৫. অৰক্খেয্যসুত্তং

৫৮. ‘‘চত্তাৰিমানি, ভিক্খৱে, তথাগতস্স অৰক্খেয্যানি, তীহি চ অনুপৱজ্জো. কতমানি চত্তাৰি তথাগতস্স অৰক্খেয্যানি? পৰিসুদ্ধকাযসমাচাৰো, ভিক্খৱে, তথাগতো; নত্থি তথাগতস্স কাযদুচ্চৰিতং যং তথাগতো ৰক্খেয্য – ‘মা মে ইদং পৰো অঞ্ঞাসী’তি. পৰিসুদ্ধৱচীসমাচাৰো, ভিক্খৱে, তথাগতো; নত্থি তথাগতস্স ৱচীদুচ্চৰিতং যং তথাগতো ৰক্খেয্য – ‘মা মে ইদং পৰো অঞ্ঞাসী’তি. পৰিসুদ্ধমনোসমাচাৰো, ভিক্খৱে, তথাগতো; নত্থি তথাগতস্স মনোদুচ্চৰিতং যং তথাগতো ৰক্খেয্য – ‘মা মে ইদং পৰো অঞ্ঞাসী’তি. পৰিসুদ্ধাজীৱো, ভিক্খৱে, তথাগতো; নত্থি তথাগতস্স মিচ্ছাআজীৱো যং তথাগতো ৰক্খেয্য – ‘মা মে ইদং পৰো অঞ্ঞাসী’তি. ইমানি চত্তাৰি তথাগতস্স অৰক্খেয্যানি.

‘‘কতমেহি তীহি অনুপৱজ্জো? স্ৱাক্খাতধম্মো, ভিক্খৱে, তথাগতো. তত্ৰ ৱত মং সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মিং সহধম্মেন পটিচোদেস্সতি – ‘ইতিপি ত্ৱং ন স্ৱাক্খাতধম্মো’তি. নিমিত্তমেতং, ভিক্খৱে, ন সমনুপস্সামি. এতমহং [এতংপহং (সী. স্যা.)], ভিক্খৱে, নিমিত্তং অসমনুপস্সন্তো খেমপ্পত্তো অভযপ্পত্তো ৱেসাৰজ্জপ্পত্তো ৱিহৰামি.

‘‘সুপঞ্ঞত্তা খো পন মে, ভিক্খৱে, সাৱকানং নিব্বানগামিনী পটিপদা. যথাপটিপন্না মম সাৱকা আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰন্তি. তত্ৰ ৱত মং সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মিং সহধম্মেন পটিচোদেস্সতি – ‘ইতিপি তে ন সুপঞ্ঞত্তা সাৱকানং নিব্বানগামিনী পটিপদা. যথাপটিপন্না তৱ সাৱকা আসৱানং খযা…পে… সচ্ছিকত্ৱা উপসম্পজ্জ ৱিহৰন্তী’তি. নিমিত্তমেতং, ভিক্খৱে, ন সমনুপস্সামি. এতমহং, ভিক্খৱে, নিমিত্তং অসমনুপস্সন্তো খেমপ্পত্তো অভযপ্পত্তো ৱেসাৰজ্জপ্পত্তো ৱিহৰামি.

‘‘অনেকসতা খো পন মে, ভিক্খৱে, সাৱকপৰিসা আসৱানং খযা…পে… সচ্ছিকত্ৱা উপসম্পজ্জ ৱিহৰন্তি. তত্ৰ ৱত মং সমণো ৱা ব্ৰাহ্মণো ৱা দেৱো ৱা মাৰো ৱা ব্ৰহ্মা ৱা কোচি ৱা লোকস্মিং সহধম্মেন পটিচোদেস্সতি – ‘ইতিপি তে ন অনেকসতা সাৱকপৰিসা আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰন্তী’তি. নিমিত্তমেতং, ভিক্খৱে, ন সমনুপস্সামি. এতমহং, ভিক্খৱে, নিমিত্তং অসমনুপস্সন্তো খেমপ্পত্তো অভযপ্পত্তো ৱেসাৰজ্জপ্পত্তো ৱিহৰামি. ইমেহি তীহি অনুপৱজ্জো.

‘‘ইমানি খো, ভিক্খৱে, চত্তাৰি তথাগতস্স অৰক্খেয্যানি, ইমেহি চ তীহি অনুপৱজ্জো’’তি. পঞ্চমং.