১. সোতানুগতসুত্তং

১৯১. ‘‘সোতানুগতানং, ভিক্খৱে, ধম্মানং, ৱচসা পৰিচিতানং, মনসানুপেক্খিতানং, দিট্ঠিযা সুপ্পটিৱিদ্ধানং চত্তাৰো আনিসংসা পাটিকঙ্খা. কতমে চত্তাৰো? ইধ, ভিক্খৱে, ভিক্খু ধম্মং পৰিযাপুণাতি – সুত্তং, গেয্যং, ৱেয্যাকৰণং, গাথং, উদানং, ইতিৱুত্তকং, জাতকং, অব্ভুতধম্মং, ৱেদল্লং. তস্স তে ধম্মা সোতানুগতা হোন্তি, ৱচসা পৰিচিতা, মনসানুপেক্খিতা, দিট্ঠিযা সুপ্পটিৱিদ্ধা. সো মুট্ঠস্সতি [মুট্ঠস্সতী (সী.)] কালং কুৰুমানো অঞ্ঞতৰং দেৱনিকাযং উপপজ্জতি. তস্স তত্থ সুখিনো ধম্মপদা প্লৱন্তি [পিলপন্তি (সী. স্যা. কং. পী.)]. দন্ধো, ভিক্খৱে, সতুপ্পাদো; অথ সো সত্তো খিপ্পংযেৱ ৱিসেসগামী হোতি. সোতানুগতানং, ভিক্খৱে, ধম্মানং, ৱচসা পৰিচিতানং, মনসানুপেক্খিতানং, দিট্ঠিযা সুপ্পটিৱিদ্ধানং অযং পঠমো আনিসংসো পাটিকঙ্খো.

‘‘পুন চপৰং, ভিক্খৱে, ভিক্খু ধম্মং পৰিযাপুণাতি – সুত্তং, গেয্যং, ৱেয্যাকৰণং, গাথং, উদানং, ইতিৱুত্তকং, জাতকং, অব্ভুতধম্মং, ৱেদল্লং. তস্স তে ধম্মা সোতানুগতা হোন্তি, ৱচসা পৰিচিতা, মনসানুপেক্খিতা, দিট্ঠিযা সুপ্পটিৱিদ্ধা. সো মুট্ঠস্সতি কালং কুৰুমানো অঞ্ঞতৰং দেৱনিকাযং উপপজ্জতি. তস্স তত্থ ন হেৱ খো সুখিনো ধম্মপদা প্লৱন্তি; অপি চ খো ভিক্খু ইদ্ধিমা চেতোৱসিপ্পত্তো দেৱপৰিসাযং ধম্মং দেসেতি. তস্স এৱং হোতি – ‘অযং ৱা সো ধম্মৱিনযো, যত্থাহং পুব্বে ব্ৰহ্মচৰিযং অচৰি’ন্তি. দন্ধো, ভিক্খৱে, সতুপ্পাদো; অথ সো সত্তো খিপ্পমেৱ ৱিসেসগামী হোতি. সেয্যথাপি, ভিক্খৱে, পুৰিসো কুসলো ভেৰিসদ্দস্স. সো অদ্ধানমগ্গপ্পটিপন্নো ভেৰিসদ্দং সুণেয্য. তস্স ন হেৱ খো অস্স কঙ্খা ৱা ৱিমতি ৱা – ‘ভেৰিসদ্দো নু খো, ন নু খো ভেৰিসদ্দো’তি! অথ খো ভেৰিসদ্দোত্ৱেৱ নিট্ঠং গচ্ছেয্য. এৱমেৱং খো, ভিক্খৱে, ভিক্খু ধম্মং পৰিযাপুণাতি – সুত্তং, গেয্যং, ৱেয্যাকৰণং, গাথং, উদানং, ইতিৱুত্তকং, জাতকং, অব্ভুতধম্মং, ৱেদল্লং. তস্স তে ধম্মা সোতানুগতা হোন্তি, ৱচসা পৰিচিতা, মনসানুপেক্খিতা, দিট্ঠিযা সুপ্পটিৱিদ্ধা. সো মুট্ঠস্সতি কালং কুৰুমানো অঞ্ঞতৰং দেৱনিকাযং উপপজ্জতি. তস্স তত্থ ন হেৱ খো সুখিনো ধম্মপদা প্লৱন্তি; অপি চ খো ভিক্খু ইদ্ধিমা চেতোৱসিপ্পত্তো দেৱপৰিসাযং ধম্মং দেসেতি. তস্স এৱং হোতি – ‘অযং ৱা সো ধম্মৱিনযো, যত্থাহং পুব্বে ব্ৰহ্মচৰিযং অচৰি’ন্তি. দন্ধো, ভিক্খৱে, সতুপ্পাদো; অথ সো সত্তো খিপ্পংযেৱ ৱিসেসগামী হোতি. সোতানুগতানং, ভিক্খৱে, ধম্মানং, ৱচসা পৰিচিতানং, মনসানুপেক্খিতানং, দিট্ঠিযা সুপ্পটিৱিদ্ধানং অযং দুতিযো আনিসংসো পাটিকঙ্খো.

‘‘পুন চপৰং, ভিক্খৱে, ভিক্খু ধম্মং পৰিযাপুণাতি – সুত্তং, গেয্যং, ৱেয্যাকৰণং, গাথং, উদানং, ইতিৱুত্তকং, জাতকং, অব্ভুতধম্মং, ৱেদল্লং. তস্স তে ধম্মা সোতানুগতা হোন্তি, ৱচসা পৰিচিতা, মনসানুপেক্খিতা, দিট্ঠিযা সুপ্পটিৱিদ্ধা. সো মুট্ঠস্সতি কালং কুৰুমানো অঞ্ঞতৰং দেৱনিকাযং উপপজ্জতি. তস্স তত্থ ন হেৱ খো সুখিনো ধম্মপদা প্লৱন্তি, নপি ভিক্খু ইদ্ধিমা চেতোৱসিপ্পত্তো দেৱপৰিসাযং ধম্মং দেসেতি; অপি চ খো দেৱপুত্তো দেৱপৰিসাযং ধম্মং দেসেতি. তস্স এৱং হোতি – ‘অযং ৱা সো ধম্মৱিনযো, যত্থাহং পুব্বে ব্ৰহ্মচৰিযং অচৰি’ন্তি. দন্ধো, ভিক্খৱে, সতুপ্পাদো; অথ সো সত্তো খিপ্পংযেৱ ৱিসেসগামী হোতি. সেয্যথাপি, ভিক্খৱে, পুৰিসো কুসলো সঙ্খসদ্দস্স. সো অদ্ধানমগ্গপ্পটিপন্নো সঙ্খসদ্দং সুণেয্য. তস্স ন হেৱ খো অস্স কঙ্খা ৱা ৱিমতি ৱা – ‘সঙ্খসদ্দো নু খো, ন নু খো সঙ্খসদ্দো’তি! অথ খো সঙ্খসদ্দোত্ৱেৱ নিট্ঠং গচ্ছেয্য. এৱমেৱং খো, ভিক্খৱে, ভিক্খু ধম্মং পৰিযাপুণাতি – সুত্তং, গেয্যং, ৱেয্যাকৰণং, গাথং, উদানং, ইতিৱুত্তকং, জাতকং, অব্ভুতধম্মং, ৱেদল্লং. তস্স তে ধম্মা সোতানুগতা হোন্তি, ৱচসা পৰিচিতা, মনসানুপেক্খিতা, দিট্ঠিযা সুপ্পটিৱিদ্ধা. সো মুট্ঠস্সতি কালং কুৰুমানো অঞ্ঞতৰং দেৱনিকাযং উপপজ্জতি. তস্স তত্থ ন হেৱ খো সুখিনো ধম্মপদা প্লৱন্তি, নপি ভিক্খু ইদ্ধিমা চেতোৱসিপ্পত্তো দেৱপৰিসাযং ধম্মং দেসেতি; অপি চ খো দেৱপুত্তো দেৱপৰিসাযং ধম্মং দেসেতি. তস্স এৱং হোতি – ‘অযং ৱা সো ধম্মৱিনযো, যত্থাহং পুব্বে ব্ৰহ্মচৰিযং অচৰি’ন্তি. দন্ধো, ভিক্খৱে, সতুপ্পাদো; অথ সো সত্তো খিপ্পংযেৱ ৱিসেসগামী হোতি. সোতানুগতানং, ভিক্খৱে, ধম্মানং, ৱচসা পৰিচিতানং, মনসানুপেক্খিতানং, দিট্ঠিযা সুপ্পটিৱিদ্ধানং অযং ততিযো আনিসংসো পাটিকঙ্খো.

‘‘পুন চপৰং, ভিক্খৱে, ভিক্খু ধম্মং পৰিযাপুণাতি – সুত্তং, গেয্যং, ৱেয্যাকৰণং, গাথং, উদানং, ইতিৱুত্তকং, জাতকং, অব্ভুতধম্মং, ৱেদল্লং. তস্স তে ধম্মা সোতানুগতা হোন্তি, ৱচসা পৰিচিতা, মনসানুপেক্খিতা, দিট্ঠিযা সুপ্পটিৱিদ্ধা. সো মুট্ঠস্সতি কালং কুৰুমানো অঞ্ঞতৰং দেৱনিকাযং উপপজ্জতি. তস্স তত্থ ন হেৱ খো সুখিনো ধম্মপদা প্লৱন্তি, নপি ভিক্খু ইদ্ধিমা চেতোৱসিপ্পত্তো দেৱপৰিসাযং ধম্মং দেসেতি, নপি দেৱপুত্তো দেৱপৰিসাযং ধম্মং দেসেতি; অপি চ খো ওপপাতিকো ওপপাতিকং সাৰেতি – ‘সৰসি ত্ৱং, মাৰিস, সৰসি ত্ৱং, মাৰিস, যত্থ মযং পুব্বে ব্ৰহ্মচৰিযং অচৰিম্হা’তি. সো এৱমাহ – ‘সৰামি, মাৰিস, সৰামি, মাৰিসা’তি. দন্ধো, ভিক্খৱে, সতুপ্পাদো; অথ সো সত্তো খিপ্পংযেৱ ৱিসেসগামী হোতি. সেয্যথাপি, ভিক্খৱে, দ্ৱে সহাযকা সহপংসুকীড়িকা [সহপংসুকীড়কা (স্যা. কং.)]. তে কদাচি কৰহচি অঞ্ঞমঞ্ঞং সমাগচ্ছেয্যুং. অঞ্ঞো পন [সমাগচ্ছেয্যুং, তমেনং (সী. স্যা. কং. পী.)] সহাযকো সহাযকং এৱং ৱদেয্য – ‘ইদম্পি, সম্ম, সৰসি, ইদম্পি, সম্ম, সৰসী’তি. সো এৱং ৱদেয্য – ‘সৰামি, সম্ম, সৰামি, সম্মা’তি. এৱমেৱং খো, ভিক্খৱে, ভিক্খু ধম্মং পৰিযাপুণাতি – সুত্তং, গেয্যং, ৱেয্যাকৰণং, গাথং, উদানং, ইতিৱুত্তকং, জাতকং, অব্ভুতধম্মং, ৱেদল্লং. তস্স তে ধম্মা সোতানুগতা হোন্তি, ৱচসা পৰিচিতা, মনসানুপেক্খিতা, দিট্ঠিযা সুপ্পটিৱিদ্ধা. সো মুট্ঠস্সতি কালং কুৰুমানো অঞ্ঞতৰং দেৱনিকাযং উপপজ্জতি. তস্স তত্থ ন হেৱ খো সুখিনো ধম্মপদা প্লৱন্তি, নপি ভিক্খু ইদ্ধিমা চেতোৱসিপ্পত্তো দেৱপৰিসাযং ধম্মং দেসেতি, নপি দেৱপুত্তো দেৱপৰিসাযং ধম্মং দেসেতি; অপি চ খো ওপপাতিকো ওপপাতিকং সাৰেতি – ‘সৰসি ত্ৱং, মাৰিস, সৰসি ত্ৱং, মাৰিস, যত্থ মযং পুব্বে ব্ৰহ্মচৰিযং অচৰিম্হা’তি. সো এৱমাহ – ‘সৰামি, মাৰিস, সৰামি, মাৰিসা’তি. দন্ধো, ভিক্খৱে, সতুপ্পাদো; অথ খো সো সত্তো খিপ্পংযেৱ ৱিসেসগামী হোতি. সোতানুগতানং, ভিক্খৱে, ধম্মানং, ৱচসা পৰিচিতানং, মনসানুপেক্খিতানং, দিট্ঠিযা সুপ্পটিৱিদ্ধানং অযং চতুত্থো আনিসংসো পাটিকঙ্খো. সোতানুগতানং, ভিক্খৱে, ধম্মানং, ৱচসা পৰিচিতানং, মনসানুপেক্খিতানং দিট্ঠিযা সুপ্পটিৱিদ্ধানং ইমে চত্তাৰো আনিসংসা পাটিকঙ্খা’’তি. পঠমং.