৯. পধানসুত্তং

৬৯. ‘‘চত্তাৰিমানি, ভিক্খৱে, পধানানি. কতমানি চত্তাৰি? সংৱৰপ্পধানং, পহানপ্পধানং, ভাৱনাপ্পধানং, অনুৰক্খণাপ্পধানং. কতমঞ্চ, ভিক্খৱে, সংৱৰপ্পধানং? ইধ, ভিক্খৱে, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. ইদং ৱুচ্চতি, ভিক্খৱে, সংৱৰপ্পধানং.

‘‘কতমঞ্চ, ভিক্খৱে, পহানপ্পধানং? ইধ, ভিক্খৱে, ভিক্খু উপ্পন্নানং পাপকানং অকুসলানং ধম্মানং পহানায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. ইদং ৱুচ্চতি, ভিক্খৱে, পহানপ্পধানং.

‘‘কতমঞ্চ, ভিক্খৱে, ভাৱনাপ্পধানং? ইধ, ভিক্খৱে, ভিক্খু অনুপ্পন্নানং কুসলানং ধম্মানং উপ্পাদায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. ইদং ৱুচ্চতি, ভিক্খৱে, ভাৱনাপ্পধানং.

‘‘কতমঞ্চ, ভিক্খৱে, অনুৰক্খণাপ্পধানং? ইধ, ভিক্খৱে, ভিক্খু উপ্পন্নানং কুসলানং ধম্মানং ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. ইদং ৱুচ্চতি, ভিক্খৱে, অনুৰক্খণাপ্পধানং. ইমানি খো, ভিক্খৱে, চত্তাৰি পধানানী’’তি.

‘‘সংৱৰো চ পহানঞ্চ, ভাৱনা অনুৰক্খণা;

এতে পধানা চত্তাৰো, দেসিতাদিচ্চবন্ধুনা;

যো হি [যেহি (?)] ভিক্খু ইধাতাপী, খযং দুক্খস্স পাপুণে’’তি. নৱমং;