১০. নিদ্দসৱত্থুসুত্তং

২০. ‘‘সত্তিমানি, ভিক্খৱে, নিদ্দসৱত্থূনি. কতমানি সত্ত? ইধ, ভিক্খৱে, ভিক্খু সিক্খাসমাদানে তিব্বচ্ছন্দো হোতি আযতিঞ্চ সিক্খাসমাদানে অৱিগতপেমো [অধিগতপেমো (স্যা.) অ. নি. ৭.৪২; দী. নি. ৩.৩৩১], ধম্মনিসন্তিযা তিব্বচ্ছন্দো হোতি আযতিঞ্চ ধম্মনিসন্তিযা অৱিগতপেমো, ইচ্ছাৱিনযে তিব্বচ্ছন্দো হোতি আযতিঞ্চ ইচ্ছাৱিনযে অৱিগতপেমো, পটিসল্লানে তিব্বচ্ছন্দো হোতি আযতিঞ্চ পটিসল্লানে অৱিগতপেমো, ৱীৰিযাৰম্ভে [ৱীৰিযাৰব্ভে (ক.)] তিব্বচ্ছন্দো হোতি আযতিঞ্চ ৱীৰিযাৰম্ভে অৱিগতপেমো, সতিনেপক্কে তিব্বচ্ছন্দো হোতি আযতিঞ্চ সতিনেপক্কে অৱিগতপেমো, দিট্ঠিপটিৱেধে তিব্বচ্ছন্দো হোতি আযতিঞ্চ দিট্ঠিপটিৱেধে অৱিগতপেমো. ইমানি খো, ভিক্খৱে, সত্ত নিদ্দসৱত্থূনী’’তি. দসমং.

অনুসযৱগ্গো দুতিযো.