১. অব্যাকতসুত্তং

৫৪. অথ খো অঞ্ঞতৰো ভিক্খু যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু কো পচ্চযো যেন সুতৱতো অৰিযসাৱকস্স ৱিচিকিচ্ছা নুপ্পজ্জতি অব্যাকতৱত্থূসূ’’তি?

‘‘দিট্ঠিনিৰোধা খো, ভিক্খু, সুতৱতো অৰিযসাৱকস্স ৱিচিকিচ্ছা নুপ্পজ্জতি অব্যাকতৱত্থূসু. ‘হোতি তথাগতো পৰং মৰণা’তি খো, ভিক্খু, দিট্ঠিগতমেতং; ‘ন হোতি তথাগতো পৰং মৰণা’তি খো, ভিক্খু, দিট্ঠিগতমেতং; ‘হোতি চ ন চ হোতি তথাগতো পৰং মৰণা’তি খো, ভিক্খু, দিট্ঠিগতমেতং; ‘নেৱ হোতি ন ন হোতি তথাগতো পৰং মৰণা’তি খো, ভিক্খু, দিট্ঠিগতমেতং. অস্সুতৱা, ভিক্খু, পুথুজ্জনো দিট্ঠিং নপ্পজানাতি, দিট্ঠিসমুদযং নপ্পজানাতি, দিট্ঠিনিৰোধং নপ্পজানাতি, দিট্ঠিনিৰোধগামিনিং পটিপদং নপ্পজানাতি. তস্স সা দিট্ঠি পৱড্ঢতি, সো ন পৰিমুচ্চতি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, ন পৰিমুচ্চতি দুক্খস্মাতি ৱদামি.

‘‘সুতৱা চ খো, ভিক্খু, অৰিযসাৱকো দিট্ঠিং পজানাতি, দিট্ঠিসমুদযং পজানাতি, দিট্ঠিনিৰোধং পজানাতি, দিট্ঠিনিৰোধগামিনিং পটিপদং পজানাতি. তস্স সা দিট্ঠি নিৰুজ্ঝতি, সো পৰিমুচ্চতি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, পৰিমুচ্চতি দুক্খস্মাতি ৱদামি. এৱং জানং খো, ভিক্খু, সুতৱা অৰিযসাৱকো এৱং পস্সং ‘হোতি তথাগতো পৰং মৰণা’তিপি ন ব্যাকৰোতি; ‘ন হোতি তথাগতো পৰং মৰণা’তিপি ন ব্যাকৰোতি; ‘হোতি চ ন চ হোতি তথাগতো পৰং মৰণা’তিপি ন ব্যাকৰোতি; ‘নেৱ হোতি ন ন হোতি তথাগতো পৰং মৰণা’তিপি ন ব্যাকৰোতি. এৱং জানং খো, ভিক্খু, সুতৱা অৰিযসাৱকো এৱং পস্সং এৱং অব্যাকৰণধম্মো হোতি অব্যাকতৱত্থূসু. এৱং জানং খো, ভিক্খু, সুতৱা অৰিযসাৱকো এৱং পস্সং ন ছম্ভতি, ন কম্পতি, ন ৱেধতি, ন সন্তাসং আপজ্জতি অব্যাকতৱত্থূসু.

‘‘‘হোতি তথাগতো পৰং মৰণা’তি খো, ভিক্খু, তণ্হাগতমেতং…পে… সঞ্ঞাগতমেতং …পে… মঞ্ঞিতমেতং…পে… পপঞ্চিতমেতং…পে… উপাদানগতমেতং…পে… ‘হোতি তথাগতো পৰং মৰণা’তি খো, ভিক্খু, ৱিপ্পটিসাৰো এসো; ‘ন হোতি তথাগতো পৰং মৰণা’তি খো, ভিক্খু, ৱিপ্পটিসাৰো এসো; ‘হোতি চ ন চ হোতি তথাগতো পৰং মৰণা’তি খো, ভিক্খু, ৱিপ্পটিসাৰো এসো; ‘নেৱ হোতি ন ন হোতি তথাগতো পৰং মৰণা’তি খো, ভিক্খু, ৱিপ্পটিসাৰো এসো. অস্সুতৱা, ভিক্খু, পুথুজ্জনো ৱিপ্পটিসাৰং নপ্পজানাতি, ৱিপ্পটিসাৰসমুদযং নপ্পজানাতি, ৱিপ্পটিসাৰনিৰোধং নপ্পজানাতি, ৱিপ্পটিসাৰনিৰোধগামিনিং পটিপদং নপ্পজানাতি. তস্স সো ৱিপ্পটিসাৰো পৱড্ঢতি, সো ন পৰিমুচ্চতি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, ন পৰিমুচ্চতি দুক্খস্মাতি ৱদামি.

‘‘সুতৱা চ খো, ভিক্খু, অৰিযসাৱকো ৱিপ্পটিসাৰং পজানাতি, ৱিপ্পটিসাৰসমুদযং পজানাতি, ৱিপ্পটিসাৰনিৰোধং পজানাতি, ৱিপ্পটিসাৰনিৰোধগামিনিং পটিপদং পজানাতি. তস্স সো ৱিপ্পটিসাৰো নিৰুজ্ঝতি, সো পৰিমুচ্চতি জাতিযা…পে… দুক্খস্মাতি ৱদামি. এৱং জানং খো, ভিক্খু, সুতৱা অৰিযসাৱকো এৱং পস্সং ‘হোতি তথাগতো পৰং মৰণা’তিপি ন ব্যাকৰোতি…পে… ‘নেৱ হোতি ন ন হোতি তথাগতো পৰং মৰণা’তিপি ন ব্যাকৰোতি. এৱং জানং খো, ভিক্খু, সুতৱা অৰিযসাৱকো এৱং পস্সং এৱং অব্যাকৰণধম্মো হোতি অব্যাকতৱত্থূসু. এৱং জানং খো, ভিক্খু, সুতৱা অৰিযসাৱকো এৱং পস্সং ন ছম্ভতি, ন কম্পতি, ন ৱেধতি, ন সন্তাসং আপজ্জতি অব্যাকতৱত্থূসু. অযং খো, ভিক্খু, হেতু অযং পচ্চযো যেন সুতৱতো অৰিযসাৱকস্স ৱিচিকিচ্ছা নুপ্পজ্জতি অব্যাকতৱত্থূসূ’’তি. পঠমং.