসি ভিক্খূনং ভিক্খুনীনং উপাসকানং উপাসিকানং. তং কিস্স হেতু? মাযিমং ধম্মপৰিযাযং সুত্ৱা পমাদং আহৰিংসূতি [আহৰিংসু (সী. পী.)]. অপি চ মযা [অপি চাযং (?)], সাৰিপুত্ত, ধম্মপৰিযাযো পঞ্হাধিপ্পাযেন ভাসিতো’’তি. দুতিযং.