১০. অধম্মিকসুত্তং

৭০. ‘‘যস্মিং, ভিক্খৱে, সমযে ৰাজানো অধম্মিকা হোন্তি, ৰাজাযুত্তাপি তস্মিং সমযে অধম্মিকা হোন্তি. ৰাজাযুত্তেসু অধম্মিকেসু ব্ৰাহ্মণগহপতিকাপি তস্মিং সমযে অধম্মিকা হোন্তি. ব্ৰাহ্মণগহপতিকেসু অধম্মিকেসু নেগমজানপদাপি তস্মিং সমযে অধম্মিকা হোন্তি. নেগমজানপদেসু অধম্মিকেসু ৱিসমং চন্দিমসূৰিযা পৰিৱত্তন্তি. ৱিসমং চন্দিমসূৰিযেসু পৰিৱত্তন্তেসু ৱিসমং নক্খত্তানি তাৰকৰূপানি পৰিৱত্তন্তি. ৱিসমং নক্খত্তেসু তাৰকৰূপেসু পৰিৱত্তন্তেসু ৱিসমং ৰত্তিন্দিৱা [ৰত্তিদিৱা (ক.)] পৰিৱত্তন্তি. ৱিসমং ৰত্তিন্দিৱেসু পৰিৱত্তন্তেসু ৱিসমং মাসদ্ধমাসা পৰিৱত্তন্তি. ৱিসমং মাসদ্ধমাসেসু পৰিৱত্তন্তেসু ৱিসমং উতুসংৱচ্ছৰা পৰিৱত্তন্তি. ৱিসমং উতুসংৱচ্ছৰেসু পৰিৱত্তন্তেসু ৱিসমং ৱাতা ৱাযন্তি ৱিসমা অপঞ্জসা. ৱিসমং ৱাতেসু ৱাযন্তেসু ৱিসমেসু অপঞ্জসেসু দেৱতা পৰিকুপিতা ভৱন্তি. দেৱতাসু পৰিকুপিতাসু দেৱো ন সম্মা ধাৰং অনুপ্পৱেচ্ছতি. দেৱে ন সম্মা ধাৰং অনুপ্পৱেচ্ছন্তে ৱিসমপাকানি [ৱিসমপাকীনি (সী. স্যা. কং.), ৱিসমং পাকানি (ক.)] সস্সানি ভৱন্তি. ৱিসমপাকানি, ভিক্খৱে, সস্সানি মনুস্সা পৰিভুঞ্জন্তা অপ্পাযুকা হোন্তি দুব্বণ্ণা চ বৱ্হাবাধা [বহ্ৱাবাধা (ক.)] চ.

‘‘যস্মিং, ভিক্খৱে, সমযে ৰাজানো ধম্মিকা হোন্তি, ৰাজাযুত্তাপি তস্মিং সমযে ধম্মিকা হোন্তি. ৰাজাযুত্তেসু ধম্মিকেসু ব্ৰাহ্মণগহপতিকাপি তস্মিং সমযে ধম্মিকা হোন্তি. ব্ৰাহ্মণগহপতিকেসু ধম্মিকেসু নেগমজানপদাপি তস্মিং সমযে ধম্মিকা হোন্তি. নেগমজানপদেসু ধম্মিকেসু সমং চন্দিমসূৰিযা পৰিৱত্তন্তি. সমং চন্দিমসূৰিযেসু পৰিৱত্তন্তেসু সমং নক্খত্তানি তাৰকৰূপানি পৰিৱত্তন্তি. সমং নক্খত্তেসু তাৰকৰূপেসু পৰিৱত্তন্তেসু সমং ৰত্তিন্দিৱা পৰিৱত্তন্তি. সমং ৰত্তিন্দিৱেসু পৰিৱত্তন্তেসু সমং মাসদ্ধমাসা পৰিৱত্তন্তি. সমং মাসদ্ধমাসেসু পৰিৱত্তন্তেসু সমং উতুসংৱচ্ছৰা পৰিৱত্তন্তি. সমং উতুসংৱচ্ছৰেসু পৰিৱত্তন্তেসু সমং ৱাতা ৱাযন্তি সমা পঞ্জসা. সমং ৱাতেসু ৱাযন্তেসু সমেসু পঞ্জসেসু দেৱতা অপৰিকুপিতা ভৱন্তি. দেৱতাসু অপৰিকুপিতাসু দেৱো সম্মা ধাৰং অনুপ্পৱেচ্ছতি. দেৱে সম্মা ধাৰং অনুপ্পৱেচ্ছন্তে সমপাকানি সস্সানি ভৱন্তি. সমপাকানি, ভিক্খৱে, সস্সানি মনুস্সা পৰিভুঞ্জন্তা দীঘাযুকা চ হোন্তি ৱণ্ণৱন্তো চ বলৱন্তো চ অপ্পাবাধা চা’’তি.

‘‘গুন্নং চে তৰমানানং, জিম্হং গচ্ছতি পুঙ্গৱো;

সব্বা তা জিম্হং গচ্ছন্তি, নেত্তে জিম্হং গতে সতি.

‘‘এৱমেৱং মনুস্সেসু, যো হোতি সেট্ঠসম্মতো;

সো চে অধম্মং চৰতি, পগেৱ ইতৰা পজা;

সব্বং ৰট্ঠং দুক্খং সেতি, ৰাজা চে হোতি অধম্মিকো.

‘‘গুন্নং চে তৰমানানং, উজুং গচ্ছতি পুঙ্গৱো;

সব্বা তা উজুং গচ্ছন্তি, নেত্তে উজুং গতে সতি.

‘‘এৱমেৱং মনুস্সেসু, যো হোতি সেট্ঠসম্মতো;

সো সচে [সো চেৱ (সী. পী.), সো চে (স্যা.)] ধম্মং চৰতি, পগেৱ ইতৰা পজা;

সব্বং ৰট্ঠং সুখং সেতি, ৰাজা চে হোতি ধম্মিকো’’তি. দসমং;

পত্তকম্মৱগ্গো দুতিযো.