৬. কপ্পসুত্তং

১৫৬. ‘‘চত্তাৰিমানি, ভিক্খৱে, কপ্পস্স অসঙ্খ্যেয্যানি. কতমানি চত্তাৰি? যদা, ভিক্খৱে, কপ্পো সংৱট্টতি, তং ন সুকৰং সঙ্খাতুং – এত্তকানি ৱস্সানীতি ৱা, এত্তকানি ৱস্সসতানীতি ৱা, এত্তকানি ৱস্সসহস্সানীতি ৱা, এত্তকানি ৱস্সসতসহস্সানীতি ৱা.

‘‘যদা, ভিক্খৱে, কপ্পো সংৱট্টো তিট্ঠতি, তং ন সুকৰং সঙ্খাতুং – এত্তকানি ৱস্সানীতি ৱা, এত্তকানি ৱস্সসতানীতি ৱা, এত্তকানি ৱস্সসহস্সানীতি ৱা, এত্তকানি ৱস্সসতসহস্সানীতি ৱা.

‘‘যদা, ভিক্খৱে, কপ্পো ৱিৱট্টতি, তং ন সুকৰং সঙ্খাতুং – এত্তকানি ৱস্সানীতি ৱা, এত্তকানি ৱস্সসতানীতি ৱা, এত্তকানি ৱস্সসহস্সানীতি ৱা, এত্তকানি ৱস্সসতসহস্সানীতি ৱা.

‘‘যদা, ভিক্খৱে, কপ্পো ৱিৱট্টো তিট্ঠতি, তং ন সুকৰং সঙ্খাতুং – এত্তকানি ৱস্সানীতি ৱা, এত্তকানি ৱস্সসতানীতি ৱা, এত্তকানি ৱস্সসহস্সানীতি ৱা, এত্তকানি ৱস্সসতসহস্সানীতি ৱা. ইমানি খো, ভিক্খৱে, চত্তাৰি কপ্পস্স অসঙ্খ্যেয্যানী’’তি. ছট্ঠং.