৮. পোত্থকসুত্তং

১০০. ‘‘নৱোপি, ভিক্খৱে, পোত্থকো দুব্বণ্ণো চ হোতি দুক্খসম্ফস্সো চ অপ্পগ্ঘো চ; মজ্ঝিমোপি, ভিক্খৱে, পোত্থকো দুব্বণ্ণো চ হোতি দুক্খসম্ফস্সো চ অপ্পগ্ঘো চ; জিণ্ণোপি, ভিক্খৱে, পোত্থকো দুব্বণ্ণো চ হোতি দুক্খসম্ফস্সো চ অপ্পগ্ঘো চ. জিণ্ণম্পি, ভিক্খৱে, পোত্থকং উক্খলিপৰিমজ্জনং ৱা কৰোন্তি সঙ্কাৰকূটে ৱা নং [তং (সী.), ঠানে (ক.)] ছড্ডেন্তি.

‘‘এৱমেৱং খো, ভিক্খৱে, নৱো চেপি ভিক্খু হোতি দুস্সীলো পাপধম্মো. ইদমস্স দুব্বণ্ণতায ৱদামি. সেয্যথাপি সো, ভিক্খৱে, পোত্থকো দুব্বণ্ণো তথূপমাহং, ভিক্খৱে, ইমং পুগ্গলং ৱদামি. যে খো পনস্স সেৱন্তি ভজন্তি পযিৰুপাসন্তি দিট্ঠানুগতিং আপজ্জন্তি, তেসং তং হোতি দীঘৰত্তং অহিতায দুক্খায. ইদমস্স দুক্খসম্ফস্সতায ৱদামি. সেয্যথাপি সো, ভিক্খৱে, পোত্থকো দুক্খসম্ফস্সো তথূপমাহং, ভিক্খৱে, ইমং পুগ্গলং ৱদামি. যেসং খো পন সো [যেসং খো পন (সী. স্যা. কং. পী.), যেসং সো (ক.) পু. প. ১১৬ পস্সিতব্বং] পটিগ্গণ্হাতি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰং, তেসং তং ন মহপ্ফলং হোতি ন মহানিসংসং. ইদমস্স অপ্পগ্ঘতায ৱদামি. সেয্যথাপি সো, ভিক্খৱে, পোত্থকো অপ্পগ্ঘো তথূপমাহং, ভিক্খৱে, ইমং পুগ্গলং ৱদামি. মজ্ঝিমো চেপি, ভিক্খৱে, ভিক্খু হোতি…পে… থেৰো চেপি, ভিক্খৱে, ভিক্খু হোতি দুস্সীলো পাপধম্মো, ইদমস্স দুব্বণ্ণতায ৱদামি. সেয্যথাপি সো, ভিক্খৱে, পোত্থকো দুব্বণ্ণো তথূপমাহং, ভিক্খৱে, ইমং পুগ্গলং ৱদামি. যে খো পনস্স সেৱন্তি ভজন্তি পযিৰুপাসন্তি দিট্ঠানুগতিং আপজ্জন্তি, তেসং তং হোতি দীঘৰত্তং অহিতায দুক্খায. ইদমস্স দুক্খসম্ফস্সতায ৱদামি. সেয্যথাপি সো, ভিক্খৱে, পোত্থকো দুক্খসম্ফস্সো তথূপমাহং, ভিক্খৱে, ইমং পুগ্গলং ৱদামি. যেসং খো পন সো পটিগ্গণ্হাতি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰং, তেসং তং ন মহপ্ফলং হোতি ন মহানিসংসং. ইদমস্স অপ্পগ্ঘতায ৱদামি. সেয্যথাপি সো, ভিক্খৱে, পোত্থকো অপ্পগ্ঘো তথূপমাহং, ভিক্খৱে, ইমং পুগ্গলং ৱদামি.

‘‘এৱৰূপো চাযং, ভিক্খৱে, থেৰো ভিক্খু সঙ্ঘমজ্ঝে ভণতি. তমেনং ভিক্খূ এৱমাহংসু – ‘কিং নু খো তুয্হং বালস্স অব্যত্তস্স ভণিতেন, ত্ৱম্পি নাম ভণিতব্বং মঞ্ঞসী’তি! সো কুপিতো অনত্তমনো তথাৰূপিং ৱাচং নিচ্ছাৰেতি যথাৰূপায ৱাচায সঙ্ঘো তং উক্খিপতি, সঙ্কাৰকূটেৱ নং পোত্থকং.

‘‘নৱম্পি, ভিক্খৱে, কাসিকং ৱত্থং ৱণ্ণৱন্তঞ্চেৱ হোতি সুখসম্ফস্সঞ্চ মহগ্ঘঞ্চ; মজ্ঝিমম্পি, ভিক্খৱে, কাসিকং ৱত্থং ৱণ্ণৱন্তঞ্চেৱ হোতি সুখসম্ফস্সঞ্চ মহগ্ঘঞ্চ; জিণ্ণম্পি, ভিক্খৱে, কাসিকং ৱত্থং ৱণ্ণৱন্তঞ্চেৱ হোতি সুখসম্ফস্সঞ্চ মহগ্ঘঞ্চ. জিণ্ণম্পি, ভিক্খৱে, কাসিকং ৱত্থং ৰতনপলিৱেঠনং ৱা কৰোতি গন্ধকৰণ্ডকে ৱা নং পক্খিপন্তি.

‘‘এৱমেৱং খো, ভিক্খৱে, নৱো চেপি ভিক্খু হোতি সীলৱা কল্যাণধম্মো, ইদমস্স সুৱণ্ণতায ৱদামি. সেয্যথাপি তং, ভিক্খৱে, কাসিকং ৱত্থং ৱণ্ণৱন্তং তথূপমাহং, ভিক্খৱে, ইমং পুগ্গলং ৱদামি. যে খো পনস্স সেৱন্তি ভজন্তি পযিৰুপাসন্তি দিট্ঠানুগতিং আপজ্জন্তি, তেসং তং হোতি দীঘৰত্তং হিতায সুখায. ইদমস্স সুখসম্ফস্সতায ৱদামি. সেয্যথাপি তং, ভিক্খৱে, কাসিকং ৱত্থং সুখসম্ফস্সং তথূপমাহং, ভিক্খৱে, ইমং পুগ্গলং ৱদামি. যেসং খো পন সো পটিগ্গণ্হাতি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰং, তেসং তং মহপ্ফলং হোতি মহানিসংসং. ইদমস্স মহগ্ঘতায ৱদামি. সেয্যথাপি তং, ভিক্খৱে, কাসিকং ৱত্থং মহগ্ঘং তথূপমাহং, ভিক্খৱে, ইমং পুগ্গলং ৱদামি. মজ্ঝিমো চেপি, ভিক্খৱে, ভিক্খু হোতি…পে… থেৰো চেপি, ভিক্খৱে, ভিক্খু হোতি…পে… পুগ্গলং ৱদামি.

‘‘এৱৰূপো চাযং, ভিক্খৱে, থেৰো ভিক্খু সঙ্ঘমজ্ঝে ভণতি. তমেনং ভিক্খূ এৱমাহংসু – ‘অপ্পসদ্দা আযস্মন্তো হোথ, থেৰো ভিক্খু ধম্মঞ্চ ৱিনযঞ্চ ভণতী’তি. তস্মাতিহ, ভিক্খৱে, এৱং সিক্খিতব্বং – ‘কাসিকৱত্থূপমা ভৱিস্সাম, ন পোত্থকূপমা’তি [কাসিকং ৱত্থং তথূপমাহং ভৱিস্সামি, ন পোত্থকূপমাহন্তি (ক.)]. এৱঞ্হি ৱো, ভিক্খৱে, সিক্খিতব্ব’’ন্তি. অট্ঠমং.