৪. সীহসেনাপতিসুত্তং

৫৭. এৱং মে সুতং – একং সমযং ভগৱা ৱেসালিযং ৱিহৰতি মহাৱনে কূটাগাৰসালাযং. অথ খো সীহো সেনাপতি যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো সীহো সেনাপতি ভগৱন্তং এতদৱোচ – ‘‘সক্কা নু খো, ভন্তে, সন্দিট্ঠিকং দানফলং পঞ্ঞাপেতু’’ন্তি?

‘‘তেন হি, সীহ, তঞ্ঞেৱেত্থ পটিপুচ্ছিস্সামি, যথা তে খমেয্য তথা নং ব্যাকৰেয্যাসি. তং কিং মঞ্ঞসি, সীহ, ইধ দ্ৱে পুৰিসা – একো পুৰিসো অস্সদ্ধো মচ্ছৰী কদৰিযো পৰিভাসকো, একো পুৰিসো সদ্ধো দানপতি অনুপ্পদানৰতো. তং কিং মঞ্ঞসি, সীহ, কং নু খো [কিং নু খো (ক.)] অৰহন্তো পঠমং অনুকম্পন্তা অনুকম্পেয্যুং – ‘যো ৱা সো পুৰিসো অস্সদ্ধো মচ্ছৰী কদৰিযো পৰিভাসকো, যো ৱা সো পুৰিসো সদ্ধো দানপতি অনুপ্পদানৰতো’’’তি?

‘‘যো সো, ভন্তে, পুৰিসো অস্সদ্ধো মচ্ছৰী কদৰিযো পৰিভাসকো, কিন্তং [কিন্তি (ক.)] অৰহন্তো পঠমং অনুকম্পন্তা অনুকম্পিস্সন্তি! যো চ খো সো, ভন্তে, পুৰিসো সদ্ধো দানপতি অনুপ্পদানৰতো তংযেৱ অৰহন্তো পঠমং অনুকম্পন্তা অনুকম্পেয্যুং’’.

‘‘তং কিং মঞ্ঞসি, সীহ, কং নু খো অৰহন্তো পঠমং উপসঙ্কমন্তা উপসঙ্কমেয্যুং – ‘যো ৱা সো পুৰিসো অস্সদ্ধো মচ্ছৰী কদৰিযো পৰিভাসকো, যো ৱা সো পুৰিসো সদ্ধো দানপতি অনুপ্পদানৰতো’’’তি? ‘‘যো সো, ভন্তে, পুৰিসো অস্সদ্ধো মচ্ছৰী কদৰিযো পৰিভাসকো, কিন্তং অৰহন্তো পঠমং উপসঙ্কমন্তা উপসঙ্কমিস্সন্তি! যো চ খো সো, ভন্তে, পুৰিসো সদ্ধো দানপতি অনুপ্পদানৰতো তংযেৱ অৰহন্তো পঠমং উপসঙ্কমন্তা উপসঙ্কমেয্যুং’’.

‘‘তং কিং মঞ্ঞসি, সীহ, কস্স নু খো অৰহন্তো পঠমং পটিগ্গণ্হন্তা পটিগ্গণ্হেয্যুং – ‘যো ৱা সো পুৰিসো অস্সদ্ধো মচ্ছৰী কদৰিযো পৰিভাসকো, যো ৱা সো পুৰিসো সদ্ধো দানপতি অনুপ্পদানৰতো’’’তি? ‘‘যো সো, ভন্তে, পুৰিসো অস্সদ্ধো মচ্ছৰী কদৰিযো পৰিভাসকো, কিন্তং তস্স অৰহন্তো পঠমং পটিগ্গণ্হন্তা পটিগ্গণ্হিস্সন্তি! যো চ খো সো, ভন্তে, পুৰিসো সদ্ধো দানপতি অনুপ্পদানৰতো তস্সেৱ অৰহন্তো পঠমং পটিগ্গণ্হন্তা পটিগ্গণ্হেয্যুং’’’.

‘‘তং কিং মঞ্ঞসি, সীহ, কস্স নু খো অৰহন্তো পঠমং ধম্মং দেসেন্তা দেসেয্যুং – ‘যো ৱা সো পুৰিসো অস্সদ্ধো মচ্ছৰী কদৰিযো পৰিভাসকো, যো ৱা সো পুৰিসো সদ্ধো দানপতি অনুপ্পদানৰতো’’’তি? ‘‘যো সো, ভন্তে, পুৰিসো অস্সদ্ধো মচ্ছৰী কদৰিযো পৰিভাসকো, কিন্তং তস্স অৰহন্তো পঠমং ধম্মং দেসেন্তা দেসেস্সন্তি! যো চ খো সো, ভন্তে, পুৰিসো সদ্ধো দানপতি অনুপ্পদানৰতো তস্সেৱ অৰহন্তো পঠমং ধম্মং দেসেন্তা দেসেয্যুং’’.

‘‘তং কিং মঞ্ঞসি, সীহ, কস্স নু খো কল্যাণো কিত্তিসদ্দো অব্ভুগ্গচ্ছেয্য – ‘যো ৱা সো পুৰিসো অস্সদ্ধো মচ্ছৰী কদৰিযো পৰিভাসকো, যো ৱা সো পুৰিসো সদ্ধো দানপতি অনুপ্পদানৰতো’’’তি? ‘‘যো সো, ভন্তে, পুৰিসো অস্সদ্ধো মচ্ছৰী কদৰিযো পৰিভাসকো, কিন্তং তস্স কল্যাণো কিত্তিসদ্দো অব্ভুগ্গচ্ছিস্সতি! যো চ খো সো, ভন্তে, পুৰিসো সদ্ধো দানপতি অনুপ্পদানৰতো তস্সেৱ কল্যাণো কিত্তিসদ্দো অব্ভুগ্গচ্ছেয্য’’.

‘‘তং কিং মঞ্ঞসি, সীহ, কো নু খো যংযদেৱ পৰিসং উপসঙ্কমেয্য, যদি খত্তিযপৰিসং যদি ব্ৰাহ্মণপৰিসং যদি গহপতিপৰিসং যদি সমণপৰিসং ৱিসাৰদো উপসঙ্কমেয্য অমঙ্কুভূতো – ‘যো ৱা সো পুৰিসো অস্সদ্ধো মচ্ছৰী কদৰিযো পৰিভাসকো, যো ৱা সো পুৰিসো সদ্ধো দানপতি অনুপ্পদানৰতো’’’তি? ‘‘যো সো, ভন্তে, পুৰিসো অস্সদ্ধো মচ্ছৰী কদৰিযো পৰিভাসকো, কিং সো যংযদেৱ পৰিসং উপসঙ্কমিস্সতি, যদি খত্তিযপৰিসং যদি ব্ৰাহ্মণপৰিসং যদি গহপতিপৰিসং যদি সমণপৰিসং ৱিসাৰদো উপসঙ্কমিস্সতি অমঙ্কুভূতো! যো চ খো সো, ভন্তে, পুৰিসো সদ্ধো দানপতি অনুপ্পদানৰতো সো যংযদেৱ পৰিসং উপসঙ্কমেয্য, যদি খত্তিযপৰিসং যদি ব্ৰাহ্মণপৰিসং যদি গহপতিপৰিসং যদি সমণপৰিসং ৱিসাৰদো উপসঙ্কমেয্য অমঙ্কুভূতো’’.

‘‘তং কিং মঞ্ঞসি, সীহ, কো নু খো কাযস্স ভেদা পৰং মৰণা সুগতিং সগ্গং লোকং উপপজ্জেয্য – ‘যো ৱা সো পুৰিসো অস্সদ্ধো মচ্ছৰী কদৰিযো পৰিভাসকো, যো ৱা সো পুৰিসো সদ্ধো দানপতি অনুপ্পদানৰতো’’’তি? ‘‘যো সো, ভন্তে, পুৰিসো অস্সদ্ধো মচ্ছৰী কদৰিযো পৰিভাসকো, কিং সো কাযস্স ভেদা পৰং মৰণা সুগতিং সগ্গং লোকং উপপজ্জিস্সতি! যো চ খো সো, ভন্তে, পুৰিসো সদ্ধো দানপতি অনুপ্পদানৰতো সো কাযস্স ভেদা পৰং মৰণা সুগতিং সগ্গং লোকং উপপজ্জেয্য’’.

‘‘যানিমানি, ভন্তে, ভগৱতা সন্দিট্ঠিকানি দানফলানি অক্খাতানি, নাহং এত্থ ভগৱতো সদ্ধায গচ্ছামি. অহম্পি এতানি জানামি. অহং, ভন্তে, দাযকো দানপতি, মং অৰহন্তো পঠমং অনুকম্পন্তা অনুকম্পন্তি. অহং, ভন্তে, দাযকো দানপতি, মং অৰহন্তো পঠমং উপসঙ্কমন্তা উপসঙ্কমন্তি. অহং, ভন্তে, দাযকো দানপতি, ময্হং অৰহন্তো পঠমং পটিগ্গণ্হন্তা পটিগ্গণ্হন্তি. অহং, ভন্তে, দাযকো দানপতি, ময্হং অৰহন্তো পঠমং ধম্মং দেসেন্তা দেসেন্তি. অহং, ভন্তে, দাযকো দানপতি, ময্হং কল্যাণো কিত্তিসদ্দো অব্ভুগ্গতো – ‘সীহো সেনাপতি দাযকো কাৰকো সঙ্ঘুপট্ঠাকো’তি. অহং, ভন্তে, দাযকো দানপতি যংযদেৱ পৰিসং উপসঙ্কমামি, যদি খত্তিযপৰিসং…পে… যদি সমণপৰিসং ৱিসাৰদো উপসঙ্কমামি অমঙ্কুভূতো. যানিমানি, ভন্তে, ভগৱতা সন্দিট্ঠিকানি দানফলানি অক্খাতানি, নাহং এত্থ ভগৱতো সদ্ধায গচ্ছামি. অহম্পি এতানি জানামি. যঞ্চ খো মং, ভন্তে, ভগৱা এৱমাহ – ‘দাযকো, সীহ, দানপতি কাযস্স ভেদা পৰং মৰণা সুগতিং সগ্গং লোকং উপপজ্জতী’তি. এতাহং ন জানামি, এত্থ চ পনাহং, ভগৱতো সদ্ধায গচ্ছামী’’তি. ‘‘এৱমেতং, সীহ; এৱমেতং, সীহ! দাযকো, সীহ, দানপতি কাযস্স ভেদা পৰং মৰণা সুগতিং সগ্গং লোকং উপপজ্জতী’’তি. চতুত্থং.