৭. মল্লিকাদেৱীসুত্তং

১৯৭. একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো মল্লিকা দেৱী যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্না খো মল্লিকা দেৱী ভগৱন্তং এতদৱোচ –

‘‘কো নু খো, ভন্তে, হেতু কো পচ্চযো, যেন মিধেকচ্চো মাতুগামো দুব্বণ্ণা চ হোতি দুৰূপা সুপাপিকা [স্যা. পী. পোত্থকেসু ‘‘দুব্বণো চ হোতি দুৰূপো সুপাপকো’’তি এৱমাদিনা পুল্লিঙ্গিকৱসেন দিস্সতি] দস্সনায; দলিদ্দা চ হোতি অপ্পস্সকা অপ্পভোগা অপ্পেসক্খা চ?

‘‘কো পন, ভন্তে, হেতু কো পচ্চযো, যেন মিধেকচ্চো মাতুগামো দুব্বণ্ণা চ হোতি দুৰূপা সুপাপিকা দস্সনায; অড্ঢা চ হোতি মহদ্ধনা মহাভোগা মহেসক্খা চ?

‘‘কো নু খো, ভন্তে, হেতু কো পচ্চযো, যেন মিধেকচ্চো মাতুগামো অভিৰূপা চ হোতি দস্সনীযা পাসাদিকা পৰমায ৱণ্ণপোক্খৰতায সমন্নাগতা; দলিদ্দা চ হোতি অপ্পস্সকা অপ্পভোগা অপ্পেসক্খা চ?

‘‘কো পন, ভন্তে, হেতু কো পচ্চযো, যেন মিধেকচ্চো মাতুগামো অভিৰূপা চ হোতি দস্সনীযা পাসাদিকা পৰমায ৱণ্ণপোক্খৰতায সমন্নাগতা, অড্ঢা চ হোতি মহদ্ধনা মহাভোগা মহেসক্খা চা’’তি?

‘‘ইধ, মল্লিকে, একচ্চো মাতুগামো কোধনা হোতি উপাযাসবহুলা. অপ্পম্পি ৱুত্তা সমানা অভিসজ্জতি কুপ্পতি ব্যাপজ্জতি পতিত্থীযতি, কোপঞ্চ দোসঞ্চ অপ্পচ্চযঞ্চ পাতুকৰোতি. সা [সো (স্যা.)] ন দাতা হোতি সমণস্স ৱা ব্ৰাহ্মণস্স ৱা অন্নং পানং ৱত্থং যানং মালাগন্ধৱিলেপনং সেয্যাৱসথপদীপেয্যং. ইস্সামনিকা [ইস্সামনকো (স্যা.)] খো পন হোতি; পৰলাভসক্কাৰগৰুকাৰমাননৱন্দনপূজনাসু ইস্সতি উপদুস্সতি ইস্সং বন্ধতি. সা চে ততো চুতা ইত্থত্তং আগচ্ছতি, সা [সো (স্যা.)] যত্থ যত্থ পচ্চাজাযতি দুব্বণ্ণা চ হোতি দুৰূপা সুপাপিকা দস্সনায; দলিদ্দা চ হোতি অপ্পস্সকা অপ্পভোগা অপ্পেসক্খা চ.

‘‘ইধ পন, মল্লিকে, একচ্চো মাতুগামো কোধনা হোতি উপাযাসবহুলা. অপ্পম্পি ৱুত্তা সমানা অভিসজ্জতি কুপ্পতি ব্যাপজ্জতি পতিত্থীযতি, কোপঞ্চ দোসঞ্চ অপ্পচ্চযঞ্চ পাতুকৰোতি. সা দাতা হোতি সমণস্স ৱা ব্ৰাহ্মণস্স ৱা অন্নং পানং ৱত্থং যানং মালাগন্ধৱিলেপনং সেয্যাৱসথপদীপেয্যং. অনিস্সামনিকা খো পন হোতি; পৰলাভসক্কাৰগৰুকাৰমাননৱন্দনপূজনাসু ন ইস্সতি ন উপদুস্সতি ন ইস্সং বন্ধতি. সা চে ততো চুতা ইত্থত্তং আগচ্ছতি, সা যত্থ যত্থ পচ্চাজাযতি দুব্বণ্ণা চ হোতি দুৰূপা সুপাপিকা দস্সনায; অড্ঢা চ হোতি মহদ্ধনা মহাভোগা মহেসক্খা চ.

‘‘ইধ পন, মল্লিকে, একচ্চো মাতুগামো অক্কোধনা হোতি অনুপাযাসবহুলা. বহুম্পি ৱুত্তা সমানা নাভিসজ্জতি ন কুপ্পতি ন ব্যাপজ্জতি ন পতিত্থীযতি, ন কোপঞ্চ দোসঞ্চ অপ্পচ্চযঞ্চ পাতুকৰোতি. সা ন দাতা হোতি সমণস্স ৱা ব্ৰাহ্মণস্স ৱা অন্নং পানং ৱত্থং যানং মালাগন্ধৱিলেপনং সেয্যাৱসথপদীপেয্যং. ইস্সামনিকা খো পন হোতি; পৰলাভসক্কাৰগৰুকাৰমাননৱন্দনপূজনাসু ইস্সতি উপদুস্সতি ইস্সং বন্ধতি. সা চে ততো চুতা ইত্থত্তং আগচ্ছতি, সা যত্থ যত্থ পচ্চাজাযতি অভিৰূপা চ হোতি দস্সনীযা পাসাদিকা পৰমায ৱণ্ণপোক্খৰতায সমন্নাগতা; দলিদ্দা চ হোতি অপ্পস্সকা অপ্পভোগা অপ্পেসক্খা চ.

‘‘ইধ পন, মল্লিকে, একচ্চো মাতুগামো অক্কোধনা হোতি অনুপাযাসবহুলা. বহুম্পি ৱুত্তা সমানা নাভিসজ্জতি ন কুপ্পতি ন ব্যাপজ্জতি ন পতিত্থীযতি, ন কোপঞ্চ দোসঞ্চ অপ্পচ্চযঞ্চ পাতুকৰোতি. সা দাতা হোতি সমণস্স ৱা ব্ৰাহ্মণস্স ৱা অন্নং পানং ৱত্থং যানং মালাগন্ধৱিলেপনং সেয্যাৱসথপদীপেয্যং. অনিস্সামনিকা খো পন হোতি; পৰলাভসক্কাৰগৰুকাৰমাননৱন্দনপূজনাসু ন ইস্সতি ন উপদুস্সতি ন ইস্সং বন্ধতি. সা চে ততো চুতা ইত্থত্তং আগচ্ছতি, সা যত্থ যত্থ পচ্চাজাযতি অভিৰূপা চ হোতি দস্সনীযা পাসাদিকা পৰমায ৱণ্ণপোক্খৰতায সমন্নাগতা; অড্ঢা চ হোতি মহদ্ধনা মহাভোগা মহেসক্খা চ.

‘‘অযং খো, মল্লিকে, হেতু অযং পচ্চযো, যেন মিধেকচ্চো মাতুগামো দুব্বণ্ণা চ হোতি দুৰূপা সুপাপিকা দস্সনায; দলিদ্দা চ হোতি অপ্পস্সকা অপ্পভোগা অপ্পেসক্খা চ. অযং পন, মল্লিকে, হেতু অযং পচ্চযো, যেন মিধেকচ্চো মাতুগামো দুব্বণ্ণা চ হোতি দুৰূপা সুপাপিকা দস্সনায; অড্ঢা চ হোতি মহদ্ধনা মহাভোগা মহেসক্খা চ. অযং খো, মল্লিকে, হেতু অযং পচ্চযো, যেন মিধেকচ্চো মাতুগামো অভিৰূপা চ হোতি দস্সনীযা পাসাদিকা পৰমায ৱণ্ণপোক্খৰতায সমন্নাগতা; দলিদ্দা চ হোতি অপ্পস্সকা অপ্পভোগা অপ্পেসক্খা চ. অযং পন, মল্লিকে, হেতু অযং পচ্চযো, যেন মিধেকচ্চো মাতুগামো অভিৰূপা চ হোতি দস্সনীযা পাসাদিকা পৰমায ৱণ্ণপোক্খৰতায সমন্নাগতা; অড্ঢা চ হোতি মহদ্ধনা মহাভোগা মহেসক্খা চা’’তি.

এৱং ৱুত্তে মল্লিকা দেৱী ভগৱন্তং এতদৱোচ – ‘‘যা নূনাহং [সা নূনাহং (স্যা.), যং নূনাহং (ক.)] ভন্তে, অঞ্ঞং জাতিং [অঞ্ঞায জাতিযা (স্যা.)] কোধনা অহোসিং উপাযাসবহুলা, অপ্পম্পি ৱুত্তা সমানা অভিসজ্জিং কুপ্পিং ব্যাপজ্জিং পতিত্থীযিং কোপঞ্চ দোসঞ্চ অপ্পচ্চযঞ্চ পাত্ৱাকাসিং, সাহং, ভন্তে, এতৰহি দুব্বণ্ণা দুৰূপা সুপাপিকা দস্সনায.

‘‘যা নূনাহং, ভন্তে, অঞ্ঞং জাতিং দাতা অহোসিং সমণস্স ৱা ব্ৰাহ্মণস্স ৱা অন্নং পানং ৱত্থং যানং মালাগন্ধৱিলেপনং সেয্যাৱসথপদীপেয্যং, সাহং, ভন্তে, এতৰহি অড্ঢা [অড্ঢা চ (সী. পী. ক.)] মহদ্ধনা মহাভোগা.

‘‘যা নূনাহং, ভন্তে, অঞ্ঞং জাতিং অনিস্সামনিকা অহোসিং, পৰলাভসক্কাৰগৰুকাৰমাননৱন্দনপূজনাসু ন ইস্সিং ন উপদুস্সিং ন ইস্সং বন্ধিং, সাহং, ভন্তে, এতৰহি মহেসক্খা. সন্তি খো পন, ভন্তে, ইমস্মিং ৰাজকুলে খত্তিযকঞ্ঞাপি ব্ৰাহ্মণকঞ্ঞাপি গহপতিকঞ্ঞাপি, তাসাহং ইস্সৰাধিপচ্চং কাৰেমি. এসাহং, ভন্তে, অজ্জতগ্গে অক্কোধনা ভৱিস্সামি অনুপাযাসবহুলা, বহুম্পি ৱুত্তা সমানা নাভিসজ্জিস্সামি ন কুপ্পিস্সামি ন ব্যাপজ্জিস্সামি ন পতিত্থীযিস্সামি, কোপঞ্চ দোসঞ্চ অপ্পচ্চযঞ্চ ন পাতুকৰিস্সামি; দস্সামি সমণস্স ৱা ব্ৰাহ্মণস্স ৱা অন্নং পানং ৱত্থং যানং মালাগন্ধৱিলেপনং সেয্যাৱসথপদীপেয্যং. অনিস্সামনিকা ভৱিস্সামি, পৰলাভসক্কাৰগৰুকাৰমাননৱন্দনপূজনাসু ন ইস্সিস্সামি ন উপদুস্সিস্সামি ন ইস্সং বন্ধিস্সামি. অভিক্কন্তং, ভন্তে…পে… উপাসিকং মং, ভন্তে, ভগৱা ধাৰেতু অজ্জতগ্গে পাণুপেতং সৰণং গত’’ন্তি. সত্তমং.