১০. ভৰিযাসুত্তং

৬৩. অথ খো ভগৱা পুব্বণ্হসমযং নিৱাসেত্ৱা পত্তচীৱৰমাদায যেন অনাথপিণ্ডিকস্স গহপতিস্স নিৱেসনং তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি. তেন খো পন সমযেন অনাথপিণ্ডিকস্স গহপতিস্স নিৱেসনে মনুস্সা উচ্চাসদ্দা মহাসদ্দা হোন্তি. অথ খো অনাথপিণ্ডিকো গহপতি যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৱা এতদৱোচ –

‘‘কিং নু তে, গহপতি, নিৱেসনে মনুস্সা উচ্চাসদ্দা মহাসদ্দা কেৱট্টা মঞ্ঞে মচ্ছৱিলোপে’’তি? ‘‘অযং, ভন্তে, সুজাতা ঘৰসুণ্হা অড্ঢকুলা আনীতা. সা নেৱ সস্সুং আদিযতি, ন সসুৰং আদিযতি, ন সামিকং আদিযতি, ভগৱন্তম্পি ন সক্কৰোতি ন গৰুং কৰোতি ন মানেতি ন পূজেতী’’তি.

অথ খো ভগৱা সুজাতং ঘৰসুণ্হং আমন্তেসি – ‘‘এহি, সুজাতে’’তি! ‘‘এৱং, ভন্তে’’তি খো সুজাতা ঘৰসুণ্হা ভগৱতো পটিস্সুত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নং খো সুজাতং ঘৰসুণ্হং ভগৱা এতদৱোচ –

‘‘সত্ত খো ইমা, সুজাতে, পুৰিসস্স ভৰিযাযো. কতমা সত্ত? ৱধকসমা, চোৰীসমা, অয্যসমা, মাতাসমা, ভগিনীসমা, সখীসমা, দাসীসমা. ইমা খো, সুজাতে, সত্ত পুৰিসস্স ভৰিযাযো. তাসং ত্ৱং কতমা’’তি? ‘‘ন খো অহং [নাহং (স্যা.)], ভন্তে, ইমস্স ভগৱতা সংখিত্তেন ভাসিতস্স ৱিত্থাৰেন অত্থং আজানামি. সাধু মে, ভন্তে, ভগৱা তথা ধম্মং দেসেতু যথাহং ইমস্স ভগৱতা সংখিত্তেন ভাসিতস্স ৱিত্থাৰেন অত্থং জানেয্য’’ন্তি. ‘‘তেন হি, সুজাতে, সুণাহি, সাধুকং মনসি কৰোহি; ভাসিস্সামী’’তি. ‘‘এৱং, ভন্তে’’তি খো সুজাতা ঘৰসুণ্হা ভগৱতো পচ্চস্সোসি. ভগৱা এতদৱোচ –

‘‘পদুট্ঠচিত্তা অহিতানুকম্পিনী,

অঞ্ঞেসু ৰত্তা অতিমঞ্ঞতে পতিং;

ধনেন কীতস্স ৱধায উস্সুকা,

যা এৱৰূপা পুৰিসস্স ভৰিযা;

‘ৱধা চ ভৰিযা’তি চ সা পৱুচ্চতি.

‘‘যং ইত্থিযা ৱিন্দতি সামিকো ধনং,

সিপ্পং ৱণিজ্জঞ্চ কসিং অধিট্ঠহং;

অপ্পম্পি তস্স অপহাতুমিচ্ছতি,

যা এৱৰূপা পুৰিসস্স ভৰিযা;

‘চোৰী চ ভৰিযা’তি চ সা পৱুচ্চতি.

‘‘অকম্মকামা অলসা মহগ্ঘসা,

ফৰুসা চ চণ্ডী দুৰুত্তৱাদিনী;

উট্ঠাযকানং অভিভুয্য ৱত্ততি,

যা এৱৰূপা পুৰিসস্স ভৰিযা;

‘অয্যা চ ভৰিযা’তি চ সা পৱুচ্চতি.

‘‘যা সব্বদা হোতি হিতানুকম্পিনী,

মাতাৱ পুত্তং অনুৰক্খতে পতিং;

ততো ধনং সম্ভতমস্স ৰক্খতি,

যা এৱৰূপা পুৰিসস্স ভৰিযা;

‘মাতা চ ভৰিযা’তি চ সা পৱুচ্চতি.

‘‘যথাপি জেট্ঠা ভগিনী কনিট্ঠকা [কণিট্ঠা (সী.), কনিট্ঠা (স্যা.)],

সগাৰৱা হোতি সকম্হি সামিকে;

হিৰীমনা ভত্তুৱসানুৱত্তিনী,

যা এৱৰূপা পুৰিসস্স ভৰিযা;‘ভগিনী চ ভৰিযা’তি চ সা পৱুচ্চতি.

‘‘যাচীধ দিস্ৱান পতিং পমোদতি,

সখী সখাৰংৱ চিৰস্সমাগতং;

কোলেয্যকা সীলৱতী পতিব্বতা,

যা এৱৰূপা পুৰিসস্স ভৰিযা;

‘সখী চ ভৰিযা’তি চ সা পৱুচ্চতি.

‘‘অক্কুদ্ধসন্তা ৱধদণ্ডতজ্জিতা,

অদুট্ঠচিত্তা পতিনো তিতিক্খতি;

অক্কোধনা ভত্তুৱসানুৱত্তিনী,

যা এৱৰূপা পুৰিসস্স ভৰিযা;

‘দাসী চ ভৰিযা’তি চ সা পৱুচ্চতি.

‘‘যাচীধ ভৰিযা ৱধকাতি ৱুচ্চতি,

‘চোৰী চ অয্যা’তি চ যা পৱুচ্চতি;

দুস্সীলৰূপা ফৰুসা অনাদৰা,

কাযস্স ভেদা নিৰযং ৱজন্তি তা.

‘‘যাচীধ মাতা ভগিনী সখীতি চ,

‘দাসী চ ভৰিযা’তি চ সা পৱুচ্চতি;

সীলে ঠিতত্তা চিৰৰত্তসংৱুতা,

কাযস্স ভেদা সুগতিং ৱজন্তি তা’’তি.

‘‘ইমা খো, সুজাতে, সত্ত পুৰিসস্স ভৰিযাযো. তাসং ত্ৱং কতমা’’তি? ‘‘অজ্জতগ্গে মং, ভন্তে, ভগৱা দাসীসমং সামিকস্স ভৰিযং ধাৰেতূ’’তি. দসমং.