৭. পত্তনিকুজ্জনসুত্তং

৮৭. [চূড়ৱ. ২৬৫] ‘‘অট্ঠহি, ভিক্খৱে, অঙ্গেহি সমন্নাগতস্স উপাসকস্স আকঙ্খমানো সঙ্ঘো পত্তং নিক্কুজ্জেয্য [নিকুজ্জেয্য (ক.)]. কতমেহি অট্ঠহি? ভিক্খূনং অলাভায পৰিসক্কতি, ভিক্খূনং অনত্থায পৰিসক্কতি, ভিক্খূনং অৱাসায [অনাৱাসায (সী. স্যা.)] পৰিসক্কতি, ভিক্খূ অক্কোসতি পৰিভাসতি, ভিক্খূ ভিক্খূহি ভেদেতি [ৱিভেদেতি (বহূসু)], বুদ্ধস্স অৱণ্ণং ভাসতি, ধম্মস্স অৱণ্ণং ভাসতি, সঙ্ঘস্স অৱণ্ণং ভাসতি. ইমেহি খো, ভিক্খৱে, অট্ঠহঙ্গেহি সমন্নাগতস্স উপাসকস্স আকঙ্খমানো সঙ্ঘো পত্তং নিক্কুজ্জেয্য.

‘‘অট্ঠহি, ভিক্খৱে, অঙ্গেহি সমন্নাগতস্স উপাসকস্স আকঙ্খমানো সঙ্ঘো পত্তং উক্কুজ্জেয্য. কতমেহি অট্ঠহি? ন ভিক্খূনং অলাভায পৰিসক্কতি, ন ভিক্খূনং অনত্থায পৰিসক্কতি, ন ভিক্খূনং অৱাসায পৰিসক্কতি, ন ভিক্খূ অক্কোসতি পৰিভাসতি, ন ভিক্খূ ভিক্খূহি ভেদেতি, বুদ্ধস্স ৱণ্ণং ভাসতি, ধম্মস্স ৱণ্ণং ভাসতি, সঙ্ঘস্স ৱণ্ণং ভাসতি. ইমেহি খো, ভিক্খৱে, অট্ঠহঙ্গেহি সমন্নাগতস্স উপাসকস্স আকঙ্খমানো সঙ্ঘো পত্তং উক্কুজ্জেয্যা’’তি. সত্তমং.