৮. সংযোগসুত্তং

৫১. ‘‘সংযোগৱিসংযোগং ৱো, ভিক্খৱে, ধম্মপৰিযাযং দেসেস্সামি. তং সুণাথ…পে… কতমো চ সো, ভিক্খৱে, সংযোগো ৱিসংযোগো ধম্মপৰিযাযো?

‘‘ইত্থী, ভিক্খৱে, অজ্ঝত্তং ইত্থিন্দ্ৰিযং মনসি কৰোতি – ইত্থিকুত্তং ইত্থাকপ্পং ইত্থিৱিধং ইত্থিচ্ছন্দং ইত্থিস্সৰং ইত্থালঙ্কাৰং. সা তত্থ ৰজ্জতি তত্ৰাভিৰমতি. সা তত্থ ৰত্তা তত্ৰাভিৰতা বহিদ্ধা পুৰিসিন্দ্ৰিযং মনসি কৰোতি – পুৰিসকুত্তং পুৰিসাকপ্পং পুৰিসৱিধং পুৰিসচ্ছন্দং পুৰিসস্সৰং পুৰিসালঙ্কাৰং. সা তত্থ ৰজ্জতি তত্ৰাভিৰমতি. সা তত্থ ৰত্তা তত্ৰাভিৰতা বহিদ্ধা সংযোগং আকঙ্খতি. যঞ্চস্সা সংযোগপচ্চযা উপ্পজ্জতি সুখং সোমনস্সং তঞ্চ আকঙ্খতি. ইত্থত্তে, ভিক্খৱে, অভিৰতা সত্তা পুৰিসেসু সংযোগং গতা. এৱং খো, ভিক্খৱে, ইত্থী ইত্থত্তং নাতিৱত্ততি.

‘‘পুৰিসো, ভিক্খৱে, অজ্ঝত্তং পুৰিসিন্দ্ৰিযং মনসি কৰোতি – পুৰিসকুত্তং পুৰিসাকপ্পং পুৰিসৱিধং পুৰিসচ্ছন্দং পুৰিসস্সৰং পুৰিসালঙ্কাৰং. সো তত্থ ৰজ্জতি তত্ৰাভিৰমতি. সো তত্থ ৰত্তো তত্ৰাভিৰতো বহিদ্ধা ইত্থিন্দ্ৰিযং মনসি কৰোতি – ইত্থিকুত্তং ইত্থাকপ্পং ইত্থিৱিধং ইত্থিচ্ছন্দং ইত্থিস্সৰং ইত্থালঙ্কাৰং. সো তত্থ ৰজ্জতি তত্ৰাভিৰমতি. সো তত্থ ৰত্তো তত্ৰাভিৰতো বহিদ্ধা সংযোগং আকঙ্খতি. যঞ্চস্স সংযোগপচ্চযা উপ্পজ্জতি সুখং সোমনস্সং তঞ্চ আকঙ্খতি. পুৰিসত্তে, ভিক্খৱে, অভিৰতা সত্তা ইত্থীসু সংযোগং গতা. এৱং খো, ভিক্খৱে, পুৰিসো পুৰিসত্তং নাতিৱত্ততি. এৱং খো, ভিক্খৱে, সংযোগো হোতি.

‘‘কথঞ্চ, ভিক্খৱে, ৱিসংযোগো হোতি? ইত্থী, ভিক্খৱে, অজ্ঝত্তং ইত্থিন্দ্ৰিযং ন মনসি কৰোতি – ইত্থিকুত্তং ইত্থাকপ্পং ইত্থিৱিধং ইত্থিচ্ছন্দং ইত্থিস্সৰং ইত্থালঙ্কাৰং. সা তত্থ ন ৰজ্জতি, সা তত্ৰ নাভিৰমতি. সা তত্থ অৰত্তা তত্ৰ অনভিৰতা বহিদ্ধা পুৰিসিন্দ্ৰিযং ন মনসি কৰোতি – পুৰিসকুত্তং পুৰিসাকপ্পং পুৰিসৱিধং পুৰিসচ্ছন্দং পুৰিসস্সৰং পুৰিসালঙ্কাৰং. সা তত্থ ন ৰজ্জতি, তত্ৰ নাভিৰমতি. সা তত্থ অৰত্তা তত্ৰ অনভিৰতা বহিদ্ধা সংযোগং নাকঙ্খতি. যঞ্চস্সা সংযোগপচ্চযা উপ্পজ্জতি সুখং সোমনস্সং তঞ্চ নাকঙ্খতি. ইত্থত্তে, ভিক্খৱে, অনভিৰতা সত্তা পুৰিসেসু ৱিসংযোগং গতা. এৱং খো, ভিক্খৱে, ইত্থী ইত্থত্তং অতিৱত্ততি.

‘‘পুৰিসো, ভিক্খৱে, অজ্ঝত্তং পুৰিসিন্দ্ৰিযং ন মনসি কৰোতি – পুৰিসকুত্তং পুৰিসাকপ্পং পুৰিসৱিধং পুৰিসচ্ছন্দং পুৰিসস্সৰং পুৰিসালঙ্কাৰং. সো তত্থ ন ৰজ্জতি, সো তত্ৰ নাভিৰমতি. সো তত্থ অৰত্তো তত্ৰ অনভিৰতো বহিদ্ধা ইত্থিন্দ্ৰিযং ন মনসি কৰোতি – ইত্থিকুত্তং ইত্থাকপ্পং ইত্থিৱিধং ইত্থিচ্ছন্দং ইত্থিস্সৰং ইত্থালঙ্কাৰং. সো তত্থ ন ৰজ্জতি, তত্ৰ নাভিৰমতি. সো তত্থ অৰত্তো তত্ৰ অনভিৰতো বহিদ্ধা সংযোগং নাকঙ্খতি. যঞ্চস্স সংযোগপচ্চযা উপ্পজ্জতি সুখং সোমনস্সং তঞ্চ নাকঙ্খতি. পুৰিসত্তে, ভিক্খৱে, অনভিৰতা সত্তা ইত্থীসু ৱিসংযোগং গতা. এৱং খো, ভিক্খৱে, পুৰিসো পুৰিসত্তং অতিৱত্ততি. এৱং খো, ভিক্খৱে, ৱিসংযোগো হোতি. অযং খো, ভিক্খৱে, সংযোগো ৱিসংযোগো ধম্মপৰিযাযো’’তি. অট্ঠমং.