৭. ততিযআজানীযসুত্তং

৯৯. ‘‘তীহি, ভিক্খৱে, অঙ্গেহি সমন্নাগতো ৰঞ্ঞো ভদ্ৰো অস্সাজানীযো ৰাজাৰহো হোতি ৰাজভোগ্গো, ৰঞ্ঞো অঙ্গন্তেৱ সঙ্খযং গচ্ছতি. কতমেহি তীহি? ইধ, ভিক্খৱে, ৰঞ্ঞো ভদ্ৰো অস্সাজানীযো ৱণ্ণসম্পন্নো চ হোতি বলসম্পন্নো চ জৱসম্পন্নো চ. ইমেহি খো, ভিক্খৱে, তীহি অঙ্গেহি সমন্নাগতো ৰঞ্ঞো ভদ্ৰো অস্সাজানীযো ৰাজাৰহো হোতি ৰাজভোগ্গো, ৰঞ্ঞো অঙ্গন্তেৱ সঙ্খ্যং গচ্ছতি. এৱমেৱং খো, ভিক্খৱে, তীহি ধম্মেহি সমন্নাগতো ভিক্খু আহুনেয্যো হোতি পাহুনেয্যো দক্খিণেয্যো অঞ্জলিকৰণীযো অনুত্তৰং পুঞ্ঞক্খেত্তং লোকস্স. কতমেহি তীহি? ইধ, ভিক্খৱে, ভিক্খু ৱণ্ণসম্পন্নো চ হোতি বলসম্পন্নো চ জৱসম্পন্নো চ.

‘‘কথঞ্চ, ভিক্খৱে, ভিক্খু ৱণ্ণসম্পন্নো হোতি? ইধ, ভিক্খৱে, ভিক্খু সীলৱা হোতি, পাতিমোক্খসংৱৰসংৱুতো ৱিহৰতি আচাৰগোচৰসম্পন্নো অণুমত্তেসু ৱজ্জেসু ভযদস্সাৱী, সমাদায সিক্খতি সিক্খাপদেসু. এৱং খো, ভিক্খৱে, ভিক্খু ৱণ্ণসম্পন্নো হোতি.

‘‘কথঞ্চ, ভিক্খৱে, ভিক্খু বলসম্পন্নো হোতি? ইধ, ভিক্খৱে, ভিক্খু আৰদ্ধৱীৰিযো ৱিহৰতি অকুসলানং ধম্মানং পহানায কুসলানং ধম্মানং উপসম্পদায থামৱা দড়্হপৰক্কমো অনিক্খিত্তধুৰো কুসলেসু ধম্মেসু. এৱং খো, ভিক্খৱে, ভিক্খু বলসম্পন্নো হোতি.

‘‘কথঞ্চ, ভিক্খৱে, ভিক্খু জৱসম্পন্নো হোতি? ইধ, ভিক্খৱে, ভিক্খু আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. এৱং খো, ভিক্খৱে, ভিক্খু জৱসম্পন্নো হোতি. ইমেহি খো, ভিক্খৱে, তীহি ধম্মেহি সমন্নাগতো ভিক্খু আহুনেয্যো হোতি…পে… অনুত্তৰং পুঞ্ঞক্খেত্তং লোকস্সা’’তি. সত্তমং.