৩. সৰদসুত্তং

৯৫. ‘‘সেয্যথাপি, ভিক্খৱে, সৰদসমযে ৱিদ্ধে ৱিগতৱলাহকে দেৱে আদিচ্চো নভং অব্ভুস্সক্কমানো [অব্ভুস্সুক্কমানো (সী. পী.)] সব্বং আকাসগতং তমগতং অভিৱিহচ্চ ভাসতে চ তপতে চ ৱিৰোচতি চ.

‘‘এৱমেৱং খো, ভিক্খৱে, যতো অৰিযসাৱকস্স ৱিৰজং ৱীতমলং ধম্মচক্খুং উপ্পজ্জতি [উদপাদি (সব্বত্থ)], সহ দস্সনুপ্পাদা, ভিক্খৱে, অৰিযসাৱকস্স তীণি সংযোজনানি পহীযন্তি – সক্কাযদিট্ঠি, ৱিচিকিচ্ছা, সীলব্বতপৰামাসো.

‘‘অথাপৰং দ্ৱীহি ধম্মেহি নিয্যাতি অভিজ্ঝায চ ব্যাপাদেন চ. সো ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰতি. তস্মিং চে, ভিক্খৱে, সমযে অৰিযসাৱকো কালং কৰেয্য, নত্থি তং [তস্স (ক.)] সংযোজনং যেন সংযোজনেন সংযুত্তো অৰিযসাৱকো পুন ইমং [পুনযিমং (স্যা. কং. ক.)] লোকং আগচ্ছেয্যা’’তি. ততিযং.