৯. মেত্তসুত্তং

৬২. [ইতিৱু. ২২ ইতিৱুত্তকেপি] ‘‘মা, ভিক্খৱে, পুঞ্ঞানং ভাযিত্থ. সুখস্সেতং, ভিক্খৱে, অধিৱচনং যদিদং পুঞ্ঞানি [যদিদং পুঞ্ঞন্তি (সী.), যদিদং পুঞ্ঞানি (ক.)]. অভিজানামি খো পনাহং [ভিক্খৱে দীঘৰত্তং ইট্ঠং (স্যা.), ভিক্খৱে দীঘৰত্তং পুঞ্ঞানং ইট্ঠং (?)], ভিক্খৱে, দীঘৰত্তং কতানং পুঞ্ঞানং দীঘৰত্তং ইট্ঠং [ভিক্খৱে দীঘৰত্তং ইট্ঠং (স্যা.), ভিক্খৱে দীঘৰত্তং পুঞ্ঞানং ইট্ঠং (?)] কন্তং মনাপং ৱিপাকং পচ্চনুভূতং. সত্ত ৱস্সানি মেত্তং চিত্তং ভাৱেসিং. সত্ত ৱস্সানি মেত্তং চিত্তং ভাৱেত্ৱা সত্ত সংৱট্টৱিৱট্টকপ্পে নযিমং লোকং পুনাগমাসিং. সংৱট্টমানে সুদাহং [সংৱট্টমানস্সুদাহং (ক.)], ভিক্খৱে, লোকে আভস্সৰূপগো হোমি, ৱিৱট্টমানে লোকে সুঞ্ঞং ব্ৰহ্মৱিমানং উপপজ্জামি.

‘‘তত্ৰ সুদং, ভিক্খৱে, ব্ৰহ্মা হোমি মহাব্ৰহ্মা অভিভূ অনভিভূতো অঞ্ঞদত্থুদসো ৱসৱত্তী. ছত্তিংসক্খত্তুং খো পনাহং, ভিক্খৱে, সক্কো অহোসিং দেৱানমিন্দো; অনেকসতক্খত্তুং ৰাজা অহোসিং চক্কৱত্তী ধম্মিকো ধম্মৰাজা চাতুৰন্তো ৱিজিতাৱী জনপদত্থাৱৰিযপ্পত্তো সত্তৰতনসমন্নাগতো. তস্স ময্হং, ভিক্খৱে, ইমানি সত্ত ৰতনানি অহেসুং, সেয্যথিদং – চক্কৰতনং, হত্থিৰতনং, অস্সৰতনং, মণিৰতনং, ইত্থিৰতনং, গহপতিৰতনং, পৰিণাযকৰতনমেৱ সত্তমং. পৰোসহস্সং খো পন মে, ভিক্খৱে, পুত্তা অহেসুং সূৰা ৱীৰঙ্গৰূপা পৰসেনপ্পমদ্দনা. সো ইমং পথৱিং সাগৰপৰিযন্তং অদণ্ডেন অসত্থেন ধম্মেন অভিৱিজিয অজ্ঝাৱসি’’ন্তি [অজ্ঝাৱসন্তি (স্যা.) অজ্ঝাৱসতি (সী. ক.)].

‘‘পস্স পুঞ্ঞানং ৱিপাকং, কুসলানং সুখেসিনো [সুখেসিনং (সী.)];

মেত্তং চিত্তং ৱিভাৱেত্ৱা, সত্ত ৱস্সানি ভিক্খৱো [ভিক্খৱে (ক.)];

সত্তসংৱট্টৱিৱট্টকপ্পে, নযিমং লোকং পুনাগমিং [পুনাগমং (স্যা.)].

‘‘সংৱট্টমানে লোকম্হি, হোমি আভস্সৰূপগো;

ৱিৱট্টমানে লোকস্মিং, সুঞ্ঞব্ৰহ্মূপগো অহুং.

‘‘সত্তক্খত্তুং মহাব্ৰহ্মা, ৱসৱত্তী তদা অহুং;

ছত্তিংসক্খত্তুং দেৱিন্দো, দেৱৰজ্জমকাৰযিং.

‘‘চক্কৱত্তী অহুং ৰাজা, জম্বুমণ্ডস্স [জম্বুদীপস্স (সী.), জম্বুসণ্ডস্স (স্যা.)] ইস্সৰো;

মুদ্ধাৱসিত্তো [মুদ্ধাভিসিত্তো (ক.)] খত্তিযো, মনুস্সাধিপতী অহুং.

‘‘অদণ্ডেন অসত্থেন, ৱিজেয্য পথৱিং ইমং;

অসাহসেন কম্মেন [ধম্মেন (সী. স্যা.)], সমেন অনুসাসি তং.

‘‘ধম্মেন ৰজ্জং কাৰেত্ৱা, অস্মিং পথৱিমণ্ডলে;

মহদ্ধনে মহাভোগে, অড্ঢে অজাযিহং কুলে.

‘‘সব্বকামেহি সম্পন্নে [সম্পুণ্ণে (ক.)], ৰতনেহি চ সত্তহি;

বুদ্ধা সঙ্গাহকা লোকে, তেহি এতং সুদেসিতং.

‘‘এসো হেতু মহন্তস্স, পথব্যো মে ন ৱিপজ্জতি [এস হেতু মহন্তস্স, পুথব্যো যেন ৱুচ্চতি (সী. স্যা.)];

পহূতৱিত্তূপকৰণো, ৰাজা হোতি [হোমি (সী. স্যা.)] পতাপৱা.

‘‘ইদ্ধিমা যসৱা হোতি [হোমি (সী. স্যা.)], জম্বুমণ্ডস্স [জম্বুসণ্ডস্স (সী. স্যা.)] ইস্সৰো;

কো সুত্ৱা নপ্পসীদেয্য, অপি কণ্হাভিজাতিযো.

‘‘তস্মা হি অত্তকামেন [অত্থকামেন (স্যা. ক.)], মহত্তমভিকঙ্খতা;

সদ্ধম্মো গৰুকাতব্বো, সৰং বুদ্ধানসাসন’’ন্তি. নৱমং;