৬. যসসুত্তং

৮৬. একং সমযং ভগৱা কোসলেসু চাৰিকং চৰমানো মহতা ভিক্খুসঙ্ঘেন সদ্ধিং যেন ইচ্ছানঙ্গলং নাম কোসলানং ব্ৰাহ্মণগামো তদৱসৰি. তত্ৰ সুদং ভগৱা ইচ্ছানঙ্গলে ৱিহৰতি ইচ্ছানঙ্গলৱনসণ্ডে. অস্সোসুং খো ইচ্ছানঙ্গলকা ব্ৰাহ্মণগহপতিকা – ‘‘সমণো খলু ভো গোতমো সক্যপুত্তো সক্যকুলা পব্বজিতো ইচ্ছানঙ্গলং অনুপ্পত্তো ইচ্ছানঙ্গলে ৱিহৰতি ইচ্ছানঙ্গলৱনসণ্ডে. তং খো পন ভৱন্তং গোতমং এৱং কল্যাণো কিত্তিসদ্দো অব্ভুগ্গতো – ‘ইতিপি সো ভগৱা অৰহং সম্মাসম্বুদ্ধো…পে… সাধু খো পন তথাৰূপানং অৰহতং দস্সনং হোতী’’’তি.

অথ খো ইচ্ছানঙ্গলকা ব্ৰাহ্মণগহপতিকা তস্সা ৰত্তিযা অচ্চযেন পহুতং খাদনীযং ভোজনীযং আদায যেন ইচ্ছানঙ্গলৱনসণ্ডো তেনুপসঙ্কমিংসু; উপসঙ্কমিত্ৱা বহিদ্ৱাৰকোট্ঠকে অট্ঠংসু উচ্চাসদ্দা মহাসদ্দা. তেন খো পন সমযেন আযস্মা নাগিতো ভগৱতো উপট্ঠাকো হোতি. অথ খো ভগৱা আযস্মন্তং নাগিতং আমন্তেসি – ‘‘কে পন তে, নাগিত, উচ্চাসদ্দা মহাসদ্দা কেৱট্টা মঞ্ঞে মচ্ছৱিলোপে’’তি? ‘‘এতে, ভন্তে, ইচ্ছানঙ্গলকা ব্ৰাহ্মণগহপতিকা পহুতং খাদনীযং ভোজনীযং আদায বহিদ্ৱাৰকোট্ঠকে ঠিতা ভগৱন্তংযেৱ উদ্দিস্স ভিক্খুসঙ্ঘঞ্চা’’তি. ‘‘মাহং, নাগিত, যসেন সমাগমং, মা চ মযা যসো. যো খো, নাগিত, নযিমস্স নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভী অস্স অকিচ্ছলাভী অকসিৰলাভী. যস্সাহং নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভী [নিকামলাভী অস্সং (বহূসু) অ. নি. ৫.৩০ পস্সিতব্বং. তত্থ হি অযং পাঠভেদা নত্থি] অকিচ্ছলাভী অকসিৰলাভী, সো তং মীড়্হসুখং মিদ্ধসুখং লাভসক্কাৰসিলোকসুখং সাদিযেয্যা’’তি.

‘‘অধিৱাসেতু দানি, ভন্তে, ভগৱা. অধিৱাসেতু সুগতো. অধিৱাসনকালো দানি, ভন্তে, ভগৱতো. যেন যেনেৱ দানি, ভন্তে, ভগৱা গমিস্সতি তন্নিন্নাৱ ভৱিস্সন্তি ব্ৰাহ্মণগহপতিকা নেগমা চেৱ জানপদা চ. সেয্যথাপি, ভন্তে, থুল্লফুসিতকে দেৱে ৱস্সন্তে যথানিন্নং উদকানি পৱত্তন্তি; এৱমেৱং খো, ভন্তে, যেন যেনেৱ দানি ভগৱা গমিস্সতি তন্নিন্নাৱ ভৱিস্সন্তি ব্ৰাহ্মণগহপতিকা নেগমা চেৱ জানপদা চ. তং কিস্স হেতু? তথা হি, ভন্তে, ভগৱতো সীলপঞ্ঞাণ’’ন্তি.

‘‘মাহং, নাগিত, যসেন সমাগমং, মা চ মযা যসো. যো খো, নাগিত, নযিমস্স নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভী অস্স অকিচ্ছলাভী অকসিৰলাভী. যস্সাহং নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভী অকিচ্ছলাভী অকসিৰলাভী, সো তং মীড়্হসুখং মিদ্ধসুখং লাভসক্কাৰসিলোকসুখং সাদিযেয্য.

‘‘দেৱতাপি খো, নাগিত, একচ্চা নযিমস্স [একচ্চা ইমস্স (?)] নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভিনিযো অস্সু [ইদং পদং কত্থচি নত্থি] অকিচ্ছলাভিনিযো [নিকামলাভিনিযো অকিচ্ছলাভিনিযো (?)] অকসিৰলাভিনিযো, যস্সাহং নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভী অকিচ্ছলাভী অকসিৰলাভী. তুম্হাকম্পি [তাসম্পি (?)] খো, নাগিত, সঙ্গম্ম সমাগম্ম সঙ্গণিকৱিহাৰং অনুযুত্তানং ৱিহৰতং [অনুযুত্তে ৱিহৰন্তে দিস্ৱা (?)] এৱং হোতি – ‘ন হি নূনমে [ন হনূনমে (সী. স্যা. পী.)] আযস্মন্তো ইমস্স নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভিনো অস্সু [ইদং পদং কত্থচি নত্থি] অকিচ্ছলাভিনো অকসিৰলাভিনো. যস্সাহং নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভী অকিচ্ছলাভী অকসিৰলাভী. তথা হি পন মে আযস্মন্তো সঙ্গম্ম সমাগম্ম সঙ্গণিকৱিহাৰং অনুযুত্তা ৱিহৰন্তি’’’.

‘‘ইধাহং, নাগিত, ভিক্খূ পস্সামি অঞ্ঞমঞ্ঞং অঙ্গুলিপতোদকেন [অঙ্গুলিপতোদকেহি (সী. পী. ক.)] সঞ্জগ্ঘন্তে সঙ্কীড়ন্তে. তস্স ময্হং, নাগিত, এৱং হোতি – ‘ন হি নূনমে আযস্মন্তো ইমস্স নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভিনো অস্সু অকিচ্ছলাভিনো অকসিৰলাভিনো. যস্সাহং নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভী অকিচ্ছলাভী অকসিৰলাভী. তথা হি পন মে আযস্মন্তো অঞ্ঞমঞ্ঞং অঙ্গুলিপতোদকেন সঞ্জগ্ঘন্তি সঙ্কীড়ন্তি’’’.

‘‘ইধ পনাহং [ইধাহং (সী. পী. ক.)], নাগিত, ভিক্খূ পস্সামি যাৱদত্থং উদৰাৱদেহকং ভুঞ্জিত্ৱা সেয্যসুখং পস্সসুখং মিদ্ধসুখং অনুযুত্তে ৱিহৰন্তে. তস্স ময্হং, নাগিত, এৱং হোতি – ‘ন হি নূনমে আযস্মন্তো ইমস্স নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভিনো অস্সু অকিচ্ছলাভিনো অকসিৰলাভিনো. যস্সাহং নেক্খম্মসুখস্স পৱিৱেকসুখস্স উপসমসুখস্স সম্বোধসুখস্স নিকামলাভী অকিচ্ছলাভী অকসিৰলাভী. তথা হি পন মে আযস্মন্তো যাৱদত্থং উদৰাৱদেহকং ভুঞ্জিত্ৱা সেয্যসুখং পস্সসুখং মিদ্ধসুখং অনুযুত্তা ৱিহৰন্তি’’’.

‘‘ইধাহং [ইধ পনাহং (?)], নাগিত, ভিক্খুং পস্সামি গামন্তৱিহাৰিং সমাহিতং নিসিন্নং. তস্স ময্হং, নাগিত, এৱং হোতি – ‘ইদানি ইমং [ইদানিমং (কত্থচি) অ. নি. ৬.৪২] আযস্মন্তং আৰামিকো ৱা উপট্ঠহিস্সতি [পচ্চেস্সতি (সী. পী.), উপট্ঠহতি (ক.)] সমণুদ্দেসো ৱা. তং তম্হা [সো তম্হা (ক. সী.), সো তং তম্হা (?)] সমাধিম্হা চাৱেস্সতী’তি. তেনাহং, নাগিত, তস্স ভিক্খুনো ন অত্তমনো হোমি গামন্তৱিহাৰেন.

‘‘ইধ পনাহং, নাগিত, ভিক্খুং পস্সামি আৰঞ্ঞিকং অৰঞ্ঞে পচলাযমানং নিসিন্নং. তস্স ময্হং, নাগিত, এৱং হোতি – ‘ইদানি অযমাযস্মা ইমং নিদ্দাকিলমথং পটিৱিনোদেত্ৱা অৰঞ্ঞসঞ্ঞংযেৱ মনসি কৰিস্সতি একত্ত’ন্তি. তেনাহং, নাগিত, তস্স ভিক্খুনো অত্তমনো হোমি অৰঞ্ঞৱিহাৰেন.

‘‘ইধ পনাহং, নাগিত, ভিক্খুং পস্সামি আৰঞ্ঞিকং অৰঞ্ঞে অসমাহিতং নিসিন্নং. তস্স ময্হং, নাগিত, এৱং হোতি – ‘ইদানি অযমাযস্মা অসমাহিতং ৱা চিত্তং সমাদহিস্সতি [সমাদহেস্সতি (কত্থচি)], সমাহিতং ৱা চিত্তং অনুৰক্খিস্সতী’তি. তেনাহং, নাগিত, তস্স ভিক্খুনো অত্তমনো হোমি অৰঞ্ঞৱিহাৰেন.

‘‘ইধ পনাহং, নাগিত, ভিক্খুং পস্সামি আৰঞ্ঞিকং অৰঞ্ঞে সমাহিতং নিসিন্নং. তস্স ময্হং, নাগিত, এৱং হোতি – ‘ইদানি অযমাযস্মা অৱিমুত্তং ৱা চিত্তং ৱিমুচ্চিস্সতি, ৱিমুত্তং ৱা চিত্তং অনুৰক্খিস্সতী’তি. তেনাহং, নাগিত, তস্স ভিক্খুনো অত্তমনো হোমি অৰঞ্ঞৱিহাৰেন.

‘‘ইধ পনাহং, নাগিত, ভিক্খুং পস্সামি গামন্তৱিহাৰিং লাভিং চীৱৰপিণ্ডপাতসেনাসনগিলানপচ্চযভেসজ্জপৰিক্খাৰানং. সো তং লাভসক্কাৰসিলোকং নিকামযমানো ৰিঞ্চতি পটিসল্লানং, ৰিঞ্চতি অৰঞ্ঞৱনপত্থানি পন্তানি সেনাসনানি; গামনিগমৰাজধানিং ওসৰিত্ৱা ৱাসং কপ্পেতি. তেনাহং, নাগিত, তস্স ভিক্খুনো ন অত্তমনো হোমি গামন্তৱিহাৰেন.

‘‘ইধ পনাহং, নাগিত, ভিক্খুং পস্সামি আৰঞ্ঞিকং লাভিং চীৱৰপিণ্ডপাতসেনাসনগিলানপচ্চযভেসজ্জপৰিক্খাৰানং. সো তং লাভসক্কাৰসিলোকং পটিপণামেত্ৱা ন ৰিঞ্চতি পটিসল্লানং, ন ৰিঞ্চতি অৰঞ্ঞৱনপত্থানি পন্তানি সেনাসনানি. তেনাহং, নাগিত, তস্স ভিক্খুনো অত্তমনো হোমি অৰঞ্ঞৱিহাৰেন. [[ ] এত্থন্তৰে পাঠো অ. নি. ৬.৪২ ছক্কনিপাতেযেৱ দিস্সতি, ন এত্থ অট্ঠকনিপাতে]

‘‘যস্মাহং [যস্মিংহং (কত্থচি)], নাগিত, সমযে অদ্ধানমগ্গপ্পটিপন্নো ন কঞ্চি পস্সামি পুৰতো ৱা পচ্ছতো ৱা, ফাসু মে, নাগিত, তস্মিং সমযে হোতি অন্তমসো উচ্চাৰপস্সাৱকম্মাযা’’তি. ছট্ঠং.