৭. মেথুনসুত্তং

৫০. অথ খো জাণুস্সোণি ব্ৰাহ্মণো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো জাণুস্সোণি ব্ৰাহ্মণো ভগৱন্তং এতদৱোচ – ‘‘ভৱম্পি নো গোতমো ব্ৰহ্মচাৰী পটিজানাতী’’তি? ‘‘যঞ্হি তং, ব্ৰাহ্মণ, সম্মা ৱদমানো ৱদেয্য – ‘অখণ্ডং অচ্ছিদ্দং অসবলং অকম্মাসং পৰিপুণ্ণং পৰিসুদ্ধং ব্ৰহ্মচৰিযং চৰতী’তি, মমেৱ তং, ব্ৰাহ্মণ, সম্মা ৱদমানো ৱদেয্য – ‘অহঞ্হি, ব্ৰাহ্মণ, অখণ্ডং অচ্ছিদ্দং অসবলং অকম্মাসং পৰিপুণ্ণং পৰিসুদ্ধং ব্ৰহ্মচৰিযং চৰামী’’’তি. ‘‘কিং পন, ভো গোতম, ব্ৰহ্মচৰিযস্স খণ্ডম্পি ছিদ্দম্পি সবলম্পি কম্মাসম্পী’’তি?

‘‘ইধ, ব্ৰাহ্মণ, একচ্চো সমণো ৱা ব্ৰাহ্মণো ৱা সম্মা ব্ৰহ্মচাৰী পটিজানমানো ন হেৱ খো মাতুগামেন সদ্ধিং দ্ৱযংদ্ৱযসমাপত্তিং সমাপজ্জতি; অপি চ খো মাতুগামস্স উচ্ছাদনপৰিমদ্দনন্হাপনসম্বাহনং সাদিযতি. সো তং অস্সাদেতি [সো তদস্সাদেতি (সী.)], তং নিকামেতি, তেন চ ৱিত্তিং আপজ্জতি. ইদম্পি খো, ব্ৰাহ্মণ, ব্ৰহ্মচৰিযস্স খণ্ডম্পি ছিদ্দম্পি সবলম্পি কম্মাসম্পি. অযং ৱুচ্চতি, ব্ৰাহ্মণ, অপৰিসুদ্ধং ব্ৰহ্মচৰিযং চৰতি, সংযুত্তো মেথুনেন সংযোগেন ন পৰিমুচ্চতি জাতিযা জৰায মৰণেন [জৰামৰণেন (সী. স্যা.)] সোকেহি পৰিদেৱেহি দুক্খেহি দোমনস্সেহি উপাযাসেহি, ন পৰিমুচ্চতি দুক্খস্মাতি ৱদামি.

‘‘পুন চপৰং, ব্ৰাহ্মণ, ইধেকচ্চো সমণো ৱা ব্ৰাহ্মণো ৱা সম্মা ব্ৰহ্মচাৰী পটিজানমানো ন হেৱ খো মাতুগামেন সদ্ধিং দ্ৱযংদ্ৱযসমাপত্তিং সমাপজ্জতি, নপি মাতুগামস্স উচ্ছাদনপৰিমদ্দনন্হাপনসম্বাহনং সাদিযতি; অপি চ খো মাতুগামেন সদ্ধিং সঞ্জগ্ঘতি সংকীড়তি সংকেলাযতি…পে… নপি মাতুগামেন সদ্ধিং সঞ্জগ্ঘতি সংকীড়তি সংকেলাযতি; অপি চ খো মাতুগামস্স চক্খুনা চক্খুং উপনিজ্ঝাযতি পেক্খতি…পে… নপি মাতুগামস্স চক্খুনা চক্খুং উপনিজ্ঝাযতি পেক্খতি; অপি চ খো মাতুগামস্স সদ্দং সুণাতি তিৰোকুট্টং ৱা তিৰোপাকাৰং ৱা হসন্তিযা ৱা ভণন্তিযা ৱা গাযন্তিযা ৱা ৰোদন্তিযা ৱা…পে… নপি মাতুগামস্স সদ্দং সুণাতি তিৰোকুট্টং ৱা তিৰোপাকাৰং ৱা হসন্তিযা ৱা ভণন্তিযা ৱা গাযন্তিযা ৱা ৰোদন্তিযা ৱা; অপি চ খো যানিস্স তানি পুব্বে মাতুগামেন সদ্ধিং হসিতলপিতকীড়িতানি তানি অনুস্সৰতি…পে… নপি যানিস্স তানি পুব্বে মাতুগামেন সদ্ধিং হসিতলপিতকীড়িতানি তানি অনুস্সৰতি; অপি চ খো পস্সতি গহপতিং ৱা গহপতিপুত্তং ৱা পঞ্চহি কামগুণেহি সমপ্পিতং সমঙ্গীভূতং পৰিচাৰযমানং…পে… নপি পস্সতি গহপতিং ৱা গহপতিপুত্তং ৱা পঞ্চহি কামগুণেহি সমপ্পিতং সমঙ্গীভূতং পৰিচাৰযমানং; অপি চ খো অঞ্ঞতৰং দেৱনিকাযং পণিধায ব্ৰহ্মচৰিযং চৰতি ইমিনাহং সীলেন ৱা ৱতেন ৱা তপেন ৱা ব্ৰহ্মচৰিযেন ৱা দেৱো ৱা ভৱিস্সামি দেৱঞ্ঞতৰো ৱাতি. সো তং অস্সাদেতি, তং নিকামেতি, তেন চ ৱিত্তিং আপজ্জতি. ইদম্পি খো, ব্ৰাহ্মণ, ব্ৰহ্মচৰিযস্স খণ্ডম্পি ছিদ্দম্পি সবলম্পি কম্মাসম্পি. অযং ৱুচ্চতি, ব্ৰাহ্মণ, অপৰিসুদ্ধং ব্ৰহ্মচৰিযং চৰতি সংযুত্তো মেথুনেন সংযোগেন, ন পৰিমুচ্চতি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, ন পৰিমুচ্চতি দুক্খস্মাতি ৱদামি.

‘‘যাৱকীৱঞ্চাহং, ব্ৰাহ্মণ, ইমেসং সত্তন্নং মেথুনসংযোগানং অঞ্ঞতৰঞ্ঞতৰমেথুনসংযোগং [অঞ্ঞতৰং মেথুনসংযোগং (সী. স্যা.)] অত্তনি অপ্পহীনং সমনুপস্সিং, নেৱ তাৱাহং, ব্ৰাহ্মণ, সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায অনুত্তৰং সম্মাসম্বোধিং অভিসম্বুদ্ধোতি পচ্চঞ্ঞাসিং [অভিসম্বুদ্ধো পচ্চঞ্ঞাসিং (সী. স্যা.)].

‘‘যতো চ খোহং, ব্ৰাহ্মণ, ইমেসং সত্তন্নং মেথুনসংযোগানং অঞ্ঞতৰঞ্ঞতৰমেথুনসংযোগং অত্তনি অপ্পহীনং ন সমনুপস্সিং, অথাহং, ব্ৰাহ্মণ, সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায অনুত্তৰং সম্মাসম্বোধিং অভিসম্বুদ্ধোতি পচ্চঞ্ঞাসিং. ‘ঞাণঞ্চ পন মে দস্সনং উদপাদি, অকুপ্পা মে ৱিমুত্তি [চেতোৱিমুত্তি (সী. ক.)], অযমন্তিমা জাতি, নত্থি দানি পুনব্ভৱো’’’তি.

এৱং ৱুত্তে জাণুস্সোণি ব্ৰাহ্মণো ভগৱন্তং এতদৱোচ – ‘‘অভিক্কন্তং, ভো গোতম; অভিক্কন্তং, ভো গোতম…পে… উপাসকং মং ভৱং গোতমো ধাৰেতু অজ্জতগ্গে পাণুপেতং সৰণং গত’’ন্তি. সত্তমং.